ປກສ ແຂວງ ບໍລິຄໍາໄຊ ຢຶດກະເຟປະສົມສານເສບຕິດຫຼາຍຮ້ອຍຊອງ

ເຈົ້າໜ້າທີ່ ປກສ ແຂວງ ບໍລິຄໍາໄຊໄດ້ໃຫ້ຮູ້ວ່າ: ໃນຄັ້ງວັນທີ 26 ກັນຍາ 2022 ໄດ້ຮັບແຫຼ່ງຂ່າວຈາກພົນລະເມືອງດີວ່າ ຈະມີກຸ່ມຄົນຈໍານວນໜຶ່ງເຄື່ອນໄຫວຄ້າ – ຂາຍ ແລະ ຂົນສົ່ງຢາເສບຕິດປະເພດກະເຟທີ່ປະສົມສານເສບຕິດ ( ກະເຟມ່ວນ ) ມາຈາກນະຄອນຫຼວງວຽງຈັນ ໄປຫາບ້ານ ວຽງຄໍາ ເມືອງ ປາກກະດິງ ແຂວງ ບໍລິຄໍາໄຊ.

ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ຈຶ່ງໄດ້ສົມທົບກັບກໍາລັງຕໍາຫຼວດຈະລາຈອນ ອອກເຄື່ອນໄຫວຕິດຕາມເປົ້າໝາຍ, ຮອດເວລາ 07 ໂມງ 40 ນາທີ ຂອງວັນທີ 27 ກັນຍາ 2022 ຈຶ່ງພົບເຫັນລົດຂອງເປົ້າໝາຍເປັນລົດກະບະ ໂຕໂຍຕ່າ ວີໂກ່ ສີຂາວ ໝາຍເລກທະບຽນ ອລ 8399 ກໍາແພງນະຄອນ ແລ່ນມາດ້ວຍຄວາມໄວສູງ ມາຈາກທາງນະຄອນຫຼວງວຽງຈັນ ເຈົ້າໜ້າທີ່ຈຶ່ງໄດ້ຂັບຂີ່ລົດຕິດຕາມມາ ພໍຮອດເຂດບ້ານຫາງຊິງ ເມືອງ ປາກຊັນ ແຂວງ ບໍລິຄໍາໄຊ ລົດຄັນດັ່ງກ່າວໄດ້ເກີດອຸປະຕິເຫດຕໍາກັບລົດຈັກ ແລ້ວໄດ້ຂັບລົດເອົາຕົວຫຼົບໜີມາທາງເມືອງປາກຊັນ ເຈົ້າໜ້າທີ່ໄດ້ໄລ່ຕິດຕາມ ມາຮອດທາງຮ່ອມເຂົ້າສວນຢາງພາລາເຂດບ້ານກ້ວຍອຸດົມ ເມືອງ ປາກຊັນ ເປົ້າໝາຍຈຶ່ງຈອດລົດປະໄວ້ ແລ້ວເອົາຕົວຫຼົບໜີ.

ພໍຮອດເວລາ 09 ໂມງຂອງວັນດຽວກັນ ຈຶ່ງສາມາດກັກຕົວເປົ້າໝາຍໄດ້ 02 ຄົນ ຄື: ທ້າວ ບົວພາ ອາຍຸ 26 ປີ ອາຊີບຄ້າຂາຍ ຢູ່ບ້ານ ວຽງຄໍາ ເມືອງ ປາກກະດິງ ແລະ ທ້າວ ສຸດໃຈ ອາຍຸ 18 ປີ ອາຊີບຄ້າຂາຍ ຢູ່ບ້ານ ຫ້ວຍຫອຍ ເມືອງ ວຽງທອງ, ທັງສອງ ຢູ່ແຂວງບໍລິຄໍາໄຊ.

ຜ່ານການກວດຄົ້ນລົດຄັນດັ່ງກ່າວ ພົບເຫັນກະເຟຊອງປະສົມສານເສບຕິດ ຈໍານວນ 779 ຊອງ ແລະ ກະເຟປ໋ອງປະສົມສານເສບຕິດ ຈໍານວນ 87 ປ໋ອງ ຊຸກເຊື່ອງໄວ້ໃນເບາະລົດ, ພ້ອມນັ້ນ ຍັງມີເຄື່ອງສໍາອາງປະເພດເຊລໍ່າ 280 ກ່ອງ, ສະບູ່ 131 ກ້ອນ, ຄີມກັນແດດ 187 ກ່ອງ ທີ່ນໍາໃຊ້ເພື່ອອໍາພາງໃນເວລາເຄື່ອນຍ້າຍຂົນສົ່ງກະເຟທີ່ປະສົມສານເສບຕິດ ຈຶ່ງໄດ້ນໍາຕົວພວກກ່ຽວທັງສອງຄົນພ້ອມຂອງກາງ ແລະ ລົດກະບະຄັນດັ່ງກ່າວ ມາສືບສວນ – ສອບສວນຕາມກົດໝາຍ.

ຜ່ານການສືບສວນ – ສອບສວນຂອງເຈົ້າໜ້າທີ່ໃນເບື້ອງຕົ້ນ ພວກກ່ຽວທັງ 02 ໄດ້ໃຫ້ການຮັບສາລະພາບວ່າ: ເຄື່ອງຈໍານວນດັ່ງກ່າວ ແມ່ນຮັບຊື້ມາຈາກເຖົ້າແກ່ຄົນຈີນຢູ່ນະຄອນຫຼວງວຽງຈັນ ເພື່ອນໍາໄປຈໍາໜ່າຍຢູ່ເຂດບ້ານວຽງຄໍາ ເມືອງ ປາກກະດິງ ແຕ່ກໍ່ມາເກີດອຸປະຕິເຫດ ແລະ ຖືກເຈົ້າໜ້າທີ່ກັກຕົວມາດໍາເນີນຄະດີສາກ່ອນ, ຕໍ່ກັບຄະດີດັ່ງກ່າວ ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງ ບໍລິຄໍາໄຊ ຈະສືບຕໍ່ຂະຫຍາຍຜົນເພື່ອຕິດຕາມກັກຕົວຜູ້ຮ່ວມຂະບວນການມາດໍາເນີນຄະດີຕາມລະບຽບກົດໝາຍ.

ເຈົ້າໜ້າທີ່ ໄດ້ຮຽກຮ້ອງມາຍັງພໍ່ແມ່ປະຊາຊົນ ໂດຍສະເພາະຊາວໜຸ່ມ, ເຍົາວະຊົນ ຈົ່ງພ້ອມກັນມີສະຕິລະວັງຕົວໃນການບໍລິໂພກອາຫານເສີມປະເພດຕ່າງໆ ເພາະອາດມີສານເສບຕິດປະສົມຢູ່ນໍາ ເຊິ່ງເປັນອັນຕະລາຍຕໍ່ສຸຂະພາບເຖິງຂັ້ນເສຍຊີວິດກໍ່ມີ ແລະ ຈົ່ງຊ່ວຍກັນເປັນຫູເປັນຕາ ໃຫ້ແກ່ເຈົ້າໜ້າທີ່ໃນການສະກັດກັ້ນແກ້ໄຂບັນຫາປະກົດການຫຍໍ້ທໍ້ໃຫ້ລຸດໜ້ອຍຖອຍລົງ ແລະ ໝົດໄປຈາກສັງຄົມໂດຍໄວ.

• Facebook
• Twitter
• Line