ບໍລິຄຳໄຊ ຈັດສຳມະນາການເຂົ້າເຖິງຕະຫຼາດຂໍ້ມູນຂ່າວສານພາກພື້ນອາຊ່ຽນຜ່ານເວັບໄຊ້

ກອງປະຊຸມສໍາມະນາເຜີຍແຜ່ການເຂົ້າເຖິງຕະຫຼາດຂໍ້ມູນຂ່າວສານພາກພື້ນອາຊ່ຽນຜ່ານເວັບໄຊ້ ອາຊ່ຽນເອັກເຊດສ໌ (WWW.ASEANACCESS.COM) ໃຫ້ແກ່ວິສາຫະກິດຂະໜາດນ້ອຍ ແລະ ກາງ ໄດ້ຈັດຂຶ້ນໃນວັນທີ 27 ກັນຍາ 2022 ຢູ່ໂຮງແຮມດອກຈໍາປາ ເມືອງປາກຊັນ, ເປັນປະທານໂດຍ ທ່ານ ຄອນສະຫວັນ ສຸກຂະເສີມ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງບໍລິຄຳໄຊ ແລະ ທ່ານ ສາ ສີລິພົງ ຮອງຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ມີວິທະຍາກອນຈາກກະຊວງ, ນັກສໍາມະນາກອນ ຈາກບັນດາວິສາຫະກິດພາຍໃນແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ເວັບໄຊອາຊຽນ ແມ່ນປະຕູສູ່ຂໍ້ມູນຂ່າວສານດ້ານທຸລະກິດອາຊຽນ ແລະ ສາກົນ, ໂດຍຈະມີຂໍ້ມູນກ່ຽວກັບຂໍ້ກໍານົດ, ກົດລະບຽບການຄ້າ, ການເຂົ້າສູ່ຕະຫຼາດ, ຖານຂໍ້ມູນຂ່າວສານຂອງຜູ້ໃຫ້ບໍລິການດ້ານທຸລະກິດ – ການລົງທຶນ ແລະ ການສົ່ງເສີມວິສາຫະກິດຂະໜາດນ້ອຍ ແລະ ກາງ ໃຫ້ສາມາດຫັນມາເປັນສາກົນຂຶ້ນ, ພ້ອມນັ້ນ ຍັງສົ່ງເສີມທຸລະກິດອາຊຽນອອກສູ່ສາກົນ ດ້ວຍການສະໜອງຂໍ້ມູນການຄ້າ, ການຕະຫຼາດ ໃຫ້ວິສາຫະກິດຂະໜາດນ້ອຍ ແລະ ກາງ ທີ່ແທດເໝາະ, ໃຫ້ບໍລິການໂດຍບໍ່ເສຍຄ່າໃຊ້ຈ່າຍ, ຊ່ວຍໃຫ້ຜູ້ຈັດຈໍາໜ່າຍ ຫຼື ໂຕແທນ ສາມາດຊອກຫາຄູ່ຮ່ວມທຸລະກິດໄດ້ງານຂຶ້ນ.

ນັກສຳມະນາກອນທີ່ເຂົ້າຮ່ວມ ຈະໄດ້ຮຽນກຮູ້ກ່ຽວກັບການນໍາໃຊ້, ໂຄງສ້າງ ແລະ ລາຍລະອຽດຂອງແຕ່ລະຫົວຂໍ້ຂອງເວັບໄຊທ໌, ວິທີລົງທະບຽນ ແລະ ລົງຊື່ເຂົ້າໃຊ້, ວິທີຈັດການບັນຊີ, ການສົ່ງລາຍລະອຽດຜູ້ໃຫ້ບໍລິການ ແລະ ຂໍ້ມູນອື່ນໆ.

ສຳມະນານີ້ ເພື່ອເປັນການສ້າງຄວາມເຂັ້ມແຂງ ໃຫ້ຈຸນລະວິສາຫະກິດ, ວິສາຫະກິດ ຂະໜາດນ້ອຍ ແລະ ກາງ, ເປີດໂອກາດ ໃນການແຂ່ງຂັນ ແລະ ເຂົ້າສູ່ຕະຫຼາດສາກົນໃຫ້ຫຼາຍຂຶ້ນ, ພ້ອມທັງສາມາດແລກປ່ຽນບົດຮຽນ, ຂໍ້ມູນຂ່າວສານ ແລະ ກ້າວເຂົ້າສູ່ການຮ່ວມມືໃນອານາຄົດ.

• Facebook
• Twitter
• Line