ຄະນະກໍາມະການເສດຖະກິດແຜນການ ແລະ ການເງິນ ສະພາປະຊາຊົນ ລົງນາມເຊັນບົດບັນທຶກ ກັບພະແນກອຸດສາຫະກຳ ແລະ ການຄ້າແຂວງ

ພິທີເຊັນບົດບັນທຶກການປະສານງານ ລະຫວ່າງ ຄະນະກໍາມະການເສດຖະກິດແຜນການ ແລະ ການເງິນ ສະພາປະຊາຊົນແຂວງ ກັບພະແນກອຸດສາຫະກຳ ແລະ ການຄ້າແຂວງ ໄດ້ຈັດຂື້ນໃນຕອນບ່າຍຂອງວັນທີ 21 ກັນຍາ 2022 ຢູ່ຫ້ອງປະຊຸມຂອງພະແນກອຸດສາຫະກຳ ແລະ ການຄ້າແຂວງບໍລິຄຳໄຊ ໂດຍທ່ານ ສີສະຫວາດ ທັນທະບຸນ ປະທານຄະນະກຳມະການເສດຖະກິດແຜນການ ແລະ ການເງິນ ສະພາປະຊາຊົນແຂວງ ແລະ ພະແນກອຸດສາຫະກຳ ແລະ ການຄ້າແຂວງ ໂດຍທ່ານ ໄກສອນ ຈັນສີນາ ຫົວໜ້າພະແນກອຸດສາຫະກຳ ແລະ ການຄ້າແຂວງ, ຊ້ອງໜ້າໂດຍທ່ານ ໃສຄຳ ທອງລັດ ຮອງປະທານສະພາປະຊາຊົນແຂວງ ພ້ອມດ້ວຍພະນັກງານວິຊາການທັງສອງຝ່າຍເຂົ້າຮ່ວມເປັນສັກຂີພິຍານ.

ບົດບັນທຶກການປະສານງານ ສະບັບນີ້ ມີທັງໝົດ 3 ໝວດ 6 ມາດຕາ ເຊິ່ງໄດ້ກຳນົດຫຼັກການ, ເນື້ອໃນ, ວິທີການປະສານງານ ແລະ ມາດຕະການຈັດ ຕັ້ງປະຕິບັດ ລະຫວ່າງ ຄະນະກໍາມະການເສດຖະກິດ ແຜນການ ແລະ ການເງິນ ກັບ ພະແນກອຸດສາຫະກຳ ແລະ ການຄ້າ ແຂວງ ກ່ຽວກັບການເຄື່ອນໄຫວວຽກງານ ແນໃສ່ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະ ລັດຖະບານ ໃນການຄຸ້ມຄອງ, ກວດກາ, ຊຸກຍູ້ສົ່ງເສີມ ແລະ ພັດທະນາຂະແໜງອຸດສາຫະກຳ ແລະ ການຄ້າ ໃຫ້ເຂັ້ມແຂງ, ມີປະສິດທິຜົນ, ໂປ່ງໃສ, ປະຢັດ ແລະ ສອດຄ່ອງກັບກົດໝາຍ ເພື່ອຮັບໃຊ້ໃຫ້ແກ່ການພັດທະນາເສດຖະກິດ-ສັງຄົມ. ການພົວພັນປະສານງານລະຫວ່າງ ຄະນະກໍາມະການເສດຖະກິດ ແຜນການ ແລະ ການເງິນ ກັບ ພະແນກອຸດສາຫະກຳ ແລະ ການຄ້າແຂວງ ປະຕິບັດຕາມຫຼັກການ ດັ່ງນີ້: ດຳເນີນໄປຕາມພາລະບົດບາດ, ຂອບເຂດສິດ ແລະ ໜ້າທີ່ ທີ່ໄດ້ກຳນົດໄວ້ໃນກົດໝາຍ ແລະ ລະບຽບ ການຂອງສອງພາກສ່ວນ, ຮັບປະກັນຄວາມເປັນເອກະພາບ ໃນການເຄື່ອນໄຫວວຽກງານວິຊາສະເພາະຂອງສອງພາກສ່ວນ, ສະໜອງ ແລະ ແລກປ່ຽນຂໍ້ມູນຂ່າວສານທາງການ ທີ່ຈຳເປັນ ເພື່ອນຳໃຊ້ເຂົ້າໃນການຈັດຕັ້ງເຄື່ອນໄຫວວຽກງານ ແລະ ແກ້ໄຂບັນຫາຕ່າງໆ ທີ່ພົວພັນເຖິງພາລະບົດບາດຂອງຄະນະກາມະການເສດຖະກິດແຜນການ ແລະ ການເງິນ ກັບ ພະແນກອຸດສາຫະກຳ ແລະ ການຄ້າແຂວງ ຢ່າງມີປະຊາທິປະໄຕ, ໂປ່ງໃສ, ຍຸຕິທໍາ ແລະ ຮັບປະກັນຄວາມ ຖືກຕ້ອງຊັດເຈນ ແລະ ສອດຄ່ອງກັບກົດໝາຍ.

ຄະນະກໍາມະການເສດຖະກິດ ແຜນການ ແລະ ການເງິນ ຕິດຕາມ, ຊຸກຍູ້ ສົມທົບກັບຄະນະກຳມະການສ້າງ ແລະ ປັບປຸງນິຕິກຳໃຕ້ກົດໝາຍຂອງແຂວງ ໃນຂົງເຂດອຸດສາຫະກຳ ແລະ ການຄ້າແຂວງ, ປະສານສົມທົບ ເພື່ອຊຸກຍູ້, ຕິດຕາມ ແລະ ກວດກາ ການຈັດຕັ້ງຜັນຂະຫຍາຍເນື້ອໃນກົດໝາຍ, ນິຕິກຳໃຕ້ກົດ ໝາຍ ແລະ ລະບຽບການອື່ນທີ່ປະກາດໃຊ້ແລ້ວ, ປະສານສົມທົບກັນໃນກວດກາການຈັດຕັ້ງປະຕິບັດ ບັນດາມາດຕະການຕ່າງໆ ທີ່ກຳນົດໃນມະຕິກອງປະຊຸມສະພາປະຊາຊົນແຂວງ, ຄຳສະເໜີຂອງປະຊາຊົນ ຫຼື ອົງການໃດໜຶ່ງ ທີ່ຍື່ນຫາສະພາປະຊາຊົນແຂວງ ທີ່ຕິດພັນກັບວຽກງານພະແນກອຸດ ສາຫະກຳ ແລະ ການຄ້າແຂວງ ແມ່ນຄະນະກຳມະການເສດຖະກິດ ແຜນການ ແລະ ການເງິນ ເປັນຜູ້ຄົ້ນຄວ້າເຫດຜົນສະພາບຄວາມເປັນຈິງ, ຈັດກອງປະຊຸມປຶກສາຫາລື, ແລກປ່ຽນຂໍ້ມູນ ແລະ ບົດຮຽນ ທີ່ເຫັນວ່າມີຄວາມຈຳເປັນຕາມການສະເໜີຂອງ ຝ່າຍໃດຝ່າຍໜຶ່ງ ເວລາມີການຈັດສຳມະນາ, ຝຶກອົບຮົມບັນດາເນື້ອໃນ ທີ່ພົວພັນກັບວຽກງານ ອຸດສາຫະກຳ ແລະ ການຄ້າ ທີ່ຝ່າຍໃດຝ່າຍໜຶ່ງຈັດຂຶ້ນ ຕ້ອງມີການເຊື້ອເຊີນເຊິ່ງກັນ ແລະ ກັນ ເຂົ້າຮ່ວມຕາມຄວາມເໝາະສົມ.

• Facebook
• Twitter
• Line