ເປີດການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ 2 ບ້ານຂອງເມືອງປາກຊັນ

ພິທີເປີດການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ບ້ານ ຫົງໄຊ ແລະ ບ້ານ ປາກກະດັນ ເມືອງປາກຊັນ ໄດ້ຈັດຂື້ນໃນວັນທີ 16 ກັນຍາ 2022 ເປັນປະທານໂດຍ ທ່ານ ພັນໂທ ບົວສອນ ກຽດຕະວົງ ຮອງຫົວໜ້າກອງບັນຊາການ ປກສ ເມືອງ ແລະ ທ່ານ ພັນໂທ ຮັກ ເທວາ ຮອງຫົວໜ້າກອງບັນຊາການ ປກສ ເມືອງ ມີເລຂາພັກບ້ານ-ນາຍບ້ານ, ຄະນະຮັບຜິດຊອບວຽກງານຂັ້ນ ປກສ ເມືອງ, ຫົວໜ້າ ປກສ ກຸ່ມ ເທດສະບານ 2, ພະນັກງານອາວຸໂສບໍານານ, ແຂກຖືກເຊີນ, ອຳນາດການຈັດຕັ້ງບ້ານ ຕະຫຼອດຮອດພໍແມ່ປະຊາຊົນພາຍໃນບ້ານ ເຂົ້າຮ່ວມ.

ໃນພິທີ ທ່ານ ເລຂາພັກບ້ານ-ນາຍບ້ານ ໄດ້ຂື້ນຜ່ານບົດສະຫຼຸບຫຍໍ້ ເຊີ່ງໄດ້ຍົກໃຫ້ເຫັນ ສະພາບ, ຈຸດພິເສດ ຂອງບ້ານ, ການປະກອບອາຊີບ ແລະ ການການດໍາລົງຊີວິດຂອງພໍ່ແມ່ປະຊາຊົນ, ສະພາບປະກົດການຫຍໍ້ທໍ້ພາຍໃນບ້ານ ແລະ ຜົນງານດ້ານຕ່າງໆ ທີ່ຄະນະພັກບ້ານ ແລະ ພໍ່ແມ່ປະຊາຊົນຍາດມາໄດ້. ໄລຍະຜ່ານມາຄະນະພັກ, ອໍານາດການຈັດຕັ້ງບ້ານແມ່ນໄດ້ເພີ່ມທະວີ ນໍາເອົາແນວທາງນະໂຍບາຍຂອງພັກ, ມະຕິຄໍາສັ່ງ, ຂໍ້ກໍານົດ, ກົດໝາຍຂອງລັດ ແລະ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ມາເຜີຍແຜ່ເຊື່ອມຊືມ ໃຫ້ແກ່ສະມາຊິກພັກ, ອໍານາດການຈັດຕັ້ງ, ປະຊາຊົນພາຍໃນບ້ານໄດ້ຮັບຮູ້ເຂົ້າໃຈ ແລະ ເຮັດໃຫ້ເຂົາເຈົ້າມີເເນວຄິດອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຍັງສາມາດສ້າງໃຫ້ແຕ່ລະຄອບຄົວຫຼຸດພົ້ນອອກຈາກຄວາມທຸກຍາກ ຕາມແນວທາງຂອງພັກວາງອອກ.

ຈາກນັ້ນຄະນະຮັບຜິດຊອບກໍ່ໄດ້ຜັດປ່ຽນກັນຂື້ນຜ່ານແຜນໃນການດໍາເນີນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ເຊີ່ງຈະໄດ້ລົງສົມທົບກັບອໍານາດການປົກຄອງບ້ານ ແລະ ພໍ່ແມ່ປະຊາຊົນ ເກັບກໍາຂໍ້ມູນການເຄື່ອນໄຫວຂອງປະຊາຊົນ, ການເໜັງຕີງຂອງພົນລະເມືອງ, ກວດກາປື້ມສໍາມະໂນຄົວ, ຕິດຕາມກວດກາ, ຕີລາຄາ, ປະເມີນຄືນຄອບຄົວທີ່ສາມາດສ້າງເປັນຄອບຄົວຕົວແບບດ້ານວຽກງານປ້ອງກັນຊາດ-ປ້ອງກັນຄວາມສະຫງົບ, ກວດກາເກັບກໍາບັນດາເປົ້າໝາຍ, ສຶກສາອົບຮົມ ບັນດາເປົ້າໝາຍ, ບຸກຄົນ, ພໍ່ແມ່ປະຊາຊົນ ແລະ ຄອບຄົວ ທີ່ເປັນຕົ້ນເຫດກໍ່ໃຫ້ບ້ານບໍ່ມີຄວາມສະຫງົບ ເພື່ອຊອກຫາວິທີປັບປຸງແກ້ໄຂໃຫ້ຖືກຕ້ອງຕາມຫຼັກການ, ທັງເປັນການ ຊຸກຍູ້, ສົ່ງເສີມ, ປຸກລະດົມ ໃຫ້ພໍ່ແມ່ປະຊາຊົນ ທຸກຄົນ, ທຸກຄອບຄົວ ເປັນເຈົ້າການຢ່າງຕັ້ງໜ້າເຂົ້າໃນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເຮັດໃຫ້ບ້ານມີຄວາມສະຫງົບ, ມີຄວາມເປັນລະບຽບຮຽບຮ້ອຍນັບມື້ນັບດີຂື້ນ.

ພາຍຫຼັງສໍາເລັດບາດກ້າວດໍາເນີນແລ້ວທາງຄະນະຮັບຜິດຊອບ ຈະໄດ້ສະຫຼຸບສັງລວມຄືນຄອບຄົວ ທີ່ຄົບຕາມ 4 ມາດຖານ, 8 ເງື່ອນໄຂ ເພື່ອສະເໜີຂັ້ນເທິງອະນຸມັດອອກໃບຢັ້ງຢືນໃຫ້ແກ່ຄອບຄົວ ແລະ ບ້ານປ້ອງກັນຄວາມສະຫົງບດີ, ສໍາລັບຄອບຄົວທີ່ບໍ່ຄົບຕາມມາດຖານ, ເງື່ອນໄຂ ແມ່ນຈະໄດ້ສືບຕໍ່ສືກສາອົບຮົມ ໃຫ້ມີການເຄື່ອນໄຫວດໍາລົງຊີວິດ, ປະກອບອາຊີບ, ທໍາມາຫາກິນຢ່າງຖືກຕ້ອງ, ມີສະຕິເຄົາລົບລະບຽບກົດໝາຍ, ຮັກສາໄດ້ມູນເຊື້ອ ແລະ ຮີດຄອງປະເພນີອັນດີງາມຂອງຊາດ.

• Facebook
• Twitter
• Line