ສະເຫຼີມສະຫຼອງປີສະມັກຄີມິດຕະພາບ ລາວ – ຫວຽດນາມ

ພີທີສະເຫຼີມສະຫຼອງ ວັນສ້າງຕັ້ງສາຍພົວພັນການທູດລາວ – ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ – ຫວຽດນາມ ຄົບຮອບ 45 ປີ ທີ່ແຂວງບໍລິຄຳໄຊ ສປປ ລາວ ໄດ້ຈັດຂຶ້ນໃນຕ້ອນເຊົ້າ ຂອງວັນທີ 8 ກັນຍາ 2022 ຢູ່ສະໂມສອນໃຫຍ່ຂອງແຂວງ, ຝ່າຍແຂວງບໍລິຄໍາໄຊ ສປປ ລາວ ໃຫ້ກຽດເຂົ້າຮ່ວມໂດຍ ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງບໍລິຄໍາໄຊ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 11 ແລະ ຝ່າຍ ສສ ຫວຽດນາມ ໃຫ້ກຽດເຂົ້າຮ່ວມໂດຍ ທ່ານ ຮວ່າງຈຸງຢູ່ງ ກໍາມະການຄະນະບໍລິຫານງານສູນກາງພັກກອມມູນິດຫວຽດນາມ ເລຂາພັກແຂວງ ປະທານສະພາປະຊາຊົນແຂວງ ຫົວໜ້າຄະນະຜູ້ແທນສະພາແຫ່ງຊາດ ປະຈໍາແຂວງຮ່າຕິ້ງ, ທ່ານ ຮວ່າງເຫງຍຫຽວ ຮອງເລຂາພັກແຂວງ ຮອງປະທານຄະນະກຳມະການປະຊາຊົນແຂວງເຫງະອານ, ທ່ານ ຫວູແອັງຊຸງ ກົງສູນໃຫຍ່ຫວຽດນາມ ປະຈຳແຂວງສະຫວັນນະເຂດ ແລະ ທ່ານ ພັອ ຟ້າມຮຸ່ງຖັງ ປະທານສະພາຄະນະມົນຕີກຸ່ມບໍລິສັດຮ່ວມມືເສດຖະກິດໂກເອໂກ ຕາງໜ້າຄະນະກອງບັນຊາການທະຫານເຂດ 4, ມີທ່ານ ບົວເງິນ ຊາພູວົງ ຮອງປະທານສະມາຄົມມິດຕະພາບລາວ – ຫວຽດນາມ ຂັ້ນສູນກາງ, ການນຳແຂວງບໍລິຄໍາໄຊ, ຜູ້ແທນຂອງແຕ່ລະຄະນະ, ພະນັກງານນັກຮົບປະຕີວັດ, ພະແນກການ, ຊາວໜຸ່ມ ແລະ ເຍົາວະຊົນ ແຂວງບໍລິຄຳໄຊ ເຂົ້າຮ່ວມ.

ໃນພິທີ ທ່ານ ປອ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ເຈົ້າແຂວງ ບໍລິຄໍາໄຊ ໄດ້ໃຫ້ກຽດຂຶ້ນກ່າວຄໍາປະໃສ ໂດຍສະຫາຍໄດ້ຍົກໃຫ້ເຫັນເຖິງສາຍພົວພັນອັນດູດດື່ມລະຫວ່າງສອງຊາດ, ປະຊາຊົນສອງປະເທດ ລາວ – ຫວຽດນາມ ອ້າຍນ້ອງ, ຄວາມສາມັກຄີແບບພິເສດ ແລະ ພົວພັນຮ່ວມມືຮອບດ້ານ ທີ່ຍາມໃດກໍ່ມີການພົວພັນຮ່ວມມື, ຊ່ວຍເຫຼືອກັນ ຢ່າງສະໜິດແໜ້ນ ຍາກທີ່ຈະຕັດຂາດອອກຈາກກັນໄດ້, ເຂົ້າເມັດຫັກ, ຜັກເສັ້ນໜຶ່ງ ກໍ່ບິແບ່ງປັນກັນກິນ, ຕໍ່ສູ້ໃນຂຸມຄອງອັນດຽວກັນ ຕ້ານສັດຕູໂຕດຽວກັນ.

ໃນຕອນໜຶ່ງ ສະຫາຍ ປອ ກອງແກ້ວ ໄຊສົງຄາມ ໄດ້ກ່າວວ່າ “ ຜ່ານໄລຍະເວລາກວ່າເຄິ່ງສັດຕະວັດ ແຫ່ງການຮ່ວມສໍາພັນສູ້ຮົບມີໄຊນັ້ນ ຄວາມຜູກພັນດ້ວຍໄມຕີຈິດອັນດູດດື່ມ ແລະ ຄວາມຮັກແພງເຊື້ອໝັ້ນຖານອ້າຍນ້ອງທີ່ແທ້ຈິງ, ຄວາມສາມັກຄີແບບພິເສດຫາຍາກ ແບບໜື່ງບໍ່ມີສອງນັ້ນ ໄດ້ຜ່ານການທົດສອບນາໆປະການດ້ວຍເລືອດເນື້ອນັກຮົບ 2 ປະເທດຈົນນັບບໍ່ຖ້ວນ ຈົນກາຍເປັນມໍລະດົກລວມອັນລໍ້າຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວ ຂອງສອງປະເທດ, ເປັນໜື່ງໃນປັດໄຈຕັດສິນໄຊຊະນະ. ອັນພົ້ນເດັ່ນ ແລະ ມີຄວາມໝາຍເປັນຕາຍ ແມ່ນໄຊຊະນະໃນລະດູບານໃໝ່ ປີ 1975 ເຊິ່ງໄດ້ເຮັດໃຫ້ພາລະກິດທ້ອນໂຮມປະເທດຫວຽດນາມເປັນອັນໜຶ່ງອັນດຽວໄດ້ບັນລຸຜົນສຳເລັດ, ສ່ວນຢູ່ປະເທດລາວການປະຕິວັດຊາດ ປະຊາທິປະໄຕ ໄດ້ສີ້ນສຸດລົງ ໂດຍການສົມທົບແໜ້ນສາມບາດຄ້ອນຍຸດທະສາດ ກ້າວເຂົ້າຢຶດອຳນາດມາສູ່ກໍາມືຂອງປະຊາຊົນໃນທົ່ວປະເທດ ແລະ ສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975 ”.

ທ່ານເຈົ້າແຂວງບໍລິຄຳໄຊ ຍັງໄດ້ກ່າວຕື່ມອີກວ່າ ໃນຂະບວນການສະເຫຼີມສະຫລອງສອງວັນປະຫວັດສາດ ຫຼື ປີມິດຕະພາບລາວ – ຫວຽດນາມ ແລະ ຫວຽດນາມ-ລາວ ປີ 2022, ພວກເຮົາໄດ້ເຫັນເຖິງຄວາມກະຕືລືລົ້ນຂອງປະຊາຊົນຂອງສອງຊາດລາວ – ຫວຽດນາມ, ພວກເຮົາໄດ້ເຫັນເຖິງຫຼາຍບົດເພງ, ບົດກາບກອນ, ບົດປະພັນ, ບົດສົນທະນາ, ບົດປາຖະກະຖາ ທີ່ເຕັມໄປດ້ວຍເນື້ອໃນອັນເລິກເຊິ່ງ, ເຕັມໄປດ້ວຍໄມຕີຈິດມິດຕະພາບ ທີ່ໄດ້ສະແດງອອກມາ ເຕີມເຕັມໃຫ້ແກ່ບັນດາບົດເພງ, ບົດປະພັນ ທີ່ເຄີຍມີມາເປັນເວລາຫຼາຍສີບປີ, ໄດ້ມະໂນພາບເຖິງມິດຕະພາບອັນຍິ່ງໃຫຍ່, ຄວາມສາມັກຄີພິເສດ ທີ່ຫາຍາກຂອງສອງພັກ – ສອງລັດ ແລະ ປະຊາຊົນສອງຊາດເຮົາ ທີ່ມີຕໍ່ກັນນັ້ນ, ສິ່ງນີ້ມັນສະແດງອອກຢ່າງມີຊີວິດຊີວາ ຈາກສ່ວນເລິກຂອງວິນຍານ ຂອງປະຊາຊົນເຮົາຢ່າງແທ້ຈິງ, ດັ່ງບົດກອນອໍາມະຕະຂອງ ທ່ານປະທານ ໂຮ່ຈີມີນ ຜູ້ນຳທີ່ຍິ່ງໃຫຍ່ໄດ້ເວົ້າວ່າ: “ ຮັກຫອມກັນໝາຍໝັ້ນ, ຫຼາຍສັນພູກໍປີນໄຕ່, ຫຼາຍນ້ຳໃຫຍ່ ແລະ ໂຄກຄ້ອຍ, ຂວາງກັ້ນກໍ່ດຸ່ງໄປ ສອງຊາດລາວ – ຫວຽດໄດ້ ຝັ່ງຄວາມຮັກໄວ້ໃນໃຈ, ຮົງຫາທັງແມ່ຂອງ ບໍ່ເລິກປູນປານໄດ້ ”, ທ່ານປະທານ ໄກສອນ ພົມວິຫານ ໄດ້ພັນລະນາເຖິງສາຍພົວພັນລາວ – ຫວຽດ ທີ່ວ່າ: “ ເຖິງພູຈະຖືກເຊາະເຈື່ອນ, ແມ່ນໍ້າລໍາເຊຈະເຫືອດແຫ້ງ, ແຕ່ສາຍພົວພັນມິດຕະພາບລາວ – ຫວຽດນາມ ຈະໝັ້ນຄົງທະນົງແກ່ນຊົ່ວກາລະນານ ”, ທ່ານປະທານ ສຸພານຸວົງ ໄດ້ພັນລະນາເຖິງສາຍພົວພັນລາວ – ຫວຽດນາມ ໄວ້ວ່າ: “ ສາຍພົວພັນມິດຕະພາບຖານອ້າຍນ້ອງ ລະຫວ່າງປະຊາຊົນລາວ ແລະ ປະຊາຊົນຊາວຫວຽດນາມ ແມ່ນຍິ່ງໃຫຍ່ມະຫາສານ ເຊິ່ງບໍ່ມີບົດເພງ ແລະ ບົດກະວີໃດໆ ທີ່ຖືວ່າມ່ວນທີ່ສຸດຈະພັນລະນາໃຫ້ໝົດໄດ້, ມິດຕະພາບດັ່ງກ່າວສູງກວ່າພູຜາ, ຍາວຍິ່ງກວ່າແມ່ນ້ຳ, ກວ້າງຍິ່ງກວ່າທະເລຫຼວງ, ງາມຍິ່ງກວ່າເດືອນເພັງ, ຫອມຫວນຍິ່ງກວ່າດອກໄມ້ທີ່ຫອມທີ່ສຸດ”.

ຫຼັງຈາກນັ້ນ ທ່ານ ຮວ່າງຈຸງຢູ່ງ ກໍາມະການຄະນະບໍລິຫານງານສູນກາງພັກກອມມູນິດຫວຽດນາມ ເລຂາພັກແຂວງ ປະທານສະພາປະຊາຊົນແຂວງ ຫົວໜ້າຄະນະຜູ້ແທນສະພາແຫ່ງຊາດ ປະຈໍາແຂວງຮ່າຕິງ ຕາງໜ້າໃຫ້ກັບຄະນະຜູ້ແທນຝ່າຍ ສສ ຫວຽດນາມ ໄດ້ໃຫ້ກຽດຂຶ້ນກ່າວຄໍາປະໃສ ທີ່ຍົກໃຫ້ເຫັນສາຍພົວພັນຮ່ວມມື ແລະ ຄວາມສາມັກຄີແບບພິເສດ ທີ່ມີມາແຕ່ດົນນານ, ການກໍາເນີດ ແລະ ກາຍຂະຫຍາຍຕົວຂອງພັກກອມມິດອິນດູຈີນ ເຊິ່ງເປັນຕົ້ນກໍາເນີດຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ, ພາຍໃຕ້ການນໍາພາຂອງພັກກອມມູນິດອິນດູຈີນ, ຂະບວນການຕໍ່ສູ້ຂອງປະຊາຊົນສອງປະເທດໄດ້ແຜ່ຂະຍາຍອອກເປັນວົງກວ້າງ, ນໍ້າໃຈມິດສະຫາຍອ້າຍນ້ອງ ແລະ ຈິດໃຈແຫ່ງການປະຕິວັດອັນແຮງກ້າຂອງປະຊາຊົນສອງປະເທດ ໄດ້ຊ່ວຍໃຫ້ສອງຊາດພວກເຮົາ ຍາດໄດ້ອໍານາດມາສູ່ມືຂອງປະຊາຊົນສອງຊາດຫວຽດນາມ – ລາວອ້າຍນ້ອງ, ເມື່ອສອງປະເທດຍາດໄດ້ໄຊຊະນະຢ່າງສົມບູນ, ສາຍພົວພັນລະຫວ່າງສອງປະເທດໄດ້ກ່າວເຂົ້າສູ່ໜ້າປະຫວັດສາດອັນໃໝ່, ການຮ່ວມສໍາພັນສູ້ຮົບຕ້ານສັດຕູໂຕດຽວກັນ ໄດ້ກາຍມາເປັນການຮ່ວມມືຮອບດ້ານໃນທຸກຂົງເຂດ, ພາຍໃຕ້ການນໍາຂອງສອງພັກ, ປະຊາຊົນສອງປະເທດໄດ້ຂ້າມຜ່ານອຸປະສັກຄວາມຫຍຸ້ງຍາກ, ສິ່ງທ້າທາຍນາໆປະການ ແລະ ໄດ້ໃຫ້ການຊ່ວຍເຫຼືອເຊິ່ງກັນ ແລະ ກັນ ໃນການປັບປຸງບູລະນະຜົນກະທົບຈາກສົງຄາມ, ພ້ອມກັນປົກປັກຮັກສາ ແລະ ສ້າງສາພັດທະນາປະເທດຊາດສັງຄົມນິຍົມ.

ໃນຕອນທ້າຍ ຍັງໄດ້ມີພິທີມອບໃບຍ້ອງຍໍຂອງແຂວງບໍລິຄຳໄຊ ໃກ້ແກ່ກົມກອງ ແລະ ບຸກຄົນ ຂອງ ສສ ຫວຽດນາມ ທີ່ມີຜົນງານດີເດັ່ນເຄື່ອນໄຫວວຽກງານການຕ່າງປະເທດໃນການສະເຫຼີມສະຫຼອງປີສາມັກຄີມິດຕະພາບ ລາວ – ຫວຽດນາມ ໃນໄລຍະ 5 ປີ ຜ່ານມາ ( 2017 – 2022 ), ເຊີ່ງປະກອບດ້ວຍ: ແຂວງຮ່າຕິ້ງ ມີ 16 ກົມກອງ ແລະ 30 ທ່ານ, ແຂວງເຫງະອານ 9 ກົມກອງ ແລະ 6 ທ່ານ, ສະຖານກົງສຸນໃຫຍ່ຫວຽດນາມ ປະຈໍາແຂວງສະຫວັນນະເຂດ 1 ກົມກອງ ແລະ 4 ທ່ານ, ກອງບັນຊາການທະຫານເຂດ 4 ປະກອບມີ 2 ກົມກອງ ແລະ 2 ທ່ານ, ໃຫ້ກຽດມອບໂດຍ ທ່ານ ປອ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ເຈົ້າແຂວງບໍລິຄໍາໄຊ.

• Facebook
• Twitter
• Line