ເຈົ້າໜ້າທີ່ ປກສ ເມືອງທ່າພະບາດ ກັກຜູ້ຖືກຫາ 04 ຄົນ ພ້ອມຂອງກາງ ຄັນຊາອັດແທ່ງ 1.600 ກິໂລກຼາມ

ເຈົ້າໜ້າທີ່ພະແນກຕໍາຫຼວດ ປກສ ເມືອງທ່າພະບາດ ແຂວງບໍລິຄໍາໄຊ ໃຫ້ຮູ້ວ່າ: ໃນຕອນເຊົ້າວັນທີ 06 ກັນຍາ 2022 ໄດ້ທຳການລັດກວດລົດບັນທຸກຄັນໜຶ່ງ ເປັນລົດບັນທຸກ 06 ລໍ້, ຍີ່ຫໍ້ສະກັດໂຊເວີສີແດງ ໝາຍເລກທະບຽນ ອຸດົມໄຊ ບກ 2636, ຜ່ານການກວດຄົ້ນ ພົບເຫັນຄັນຊາອັດແທ່ງຊຸກເຊື່ອງໄວ້ໃນລົດຄັນດັ່ງກ່າວ ຈຳນວນ 90 ແກັດ ມີນ້ຳໜັກ 1.600 ກິໂລກຼາມທີ່ປະປົນມານໍາທູບຫອມ, ສາມາດກັກຕົວຜູ້ຖືກສົງໃສໄດ້ 04 ຄົນ ຄື: ທ້າວ ຂາວ, ທ້າວ ເດ, ທ້າວ ແຂກ ແລະ ທ້າວ ນ້ອຍ ເຊິ່ງເປັນຄົນບ້ານໂພນຈະເລີນ ເມືອງປາກກະດິງ ແຂວງບໍລິຄໍາໄຊ ມາດໍາເນີນຄະດີຕາມລະບຽບກົດໝາຍ.

ຜ່ານການສືບສວນ – ສອບສວນ ພວກກ່ຽວທັງ 04 ຄົນໄດ້ໃຫ້ການຮັບສາລະພາບໃນເບື້ອຕົ້ນວ່າ: ເວລາ 15:00 ໂມງ ຂອງວັນທີ 5 ກັນຍາ 2022 ໄດ້ເອົາຄັນຊາຈຳນວນດັ່ງກ່າວ ຂຶ້ນລົດບັນທຸກ 6 ລໍ້ສີແດງ ໝາຍເລກທະບຽນ ອຸດົມໄຊ ບກ 2636 ເປັນລົດຂອງ ທ້າວ ກໍ (ນາມສົມມຸດ) ຢູ່ບ້ານ ໂພນຈະເລີນ ເມືອງ ປາກກະດິງ ແຂວງ ບໍລິຄຳໄຊ.

ຮອດເວລາ 23 ໂມງຂອງວັນດຽວກັນ ພວກກ່ຽວທັງ 04 ຄົນໄດ້ຂັບຂີ່ລົດຄັນດັ່ງກ່າວ ມຸ້ງໜ້າມາທາງນະຄອນຫຼວງວຽງຈັນ ໂດຍແມ່ນທ້າວ ນ້ອຍ ແລະ ທ້າວ ຂາວ ປ່ຽນກັນຂັບ, ເມື່ອມາຮອດປ້ອມກວດກາທາງແບ່ງບ້ານທວາຍ ເມືອງທ່າພະບາດ ແຂວງ ບໍລິຄໍາໄຊ ເຈົ້າໜ້າທີ່ປະຈໍາຢູ່ປ້ອມກວດກາ ໄດ້ລັດລົດເພື່ອຂໍອະນຸຍາດທໍາການກວດກາ ຈື່ງພົບເຫັນຢາເສບຕິດ ປະເພດຄັນຊາອັດແທ່ງຊຸກເຊື່ອງປະປົນຢູ່ກັບທູບຫອມ ຈໍານວນ 90 ແກັດ, ນໍ້າໜັກ 1.600 ກິໂລກຼາມ ແລະ ໄດ້ກັກຕົວພວກກ່ຽວ 04 ຄົນ ພ້ອມຂອງກາງຈໍານວນດັ່ງກ່າວມາດຳເນີນຄະດີຕາມລະບຽບກົດໝາຍ.

ປະຈຸບັນຄະດີແມ່ນ ຢູ່ໃນຂັ້ນຕອນການສືບສວນ – ສອບສວນ ຂະຫຍາຍຜົນຫາພັກພວກຮ່ວມຂະບວນການ ມາດຳເນີນຄະດີຕາມລະບຽບກົດໝາຍ.

• Facebook
• Twitter
• Line