ຮອງເຈົ້າແຂວງ ຕ້ອນຮັບຄະນະຈັດຕັ້ງ ແຂວງຮ່າຕິ້ງ

ໃນວັນທີ 17 ສິງຫາ 2022 ຢູ່ຫ້ອງຮັບຮອງຂອງແຂວງ ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ ສປປ ລາວ ພ້ອມດ້ວຍຄະນະ ໄດ້ຕ້ອນຮັບການມາຢ້ຽມຢາມ ທ່ານ ຫວໍຮົ່ງຫ້າຍ ຄະນະປະຈຳພັກແຂວງ, ຫົວໜ້າຄະນະຈັດຕັ້ງ ແຂວງຮ່າຕິ້ງ ສສ ຫວຽດນາມ ພ້ອມດ້ວຍຄະນະ ໃນໂອກາດທີ່ມາຢ້ຽມຢາມ ແລະ ເຮັດວຽກ ຢູ່ແຂວງບໍໍລິຄຳໄຊ.

ທ່ານ ຫວໍຮົ່ງຫ້າຍ ໄດ້ລາຍງານຈຸດປະສົງໃນຄັ້ງນີ້ວ່າ ເພື່ອການມາຢ້ຽມຢາມ ແລະ ຮ່ວມກອງປະຊຸມແລກປ່ຽນບົດຮຽນຮ່ວມກັນ ລະຫວ່າງ ຄະນະຈັດຕັ້ງແຂວງບໍລິຄໍາໄຊ ແລະ ຄະນະຈັດຕັ້ງແຂວງຮ່າຕິ້ງ.

ໂອກາດນີ້ ທ່ານ ຄຳແຫວນ ປັນຍານຸວົງ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງ ຕໍ່ການມາຢ້ຽມຢາມເຮັດວຽກ ຢູ່ແຂວງບໍລິຄຳໄຊໃນຄັ້ງນີ້ ແລະ ໄດ້ລາຍງານຫຍໍ້ກ່ຽວກັບບັນດາວຽກງານທີ່ພົ້ນເດັ່ນຂອງແຂວງ ເປັນຕົ້ນແມ່ນສະພາບລວມ, ການພັດທະນາເສດຖະກິດ – ສັງຄົມ, ວິໄສທັດໃນການພັດທະນາໃນຕໍ່ໜ້າ ແລະ ວຽກງານອື່ນໆ.

ພ້ອມນັ້ນ ທ່ານຮອງເຈົ້າແຂວງ ຍັງໄດ້ອວຍພອນໃຫ້ກອງປະຊຸມແລກປ່ຽນບົດຮຽນຮ່ວມກັນ ລະຫວ່າງສອງແຂວງ ອວຍພອນໃຫ້ຄວາມສາມັກຄີມິດຕະພາບ ແລະ ການພົວພັນຮ່ວມມືພິເສດຮ້ອບດ້ານ ລະຫວ່າງສອງປະເທດ ລາວ – ຫວຽດນາມ ກໍ່ຄືແຂວງບໍລິຄຳໄຊ – ແຂວງຮ່າຕິ້ງ ນັບມື້ນັບມີຄວາມໝັ້ນຄົງທະນົງແກ່ນຊົ່ວກາລະນານ.

• Facebook
• Twitter
• Line