ເມືອງປາກກະດິງ ສ້າງກິດຈະກຳ ສະເຫຼີມສະຫຼອງປີສາມັກຄີ ລາວ – ຫວຽດນາມ

ກິດຈະກໍາແຂ່ງຂັນກິລາ ຊິງຂັນທ່ານເຈົ້າເມືອງປາກກະດິງ ເພື່ອສະເຫຼີມສະຫຼອງວັນເຊັນສັນຍາມິດຕະພາບ ແລະ ການຮ່ວມມື ລາວ – ຫວຽດນາມ ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ – ຫວຽດນາມ ຄົບຮອບ 60 ປີ ໄດ້ຈັດຂຶ້ນໃນຕອນແລງຂອງວັນທີ 16 ສິງຫາ 2022 ຢູ່ເດີ່ນບານເຕະໝູ່ເຮົາ ບ້ານວຽງຄໍາ ໂດຍໃຫ້ກຽດເປັນປະທານຂອງ ທ່ານ ພູເຂົາເງິນ ອິນທະວົງ ເຈົ້າເມືອງປາກກະດິງ, ທ່ານ ພັທ ເຈິນຮວາງກວ່າງ ຕາງໜ້າບໍລິສັດຢາງພາລາໂກເອັກໂກ່ COECCO ແຂວງບໍລິຄໍາໄຊ, ມີສະມາຄົມນັກທຸລະກິດຊາວຫວຽດນາມ, ການນໍາຂອງເມືອງ ແລະ ພໍ່ຄ້າຊາວຂາຍ ເຂົ້າຮ່ວມ.

ການແຂ່ງຂັນກິລາໃນຄັ້ງນີ້ ມີ 2 ປະເພດກິລາ ຄື: ກິລາບານເຕະ ແລະ ກິລາເປຕັງ ໂດຍກິລາບານເຕະ ມີ 6 ທີມເຂົ້າຮ່ວມ, ໃນນັ້ນ ມີທີມການນຳເມືອງ, ທີມບໍລິສັດຢາງພາລາໂກເອັກໂກ່, ທີມສະມາຄົມນັກທຸລະກິດຊາວຫວຽດນາມ, ທີມຮາກຖານປາກກດິງ, ຮາກຖານທົ່ງນາມີ, ຮາກຖານວຽງຄຳ ແລະ ຮາກຖານປາກທອນ.

ການແຂ່ງຂັນ ໄດ້ດຳເນີນໄປດ້ວຍບັນຍາກາດຟົດຟື້ນເບີກບານມ່ວນຊື່ນ ທ່າມກາງສຽງເຊຍໃຫ້ກຳລັງໃຈຂອງແຕ່ລະທີມ, ນັກກິລາຫຼິ້ນດ້ວຍຄວາມສາມັກຄີ, ມິດຕະພາບ ແລະ ຄວາມຮັກແພງເຊິ່ງກັນ ແລະ ກັນ. ຜົນການແຂ່ງຂັນ  ທີມຮາກຖານເຂດປາກທອນ ໄດ້ຮັບຂັນຄອງແຊັມໄປຄອງ.

ສ່ວນກິລາເປຕັງ ມີ 16 ທີມເຂົ້າຮ່ວມແຂ່ງຂັນ, ຜົນການແຂ່ງຂັນ ທີ 1 ໄດ້ແກ່ທີມນັກທຸລະກິດບ້ານປາກກະດິງ ໄດ້ຮັບຂັນແຊັມໄປຄອງ, ທີ 2 ໄດ້ແກ່ທີມຫ້ອງການສຶກສາ 1 ແລະ ທີ 3 ໄດ້ແກ່ທີມຫ້ອງການສຶກສາ 2.

• Facebook
• Twitter
• Line