ອົງການກາແດງແຂວງບໍລິຄຳໄຊ ລົງເຜີຍແຜ່ສິດ, ໜ້າທີ່, ພາລະບົດບາດ ແລະ ກົດໝາຍຂອງອົງການກາແດງລາວ

ໃນວັນທີ 10 ສິງຫາ 2022 ຢູ່ຫ້ອງປະຊຸມຊັ້ນ III ຫ້ອງວ່າການເມືອງວຽງທອງ ແຂວງບໍລິຄຳໄຊ ອົງການກາແດງແຂວງ ໄດ້ລົງມາເຜີ່ຍແຜເອກະສານ ພາລະບົດບາດກາແດງ ແລະ ກົດໝາຍວ່າດ້ວຍວຽກງານກາແດງລາວ ໂດຍເປັນກຽດເຂົ້າຮ່ວມຂອງທ່ານ ບົວພັນ ອິນຄຳມະວົງ ຮອງເຈົ້າເມືອງ ວຽງທອງ, ທ່ານ ນາງ ວັນເພງ ໄຊສົງຄາມ ຫົວໜ້າອົງການກາແດງແຂວງບໍລິຄຳໄຊ, ມີຫົວໜ້າຫ້ອງການ, ຮອງຫ້ອງການ ພ້ອມພະນັກງານຫຼັກແຫຼ່ງອ້ອມຂ້າງເມືອງ ເຂົ້າຮ່ວມ.

ໃນກອງປະຊຸມ ຄະນະຮັບຜິດຊອບອົງການກາແດງແຂວງໄດ້ຜັດປ່ຽນກັນຂື້ນເຜີ່ຍແຜ່ເອກະສານຕ່າງໆ ໃຫ້ຜູ້ເຂົ້າຮ່ວມໄດ້ຮັບຮູ້ ເປັນຕົ້ນແມ່ນ: ເອກະສານຄວາມຮູ້ກ່ຽວກັບວຽກງານກາແດງ ໃນວຽກງານຂະບວນການຕ່າງໆ ຂອງກາແດງ, ເຄື່ອງໝາຍມະນຸດສະທຳ, 7 ຫຼັກການຂອງຂະບວນການກາແດງ, ປະຫວັດຄວາມເປັນມາ, ປະຫວັດການເຄື່ອນໄຫວວຽກງານກາແດງລາວ, ພາລະບົດບາດຂອງຄະນະກຳມະການກາແດງສາກົນ, ພາລະບົດບາດຂອງສະຫະພັນກາແດງ ແລະ ຊິກວົງເດືອນແດງສາກົນ, ອົງການກາແດງ ເຮັດພາລະບົດບາດ ໃຫ້ການຊ່ວຍເຫຼືອແກ່ຜູ້ທີ່ໄດ້ຮັບເຄາະຮ້າຍຈາກທຳມະຊາດ ແລະ ເຫດການທີ່ມະນຸດສ້າງຂື້ນ, ໃຫ້ການຊ່ວຍເຫຼືອທະຫານ ແລະ ພົນລະເຮືອນທີ່ຖືກບາດເຈັບ ໃນສະພາວະສົງຄາມ.

ນອກນັ້ນ, ຍັງໄດ້ຜ່ານກົດໝາຍວ່າດ້ວຍວຽກງານກາແດງລາວ ເຊີ່ງກົດໝາຍສະບັບນີ້ ປະກອບມີ: 10 ພາກ, 5 ໝວດ, 65 ມາດຕາ ທີ່ໄດ້ກໍານົດຫຼັກການ ລະບຽບການ ແລະ ມາດຕະການກ່ຽວກັບການຄຸ້ມຄອງ, ຕິດຕາມ, ກວດກາວຽກງານກາແດງລາວ ເພື່ອເຮັດໃຫ້ວຽກງານດັ່ງກ່າວ ມີຄວາມໜັກແໜ້ນເຂັ້ມແຂງ, ມີປະສິດທິພາບ, ປະສິດທິຜົນ ແນ່ໃສ່ຮັບປະກັນດ້ານມະນຸດສະທໍາ, ປະກອບສ່ວນເຂົ້າໃນການຊ່ວຍເຫຼືອສັງຄົມໃຫ້ທັນກັບສະພາບການ ໃນໄລຍະປົກປັກຮັກສາ ແລະ ພັດທະນາປະເທດຊາດ.

• Facebook
• Twitter
• Line