ເປີດບັ້ນສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ທີ່ບ້ານນ້ຳອ້ອນ

ໃນຕອນເຊົ້າຂອງວັນທີ 11 ສິງຫາ 2022 ຢູ່ຫ້ອງການບ້ານນ້ຳອ້ອນ ເມືອງໄຊຈຳພອນ ແຂວງບໍລິຄຳໄຊ ໄດ້ຈັດພິທີເປີດສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ໂດຍການເຂົ້າຮ່ວມເປັນປະທານຂອງທ່ານ ກອງສີ ໄຊຍະວົງ ຮອງເຈົ້າເມືອງໄຊຈພອນ, ມີທ່ານ ພັທ ຄຳສາວ ອຸດົມໄຊ ຮອງກອງບັນຊາການ ປກສ ເມືອງ, ມີເລຂາພັກກຸ່ມບ້ານນ້ຳອ້ອນ, ເລຂາພັກບ້ານ, ນາຍບ້ານວັງບານ, ບ້ານໂພນຄຳ ແລະ ພໍ່ແມ່ປະຊາຊົນບ້ານນ້ຳອ້ອນ ເຂົ້າຮ່ວມ.

ໃນພິທີ ທ່ານ ພັທ ຄໍາສາວ ອຸດົມໄຊ ໄດ້ຜ່ານແຜນການສ້າງບ້ານດັ່ງກ່າວ ເຊີ່ງທ່ານໄດ້ໃຫ້ຮູ້ການຫັນເອົາແນວທາງປ້ອງກັນຊາດປ້ອງກັນຄວາມສະຫງົບ ລົງສູ່ຮາກຖານທ້ອງຖີ່ນ ເປັນເຈົ້າການຕໍ່ວຽກງານປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອບຂອງສັງຄົມ, ມີສະຕິເຄົາລົບລະບຽບກົດໝາຍ ແລະ ການຮັກສາຮິດຄອງປະເພນີ ອັນດີງານຂອງຊາດ, ຂອງເຜົ່າ ທັງເປັນການສະກັດກັ້ນຕ້ານປະກົດການຫຍໍ້ທໍ້ຕ່າງໆ ຢູ່ໃນສັງຄົມ.

ການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ເປັນວຽກງານຍຸດທະສາດໜຶ່ງທີ່ສຳຄັນ ແລະ ຈຳເປັນຮີບດ່ວນຂອງພັກ – ລັດ ໃນການສ້າງຄວາມເຂັ້ມແຂງໃຫ້ແຕ່ລະຄອບຄົວ, ບ້ານ ໃຫ້ຄວາມສະຫງົບ ຮັບປະກັນໃນການຈັດຕັ້ງປະຕິບັດແນວທາງປ້ອງກັນຄວາມສະຫງົບທົ່ວປວງຊົນຮອບດ້ານຢູ່ຂັ້ນທ້ອງຖິ່ນ ຮາກຖານຢ່າງເປັນລະບົບຕໍ່ເນື່ອງ ແນ່ໃສ່ສະກັດກັ້ນ, ຕ້ານປະກົດການຫຍໍ້ທໍ້ຕ່າງໆ ໃຫ້ຫລຸດໜ້ອຍຖອຍລົງເທື່ອລະກ້າວ, ພ້ອມທັງສືບຕໍ່ຈັດຕັ້ງປະຕິບັດວຽກງານດັ່ງກ່າວໃຫ້ໄດ້ຮັບຜົນສໍາເລັດ ທາງດ້ານປະລິມານ ແລະ ຄຸນນະພາບ, ພ້ອມກັນປົກປັກຮັກສາ ແລະ ເສີມຂະຫຍາຍມູນເຊື້ອຄອບຄົວ ແລະ ບ້ານປ້ອງກັນຄວາມສະຫົງບດີ ໄວ້ໃຫ້ໝັ້ນຄົງຕະຫຼອດໄປ.

• Facebook
• Twitter
• Line