ປາກຊັນ ປະກາດສ້າງບ້ານປັດຊຸມ ເປັນບ້ານປ້ອງກັນຄວາມສະຫງົບດີ

ໃນຕອນເຊົ້າ ວັນທີ 05 ສິງຫາ 2022 ຢູ່ທີ່ສະໂມສອນໂຮງຮຽນປະຖົມບ້ານປັດຊຸມ ເມືອງປາກຊັນ ແຂວງບໍລິຄໍາໄຊ ໄດ້ຈັດພິທີເປີດບັ້ນດໍາເນີນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ໂດຍການເປັນປະທານຂອງທ່ານ ວົງສີ ທອງສີອິນທິປັນຍາ ເຈົ້າເມືອງປາກຊັນ, ມີທ່ານ ພັນໂທ ຮັກ ເທວາ ຮອງຫົວໜ້າກອງບັນຊາການ ປກສ ເມືອງ, ມີຫົວໜ້າ ປກສ ກຸ່ມບົວແວງຄຳ, ມີອໍານາດການຈັດບ້ານ – ນາຍບ້ານ, ກໍາລັງ ປກຊ – ປກສ ບ້ານ, ພະນັກງານພາກສ່ວນກ່ຽວຂ້ອງ ຕະຫຼອດຮອດພໍ່ແມ່ປະຊາຊົນ ບ້ານປັດຊຸມ ເຂົ້າຮ່ວມ.

ບ້ານ ປັດຊຸມ ມີທັງໝົດ 365 ຄອບຄົວ, ຈໍານວນພົນ 1.456 ຄົນ, ຍິງ 744 ຄົນ, ປະຊາຊົນ 90% ຍຶດຖືອາຊີບ ປູກຝັງ, ລ້ຽງສັດ, ນອກນັ້ນ ຄ້າ-ຂາຍ ແລະ ເປັນພະນັກງານລັດຈໍານວນໜື່ງ, ເພື່ອເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂື້ນ, ອໍານາດການຈັດຕັ້ງບ້ານ ໄດ້ຊຸກຍູ້ສົ່ງເສີມ ໃຫ້ພໍ່ແມ່ປະຊາຊົນອອກແຮງງານທໍາການຜະລິດ, ປູກຝັງ, ລ້ຽງສັດ, ຄ້າ – ຂາຍ ແລະ ປະກອບອາຊີບທີ່ຖືກຕ້ອງຕາມລະບຽບກົດໝາຍ ຈື່ງເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນນັບມື້ດີຂື້ນເທື່ອລະກ້າວ.

ໃນພິທີ ຄະນະຮັບຜິດຊອບ ໄດ້ຜ່ານຂໍ້ຕົກລົງ ຂອງທ່ານເຈົ້າເມືອງປາກຊັນ ວ່າດ້ວຍການອະນຸດມັດ ໃຫ້ເປີດບັ້ນດໍາເນີນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ບ້ານ ປັດຊຸມ ເມືອງປາກຊັນ, ຜ່ານແຜນໃນການດໍາເນີນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ເພື່ອເປັນການ ຊຸກຍູ້, ສົ່ງເສີມ, ປຸກລະດົມ ໃຫ້ພໍ່ແມ່ປະຊາຊົນ ທຸກຄົນ, ທຸກຄອບຄົວ ເປັນເຈົ້າການຢ່າງຕັ້ງໜ້າເຂົ້າໃນວຽກງານການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ, ແນ່ໃສ່ເຮັດໃຫ້ບ້ານມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.

ພາຍຫຼັງສໍາເລັດແຕ່ລະບາດກ້າວຂັ້ນຕອນ ຄະນະຮັບຜິດຊອບ ຈະໄດ້ສະຫຼຸບສັງລວມຈຳນວນຄອບຄົວ ທີ່ຄົບຕາມ 05 ມາດຖານ, ເງື່ອນໄຂ ເພື່ອອອກໃບຢັ້ງຢືນໃຫ້, ສ່ວນຄອບຄົວໃດທີ່ບໍ່ຄົບຕາມ 05 ມາດຖານ, ເງື່ອນໄຂ ຈະໄດ້ສືບຕໍ່ສືກສາອົບຮົມ ໃຫ້ມີການເຄື່ອນໄຫວດໍາລົງຊີວິດ, ປະກອບອາຊີບ, ທໍາມາຫາກິນຢ່າງຖືກຕ້ອງ, ມີສະຕິເຄົາລົບລະບຽບກົດໝາຍ, ຮັກສາໄດ້ມູນເຊື້ອ ແລະ ຮີດຄອງປະເພນີອັນດີງາມຂອງຊາດ.

ຕອນທ້າຍ ຍັງໄດ້ຮັບຟັງຄໍາເຫັນໂອ້ລົມຈາກ ທ່ານ ວົງສີ ທອງສີອິນທິປັນຍາຄະນະປະຈຳພັກແຂວງ ເລຂາພັກເມືອງ-ເຈົ້າເມືອງປາກຊັນ ເຊີ່ງທ່ານໄດ້ເນັ້ນໜັກໃຫ້ ອໍານາດການຈັດຕັ້ງບ້ານ ສືບຕໍ່ເຮັດວຽກງານສືກສາອົບຮົມການເມືອງ-ແນວຄິດໃຫ້ພໍ່ແມ່ປະຊາຊົນພາຍໃນບ້ານ ເພື່ອເຮັດໃຫ້ພໍ່ແມ່ປະຊາຊົນ ມີແນວຄິດ ອຸ່ນອ່ຽນທຸ່ນທ່ຽງ ເຊື່ອໝັ້ນຕໍ່ແນວທາງນະໂຍບາຍຂອງພັກ, ເຄົາລົບລະບຽບກົດໝາຍຂອງລັດ, ສ້າງຄວາມສາມັກຄີພາຍໃນບ້ານ, ຊຸກຍູ້ສົ່ງເສີ່ມໃຫ້ພໍ່ແມ່ປະຊາຊົນ ປະກອບອາຊີບທີ່ຖືກຕ້ອງຕາມລະບຽບກົດໝາຍ, ປະກອບສ່ວນເຂົ້າໃນການແກ້ໄຂຄວາມຫຍຸ້ງຍາກດ້ານເສດຖະກິດ – ການເງິນຂອງຊາດ, ປະຕິບັດຕາມທິດນໍາ ເພີ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ເຮັດໃຫ້ຊີວິດການເປັນຢູ່ ຂອງພໍ່ແມ່ປະຊາຊົນນັບມື້ດີຂື້ນເປັນກ້າວໆ, ຄຽງຄູ່ກັບການປຸກລະດົມໃຫ້ພໍ່ປະຊາຊົນພາຍໃນບ້ານ ມີຄວາມຕື່ນຕົວປະກອບສ່ວນ ເຂົ້າໃນວຽກງານປ້ອງກັນຊາດ – ປ້ອງກັນຄວາມສະຫງົບ ເຮັດໃຫ້ບ້ານມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ.

• Facebook
• Twitter
• Line