ອ່າງໂຕ່ງນໍ້າຍ້ວງຕອນໃຕ້ ໄດ້ຮັບການຄຸ້ມຄອງ ແລະ ຍົກລະດັບດີຂື້ນ.

ໃນວັນທີ 25 ກໍລະກົດ 2022 ທີ່ຫ້ອງປະຊຸມໂຄງການຄຸ້ມຄອງປ່າປ້ອງກັນແຫຼ່ງນໍ້າເຂດອ່າງໂຕ່ງນໍ້າຍ້ວງຕອນໃຕ້ ໄດ້ຈັດກອງປະຊຸມສະຫຼຸບຜົນການຈັດຕັ້ງປະຕິບັດວຽກງານ ໄຕມາດ2  ຂຶ້ນ ເປັນປະທານໂດຍ ທ່ານ ພັດທະຈອນ ແກ້ວພຸດທະວົງ ຫົວໜ້າພະແນກກະສິກໍາ ແລະ ປ່າໄມ້ແຂວງບໍລິຄໍາໄຊ ໂດຍມີຕາງໜ້າໂຄງການ, ຜູ້ປະສານງານໂຄງການ ພ້ອມດ້ວຍພະແນກການທີ່ກ່ຽວຂ້ອງເຂົ້າຮ່ວມ.

ປ່າປ້ອງກັນແຫລ່ງນໍ້າເຂດອ່າງໂຕ່ງນໍ້າຍ້ວງຕອນໃຕ້ ແມ່ນປ່າປ້ອງກັນໜຶ່ງທີ່ນອນຢູ່ໃນພື້ນທີ່ປ່າປ້ອງກັນແຫ່ງຊາດນໍ້າມ່ວນ-ນໍ້າຍ້ວງ, ມີເນື້ອທີ່ທັງໝົດ 54.517,58 ເຮັກຕ່າ, ກວມເອົາ 3,41% ຂອງເນື້ອທີ່ທົ່ວແຂວງ, ປ່າປ້ອງກັນແຫ່ງນີ້ເປັນຈຸດເຊື່ອມຕໍ່ລະຫວ່າງ ປ່າສະຫງວນແຫ່ງຊາດນໍ້າກະດິງ ແລະ ປ່າສະຫງວນພູຈອມວອຍ, ກວມເອົາເນື້ອທີ່ຂອງສາມເມືອງ ແລະ 9 ບ້ານຄື: ເມືອງຄໍາເກີດ ມີ 5 ບ້ານຄື: ບ້ານ ທ່າສາລາ, ທົ່ງວຽງຄໍາ, ແກ້ວແສນຄໍາ, ຊໍາເຕີຍ ແລະ ນາຈະໄຫຼ; ເມືອງວຽງທອງມີ 3 ບ້ານຄື:ບ້ານ ຜາຂອດ, ອຸດົມໄຊ ແລະ ບ້ານນາດີ ແລະ ເມືອງໄຊຈໍາພອນມີ 1 ບ້ານຄື: ບ້ານນາແຈງ.

ກິດຈະກໍາຫຼັກທີ່ກໍານົດໄວ້ໃນແຜນການຄຸ້ມຄອງປີ 2022 ມີ 7 ກິດຈະກໍາຄື: ສ້າງຄວາມສາມາດໃນການປະຕິບັດການຄຸ້ມຄອງອ່າງໂຕ່ງ, ການມີສ່ວນຮ່ວມຂອງຊຸມຊົນໃນການປົກປັກຮັກສາປ່າໄມ້ ຕິດພັນກັບການປັບປຸງຊີວິດການເປັນຢູ່, ວຽກງານກວດກາລາດຕະເວນແບບມີສ່ວນຮ່ວມ, ການແກ້ໄຂສະນໍາ ແລະ ເຄື່ອນຍ້າຍສັດອອກຈາກໜ້າອ່າງ, ວຽກງານໂຄສະນາປູກຈິດສໍານຶກ, ກວດກາຕິດຕາມ ແລະ ວຽກງານບໍລິຫານຄຸ້ມຄອງໂຄງການ ເຫັນວ່າຜ່ານການຈັດຕັ້ງປະຕິບັດ ຄະນະຮັບຜິດຊອບໂຄງການແມ່ນໄດ້ດຳເນີນໄປຕາມແຜນ ແລະ  ມີຫຼາຍໜ້າວຽກໄດ້ເຮັດສຳເລັດຂື້ນຕາມລຳດັບ.

• Facebook
• Twitter
• Line