ເມືອງວຽງທອງເຊື່ອມຊືມເຜີຍແຜ່ເອກະສານສຳຄັນຕ່າງໆຂອງຂັ້ນເທີງ

ໃນຕອນບ່າຍຂອງວັນທີ 19 ກໍລະກົດ 2022 ຢູ່ຫ້ອງປະຊຸມຊັ້ນ III ຫ້ອງວ່າການເມືອງວຽງທອງ, ແຂວງບໍລິຄໍາໄຊ ໄດ້ຈັດກອງປະຊຸມເຊື່ອມຊືມເຜີຍແຜ່ເອກະສານສຳຄັນຕ່າງໆຂອງຂັ້ນເທີງ ໃຫ້ພະນັກງານຫຼັກແຫຼ່ງຂອງເມືອງ ໂດຍເປັນກຽດເຂົ້າຮ່ວມເປັນປະທານຂອງ ທ່ານ ຄໍາມອນ ໄຊພົມມີ ຮອງເລຂາພັກເມືອງວຽງທອງ ຜູ້ຊີ້ນໍາວຽກພັກ – ພະນັກງານຂັ້ນເມືອງ, ມີຄະນະປະຈໍາພັກເມືອງ, ກໍາມະການພັກເມືອງ ແລະ ພະນັກງານຫຼັກແຫຼ່ງຂອງເມືອງ ເຂົ້າຮ່ວມ.

ທ່ານ ຄໍາມອນ ໄຊພົມມີ ຮອງເລຂາພັກເມືອງໄດ້ຍົກໃຫ້ເຫັນເນື້ອໃນບັນດາເອກະສານຄື: ຄໍາແນະນໍາຂອງຄະນະປະຈໍາພັກແຂວງບໍລິຄໍາໄຊ ວ່າດ້ວຍການຈັດຕັ້ງເຜີຍແຜ່ເອກະສານນຳພາແນວຄິດ ກ່ຽວກັບຄວາມຫຍຸ້ງຍາກທາງດ້ານເສດຖະກິດການເງິນ ພາຍໃຕ້ຄຳຂວັນ: “ ພົນລະເມືອງລາວທຸກຄົນເປັນເຈົ້າຂອງປະເທດຊາດ, ຍາມປະເທດຊາດພົບຄວາມຫຍຸ້ງຍາກຂັດສົນ, ທຸກຄົນຕ້ອງຊ່ວຍຊາດ ເພື່ອພ້ອມກັນຂ້າມຜ່ານວິກິດການໄປໃຫ້ໄດ້ “, ຄໍາແນະນໍາຂອງຄະນະປະຈໍາພັກແຂວງບໍລິຄໍາໄຊ ວ່າດ້ວຍການເພີ່ມທະວີຄວາມຮັບຜິດຊອບນຳພາ-ຊີ້ນໍາວຽກງານການເມືອງ-ແນວຄິດ ຕິດພັນກັບການເຂົ້າຮ່ວມຮັບຟັງ ການເຜີຍແຜ່ເຊື່ອມຊືມ, ຟັງປາຖະກະຖາວັນສຳຄັນຂອງຊາດ, ຂອງພັກ, ຄໍາສັ່ງ ຂອງຄະນະກໍາມະການ ປກຊ-ປກສ ແຂວງບໍລິຄໍາໄຊ ວ່າດ້ວຍ ການຍົກສູງສະຕິລະວັງຕົວ ເປັນເຈົ້າການຈັດຕັ້ງປ້ອງກັນເວນຍາມຕາມສໍານັກງານ, ຫ້ອງການຂອບເຂດຕົນຢ່າງມີຄວາມຮັບຜິດຊອບສູງ ແລະ ເຂັ້ມງວດ.

ຈຸດປະສົງ ເພື່ອເຮັດໃຫ້ພະນັກງານຫຼັກແຫຼ່ງບັນດາພະແນກການ – ອົງການອ້ອມຂ້າງເມືອງ ໄດ້ຮັບຮູ້ເຂົ້າໃຈ ແລະ ກຳແໜ້ນແນວທາງ, ມະຕິ, ຄຳສັ່ງຂອງພັກ, ກົດໝາຍຂອງລັດໃຫ້ເລິກເຊິ່ງ ສາມາດຫັນແນວທາງອອກເປັນແຜນງານ, ໂຄງການ, ວຽກງານອັນລະອຽດໃນແຕ່ລະໄລຍະ ເຂົ້າໃນຄວາມຮັບຜິດຊອບ, ນຳພາ – ຊີ້ນຳຢ່າງແທດເຖິງ, ປະດິດສ້າງ, ຮູ້ສຶກສາອົບຮົມປຸກລະດົມມະຫາຊົນ ຈັດຕັ້ງປະຕິບັດແນວທາງໃຫ້ປະກົດຜົນເປັນຈິງ.

• Facebook
• Twitter
• Line