ປກສ ແຂວງ ບໍລິຄໍາໄຊ ປາຖະກະຖາ ປີສາມັກຄີ ມິດຕະພາບ ລາວ – ຫວຽດນາມ

ກອງບັນຊາການ ປກສ ແຂວງ ບໍລິຄໍາໄຊ ໄດ້ຈັດພິທີປາຖະກະຖາ ປີສາມັກຄີມິດຕະພາບ ລາວ – ຫວຽດນາມ ປະຈໍາປີ 2022, ວັນເຊັນສົນທິສັນຍາ ມິດຕະພາບ – ການຮ່ວມມື ຄົບຮອບ 45 ປີ (18 ກໍລະ ກົດ1977 – 18 ກໍລະກົດ 2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (05 ກັນຍາ1962 – 05 ກັນຍາ 2022) ໃນຕອນເຊົ້າ ວັນທີ 19 ກໍລະກົດ 2022 ຢູ່ຫ້ອງປະຊຸມໃຫຍ່ກອງບັນຊາການ ປກສ ແຂວງ ໂດຍການເປັນປະທານ ແລະ ໃຫ້ກຽດປາຖະກະຖາເລົ່າຄືນມູນເຊື້ອວັນສໍາຄັນດັ່ງກ່າວ ຂອງທ່ານ ພັນເອກ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ.

ທ່ານ ພັນເອກ ກົງຈັນ ໄຊປັນຍາ ກ່າວວ່າ: ເມື່ອຫວນຄືນປະຫວັດສາດ ຂອງຊາດລາວ – ຫວຽດນາມ ນັບແຕ່ມື້ສ້າງຕັ້ງພັກກອມມູນິດອິນດູຈີນ ປີ 1930 ເປັນຕົ້ນມາ, ຄວາມເປັນພີ່ນ້ອງລະຫວ່າງສອງຊາດລາວ – ຫວຽດນາມ ມີຄວາມເລິກເຊີ່ງຂື້ນໃນໄລຍະກວ່າເຄີ່ງສັດຕະວັດ ສອງຊາດລາວ-ຫວຽດນາມ ໄດ້ຄຽງບ່າຄຽງໄຫຼກັນຕໍ່ສູ້ຢ່າງພິລະອາດຫານ ຜ່ານຜ່າອຸປະສັກທຸລະກັນດານ ເຕັມໄປດ້ວຍຄວາມເສຍສະຫຼະ ພາຍໃຕ້ຄໍາສອນທີ່ມີຄຸນຄ່າຂອງຂອງທ່ານ ປະທານໂຮ່ຈິມີນ, ປະທານ ໄກສອນ ພົມວິຫານ ແລະ ປະທານ ສະພານຸວົງ.

ປະຊາຊົນລາວ – ຫວຽດນາມ ໄດ້ຮ່ວມທຸກ, ຮ່ວມສຸກ, ຮ່ວມສູ້ຮົບໃນຂຸມຄອງດຽວກັນ, ພ້ອມກັນເອົາຊະນະສັດຕູ, ມີນ້ຳໃຈສາມັກຄີ ແລະ ມິດຕະພາບອ້າຍນ້ອງ ລະຫວ່າງປະຊາຊົນ ສອງປະເທດ ຈື່ງເປັນປັດໃຈແຫ່ງໄຊຊະນະ ຂອງການປະຕິວັດ ຂອງພາລະກິດຕໍ່ສູ້ປົດປ່ອຍປະເທດຊາດ ຕາມຈຸດໝາຍທີ່ພັກກອມມູນິດອິນດູຈີນ ແລະ ພັກປະຊາຊົນປະຕິວັດລາວ ວາງໄວ້.

ນັບແຕ່ທ້າຍສັດຕະວັດທີ 19 ເປັນຕົ້ນມາ, ສອງຊາດໄດ້ພ້ອມກັນຕໍ່ສູ້ຕ້ານສັດຕູດຽວກັນ ຄືພວກຈັກກະພັດລ່າເມືອງຂື້ນແບບເກົ່າ ແລະ ແບບໃໝ່ ເພື່ອກອບກູ້ ແລະ ປົກປັກຮັກສາປະເທດຊາດ, ການເຕີບໃຫຍ່ຂະຫຍາຍຕົວຂອງສາຍພົວພັນພິເສດລາວ – ຫວຽດນາມ ແຕ່ກ່ອນເຖິງປະຈຸບັນ ແມ່ນພາລະກິດຂອງມະຫາຊົນ, ມະຫາຊົນເປັນຜູ້ປະກອບສ່ວນໂດຍກົງ ເຂົ້າໃນການປັບປຸງ ແລະ ພັດທະນາຄວາມໝັ້ນຄົງຂອງສາຍພົວພັນ ລະຫວ່າງສອງປະເທດ, ສືບທອດຈາກຄົນຮຸ່ນນີ້ໄປສູ້ຮຸ່ນໃໝ່ ພາຍໃຕ້ການນໍາພາຂອງສອງພັກ. ສ້າງສາຍພົວພັນມິດຕະພາບອັນຍິ່ງໃຫ່ຍລາວ – ຫວຽດນາມ ໃຫ້ເປັນພາລະກິດລວມຂອງສອງພັກ, ສອງລັດ ແລະ ປະຊາຊົນສອງຊາດ, ປະຕິບັດ ສອງໜ້າທີ່ຍຸດທະສາດຄື: ການປົກປັກຮັກສາ ແລະ ການສ້າງສາພັດທະນາປະເທດຊາດ ຂອງສອງປະເທດ, ບົນພື້ນຖານຮັດແໜ້ນສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ – ຫວຽດນາມ.

ນັບແຕ່ປີ 1975 ເປັນຕົ້ນມາ 02 ຊາດລາວ – ຫວຽດນາມ ໄດ້ລົງນາມເຊັນສົນທິສັນຍາ ແລະ ການຮ່ວມມືຮອບດ້ານຮ່ວມກັນຫຼາຍດ້ານ ເປັນຕົ້ນແມ່ນ ວຽກງານການເມືອງ, ການຕ່າງປະເທດ, ວຽກງານປ້ອງກັນຊາດ – ປ້ອງກັນຄວາມສະຫງົບ, ການຮ່ວມມືດ້ານເສດຖະກິດ, ການຄົມມະນາຄົມ – ຂົນສົ່ງ, ດ້ານວັດທະນາທໍາ – ສັງຄົມ, ການຮ່ວມມືດ້ານການສືກສາ – ການພັດທະນາຊັບພະຍາກອນມະນຸດ, ການຊ່ວຍເຫຼືອດ້ານຕ່າງໆຕະຫຼອດມາ.

ພິເສດ ປີ 2022 ນີ້ ເປັນປີສາມັກຄີມິດຕະພາບລາວ – ຫວຽດນາມ, ວັນເຊັນສົນທິສັນຍາ ມິດຕະພາບ – ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ, ສອງປະເທດກໍ່ໄດ້ຈັດຫຼາຍກິດຈະກໍາຮ່ວມກັນ, ຈັດພິທີວາງສະແດງ ແລະ ເລົ່າຄືນມູນເຊື້ອ 2 ວັນປະຫວັດສາດ ລາວ-ຫວຽດນາມ ຢ່າງເປັນຂະບວນຟົດຟື້ນ, ເບິກບານມ່ວນຊື່ນ ເຕັມໄປດ້ວຍຄວາມໝາຍຄວາມສໍາຄັນຢ່າງເລິກເຊີ່ງ.

• Facebook
• Twitter
• Line