ພິທີມອບທຸງໄຊນຳໜ້າຂະບວນການແຂ່ງຂັນ 4 ບຸກ ໃຫ້ໜ່ວຍຊາວໜຸ່ມສະຫະພັນກຳມະບານແຂວງບໍລິຄຳໄຊ ໄດ້ຈັດຂຶ້ນໃນຕອນບ່າຍຂອງວັນທີ 21 ກໍລະກົດ 2022 ຢູ່ຫ້ອງປະຊຸມຂອງຕົນ, ເປັນກຽດເຂົ້າຮ່ວມເປັນປະທານຂອງສະຫາຍ ທະນູວັນ ວົງມະນີ ຮອງເລຂາຄະນະບໍລິຫານງານຊາວໜຸ່ມແຂວງ, ສະຫາຍ ດຳລົງ ທັບລາດ ປະທານສະຫະພັນກຳມະບານແຂວງ ແລະ ສະຫາຍ ນາງ ໄໝ ສຸລິນໄຊ ເລຂາຄະນະບໍລິຫານງານຊາວໜຸ່ມສະຫະພັນກຳມະບານແຂວງ, ມີຄະນະຊາວໜຸ່ມຈາກຮາກຖານອ້ອມຂ້າງ ແລະ ສະມາຊິກຊາວໜຸ່ມພາຍໃນໜ່ວຍ ເຂົ້າຮ່ວມ.
ໃນພິທີ ໄດ້ຮັບຟັງບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃນແຕ່ລະດ້ານ ເປັນຕົ້ນແມ່ນບຸກດ້ານແນວຄິດ ເຊິ່ງໜ່ວຍຊາວໜຸ່ມສະຫະພັນກຳມະບານແຂວງ ໄດ້ຕັ້ງໜ້າເຮັດວຽກງານສຶກສາອົບຮົມການເມືອງແນວຄິດໃຫ້ພະນັກງານສະມາຊິກຊາວໜຸ່ມ ເຮັດໃຫ້ເຂົາເຈົ້າມີນໍ້າໃຈຮັກຊາດ, ມີຄຸນສົມບັດສີນທຳປະຕິວັດ, ເຊື່ອໝັ້ນຕໍ່ການນຳພາຂອງພັກ, ຈັດຕັ້ງເຊື່ອມຊຶມບັນດາແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ເອກະສານບົດແນະນຳ ການຈັດຕັ້ງປະຕິບັດຂໍ້ແຂ່ງຂັນ 4 ບຸກໄດ້ 3 ຄັ້ງ, ນຳພາສະມາຊິກຊາວໜຸ່ມພາຍໃນໜ່ວຍ ເຂົ້າຮ່ວມຮັບຟັງປາຖະກະຖາໃນວັນສໍາຄັນຂອງຊາດ, ຂອງພັກ, ຂອງແຂວງ ແລະ ຮັບຟັງການໂອ້ລົມຂອງຂັ້ນເທີງໄດ້ 70 ຄັ້ງ ມາດຖານນີ້ປະຕິບັດໄດ້ 92%, ດ້ານການຝຶກຝົນຫຼໍ່ຫຼອມຮ່ຳຮຽນ ຊຸກຍູ້ສະມາຊິກຊາວໜຸ່ມພາຍໃນໜ່ວຍໃນການຍົກລະດັບຄວາມຮູ້ຄວາມສາມາດຂອງຕົນໃຫ້ສູງຂຶ້ນ ເຊິ່ງມັນສະແດງອອກຄື ສົ່ງພະນັກງານສະມາຊິກຊາວໜຸ່ມໄປຝຶກອົບຮົມວຽກງານວິຊາສະເພາະໄດ້ 6 ຄັ້ງ ມາດຖານນີ້ປະຕິບັດໄດ້ 91%, ດ້ານການຈັດຕັ້ງຂະບວນການຕ່າງໆພາຍໃນໜ່ວຍ ເຊັ່ນ: ອອກແຮງງານລວມທີ່ສວນສີສົມ ພອນ ລໍວັນໄຊ ແລະ ທາສີຂອບທາງຕ້ອນຮັບວັນສໍາຄັນຂອງອົງຄະນະພັກແຂວງໄດ້ 10 ຄັ້ງ ແລະ ກິດຈະກໍາຂອງຊາວໜຸ່ມແຂວງ ລວມທັງໝົດໄດ້ 15 ຄັ້ງ ດ້ານນີ້ປະຕິບັດໄດ້ 91%, ດ້ານວິຊາຊີບ ແລະ ວຽກເຮັດງານທຳ ສະມາຊິກຊາວໜຸ່ມໄດ້ປະກອບອາຊີບເສີມດ້ວຍການປູກຝັງ ມີ 3 ຄອບຄົວ, ປະກອບອາຊີບໃນການຄ້າຂາຍ ມີ 2 ຄອບຄົວ ດ້ານນີ້ປະຕິບັດໄດ້ 91%.
ຈາກຜົນງານທີ່ຍາດມາໄດ້ນັ້ນ ເຮັດໃຫ້ໜ່ວຍຊາວໜຸ່ມສະຫະພັນກຳມະບານແຂວງ ໄດ້ຮັບໃບຢັ້ງຢືນ 4 ບຸກ ແລະ ທຸງໄຊນຳໜ້າຂະບວນການ 4 ບຸກ ຂອງຊາວໜຸ່ມ ຄຊປປລ ປະຈຳປີ 2021 ແລະ ໃບຍ້ອງຍໍຂອງຄະນະບໍລິຫານງານຊາວໜຸ່ມແຂວງ ຈຳນວນ 7 ສະຫາຍ ທີ່ມີຜົນງານດີເດັ່ນໃນການເຄື່ອນໄຫວວຽກງານຊາວໜຸ່ມຮອບດ້ານ ປີ 2016-2021 ເປັນກຽດມອບໂດຍ ສະຫາຍ ທະນູວັນ ວົງມະນີ ຮອງເລຂາຄະນະບໍລິຫານງານຊາວໜຸ່ມແຂວງ.
Users Today : 1179
Users Yesterday : 494
This Month : 9020
This Year : 129057
Total Users : 515281
Who's Online : 38