ເຈົ້າແຂວງເນັ້ນວຽກງານສຳຄັນ ໃນກອງປະຊຸມວຽກງານອົງການປົກຄອງ ແຂວງບໍລິຄຳໄຊ

ເພື່ອເປັນທິຊີ້ນໍາໃນການຈັດຕັ້ງປະຕິບັດງານໃນຕໍ່ໜ້າ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ໄດ້ເນັ້ນໜັກຫຼາຍວຽກງານສຳຄັນ ໃນກອງປະຊຸມວຽກງານອົງການປົກຄອງແຂວງບໍລິຄຳໄຊ ເປີດກວ້າງ ຄັ້ງທີ I ທີ່ໄດ້ຈັດຂຶ້ນໃນວັນທີ 13 ກໍລະກົດ 2022 ຢູ່ຫ້ອງວ່າການແຂວງ.

ໃນກອງປະຊຸມໄດ້ຮັບຟັງບົດສະຫຼຸບລາຍງານ ບັນດາວຽກງານໃນໄລຍະຜ່ານມາ ແລະ ໄດ້ພ້ອມກັນສຸມທຸກສະຕິປັນຍາ ເຂົ້າໃນການຄົ້ນຄວ້າປຶກສາຫາລືຢ່າງສ້າງສັນ, ກົງໄປ – ກົງມາ ດ້ວຍຄວາມຮັບຜິດຊອບສູງ ຕໍ່ບັນດາຫົວຂໍ້ທີ່ພົວພັນກັບຫຼາຍບັນຫາສໍາຄັນ ແລະ ຮີບດ່ວນ ທີ່ພົວພັນກັບຄວາມຮັບຜິດຊອບໃນການບໍລິຫານຄຸ້ມຄອງຂອງບັນດາຂະແໜງການ ເພື່ອສ້າງການຫັນປ່ຽນໃໝ່ຢ່າງແຂງແຮງ ແລະ ເລິກເຊິ່ງ, ແກ້ໄຂບັນຫາຢ່າງເປັນລະບົບ ແລະ ມີຫຼັກວິທະຍາສາດ.

ເພື່ອເປັນທິຊີ້ນໍາໃນການຈັດຕັ້ງປະຕິບັດງານໃນຕໍ່ໜ້າ ທ່ານເຈົ້າແຂວງ ໄດ້ເນັ້ນໜັກຫຼາຍວຽກງານສຳຄັນ ໂດຍສະເພາະແມ່ນດ້ານເສດຖະກິດ ໃຫ້ປັບປຸງກົນໄກອໍານວຍຄວາມສະດວກ ແລະ ສົ່ງເສີມການລົງທຶນ ດ້ວຍການແກ້ໄຂສິ່ງກີດຂວາງຕ່າງໆ ເພື່ອດຶງດູດການລົງທຶນພາຍໃນ ແລະ ຕ່າງປະເທດ ໃຫ້ດີຂື້ນກວ່າເກົ່າ, ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ, ຊຸກຍູ້ການຈັດເກັບລາຍຮັບ ແລະ ຄຸ້ມຄອງລາຍຈ່າຍ ໃຫ້ດີຂຶ້ນກວ່າເກົ່າ, ພ້ອມສຸມໃສ່ສ້າງຖານລາຍຮັບໃຫ້ຫຼາຍຂື້ນ.

ຊຸກຍູ້ຕິດຕາມການປູກພືດລະດູຝົນ – ລະດູແລ້ງ ແລະ ການປູກເຂົ້າ ເພື່ອຮັບປະກັນທາງດ້ານສະບຽງອາຫານ, ສຸມໃສ່ຊຸກຍູ້ການຜະລິດເປັນສິນຄ້າ ເພື່ອທົດແທນການນໍາເຂົ້າ ແລະ ເປັນສິນຄ້າ ເພື່ອສົ່ງອອກ ຕາມເງື່ອນໄຂແຕ່ລະທ້ອງຖິ່ນ, ສົ່ງເສີມການຜະລິດອຸດສາຫະກໍາ, ຫັດທະກໍາ ຕິດພັນກັບການຄຸ້ມຄອງລາຄາສິນຄ້າອຸປະໂພກ, ບໍລິໂພກໃຫ້ມີຄວາມໝັ້ນທ່ຽງ, ເອົາໃຈໃສ່ຊຸກຍູ້, ສົ່ງເສີມການຜະລິດພາຍໃນ ເພື່ອທົດແທນການນໍາເຂົ້າໃຫ້ຂະຫຍາຍຕົວຫຼາຍຂຶ້ນ, ອໍານວຍຄວາມສະດວກດ້ານການຄ້າ ແລະ ການບໍລິການໃຫ້ມີຄວາມວ່ອງໄວ ປະຕິບັດໂຄງການອອກໃບຕາດິນໃຫ້ມີຄວາມສະດວກ, ວ່ອງໄວ, ຮັບປະກັນຄວາມຖືກຕ້ອງ ແລະ ບັນລຸຕາມແຜນການທີ່ວາງໄວ້.

ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມຮອບດ້ານ ຕາມແຜນການທີ່ກໍານົດໄວ້, ຕິດຕາມສະພາບດິນຟ້າອາກາດ ແລະ ອຸທົກກະສາດໃຫ້ເປັນປົກກະຕິ, ຕິດຕາມລະດັບນໍ້າບັນດາອ່າງຮັບນໍ້າເຂື່ອນໄຟຟ້າ ເພື່ອແຈ້ງເຕືອນໃຫ້ສັງຄົມຮັບຮູ້ຢ່າງທັນການ ເພື່ອຫຼີກລ້ຽງຜົນກະທົບຕໍ່ການດຳລົງຊີວິດ ແລະ ການຜະລິດຂອງປະຊາຊົນບັນດາເຜົ່າ, ປົກປັກຮັກສາຂົວ – ທາງ, ສ້ອມແປງເສັ້ນທາງເທດສະບານບັນດາເມືອງ ແລະ ເສັ້ນທາງຫຼວງແຫ່ງຊາດ ຈຸດໃດທີ່ເປັນຂຸມເປ່ເພເລັກໜ້ອຍ ກໍ່ໃຫ້ສ້ອມແປງ, ເຝົ້າລະວັງການລະບາດຂອງພະຍາດພືດ ແລະ ສັດ ຢ່າງໃກ້ຊິດທັນກັບສະພາບການປ່ຽນແປງຂອງດິນຟ້າອາກາດ, ພ້ອມນັ້ນ ທ່ານຍັງໄດ້ຮຽກຮ້ອງໃຫ້ສຸ່ມໃສ່ວຽກງານປ້ອງກັນຊາດ – ປ້ອງກັນຄວາມສະຫງົບ, ວັດທະນະທໍາ – ສັງຄົມ, ຂົງເຂດການປົກຄອງ ແລະ ຍຸຕິທໍາ.

• Facebook
• Twitter
• Line