6 ເດືອນຕົ້ນປີ ບໍລິຄຳໄຊ ໄດ້ສຸມໃສ່ຫຼາຍວຽກງານສໍາຄັນ

ກອງປະຊຸມວຽກງານອົງການປົກຄອງແຂວງບໍລິຄຳໄຊ ເປີດກວ້າງ ຄັ້ງທີ I ໄດ້ຈັດຂຶ້ນໃນວັນທີ 13 ກໍລະກົດ 2022 ຢູ່ຫ້ອງວ່າການແຂວງ ໂດຍການເປັນປະທານຂອງ ທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີບັນດາພະແນກການອ້ອມຂ້າງ, ເມືອງ 7 ຕົວເມືອງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນ 6 ເດືອນຜ່ານມາ ໄດ້ສຸມໃສ່ຫຼາຍວຽກງານພົ້ນເດັ່ນ ເປັນຕົ້ນແມ່ນໄດ້ຈັດຕັ້ງປະຕິບັດໂຄງການຕ້ານການແຜ່ລະບາດຢາເສບຕິດ ໄດ້ 194 ບ້ານ ມີເປົ້າໝາຍເຂົ້າຮ່ວມ 4 ພັນກວ່າຄົນ, ມ້າງຄະດີຢາເສບຕິດໄດ້ 120 ເລື່ອງ, ກັກຜູ້ຕ້ອງຫາໄດ້ 205 ຄົນ, ຢືດຢາບ້າ 112.943 ເມັດ, ກັນຊາ 1.726 ກິໂລ ແລະ ຢາໄອສ 110 ກິໂລ, ມອບ – ຮັບ ອັດຖິທະຫານອາສາສະໝັກຊ່ຽວຊານຫວຽດນາມ ທີ່ເສຍຊີວິດໃນປາງສົງຄາມ 11 ອັດຖິ.

ເສດຖະກິດກໍ່ມີການຂະຫຍາຍຕົວ 3,17%, ລວມຍອດຜະລິຕະພັນພາຍໃນ ບັນລຸ 9.902,3 ຕື້ກີບ, ສາມາດເກັບລາຍຮັບໄດ້ 246,13 ຕື້ກີບ ເທົ່າກັບ 30,49%, ມຸນຄ່າເກັບຊື້ຜະລິດຕະພັນພາຍໃນ 439 ຕື້ກວ່າກີບ ເພີ່ມຂຶ້ນ 34%, ການປະຕິບັດ 11 ຕົວຊີ້ບອກຂອງສາທາ ບັນລຸຄາດໝາຍໄດ້ 9 ຕົວຊີ້ບອກ, ສ້າງບ້ານວັດທະນະທໍາໄດ້ 3 ບ້ານ ແລະ ດຶງດູດນັກທ່ອງທ່ຽວໄດ້ 15.254 ເທື່ອຄົນ.

ບັນດາໂຄງການກໍ່ສ້າງພາຍໃນແຂວງ ເປັນຕົ້ນແມ່ນການປັບປຸງ ແລະ ຂະຫຍາຍທາງເລກທີ 13 ໃຕ້, ການກໍ່ສ້າງຂົວແມ່ນໍ້າຂອງແຫ່ງທີ 5, ການກໍ່ສ້າງສະໜາມຂີ້ເຫຍື້ອ ແລະ ໂຄງການອື່ນໆ ກໍ່ໄດ້ຮັບການເອົາໃຈໃສ່ຈັດຕັ້ງປະຕິບັດ.

ໃນກອງປະຊຸມຄັ້ງນີ້ ຈະໄດ້ຮັບຟັງການລາຍງານ ໃນຫຼາຍວຽກງານສຳຄັນ ເປັນຕົ້ນແມ່ນ ການຊຸກຍູ້ການຜະລິດ ເພື່ອທົດແທນການນໍາເຂົ້າ ແລະ ຄ້ຳປະກັນສະບຽງອາຫານ, ການອອກໃບຕາດິນ, ການກະກຽມຮ່າງນິຕິກຳ 5 ສະບັບ ທີ່ຈະນໍາເຂົາທາບທາມມນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ແລະ ຜູ້ແທນກອງປະຊຸມ ຍັງຈະມີການປະກອບຄໍາຄິດເຫັນໃສ່ບັນດາວຽກງານ ເພື່ອເປັນການສົ່ງເສີມດ້ານດີ ແລະ ປັງປຸງແກ້ໄຂບາງຂໍ້ຄົ້ງຄ້າງ ແລ້ວນໍາໄປຈັດຕັ້ງປະຕິບັດ ເຮັດໃຫ້ບັນດາວຽກງານໄດ້ຮັບການພັດທະນາໃຫ້ດີຂຶ້ນເທື່ອລະກາວ.

• Facebook
• Twitter
• Line