ດໍາເນີນຊີວິດການເມືອງປັບປຸງກົງຈັກການຈັດຕັ້ງ ປກສ ເມືອງທ່າພະບາດ ແລະ ຫ້ອງຕໍາຫຼວດ

ວັນທີ 20-23 ມິຖຸນາ 2022 ກອງບັນຊາການ ປກສ ແຂວງບໍລິຄໍາໄຊ ໄດ້ເປີດກອງປະຊຸມດໍາເນີນຊີວິດການເມືອງປັບປຸງກົງຈັກການຈັດຕັ້ງຢູ່ ທີ່ ປກສ ເມືອງທ່າພະບາດ ແລະ ຫ້ອງຕໍາຫຼວດ ປກສ ແຂວງ ໂດຍການເປັນປະທານຂອງ ທ່ານ ພັອ ກົງຈັນ ໄຊປັນຍາ ກຳມະການພັກແຂວງ ເລຂາຄະນະບໍລິຫານງານພັກ ຫົວໜ້າກອງບັນຊາການ ປກສ ແຂວງ,  ເປັນກຽດເຂົ້າຮ່ວມໂດຍທ່ານ ພັອ ບຸນມະນີ ຫຼ້າພີມພອນ ຮອງຫົວໜ້າກົມປ້ອງກັນກໍາລັງກົມໃຫ່ຍການເມືອງກະຊວງປ້ອງກັນຄວາມສະຫົງບ ພ້ອມດ້ວຍຄະນະ, ມີຫົວໜ້າຄະນະຈັດຕັ້ງເມືອງທ່າພະບາດ, ມີຄະນະຮັບຜິດຊອບບັ້ນດໍາເນີນຊີວິດການເມືອງຂັ້ນກອງບັນຊາການ ປກສ ແຂວງ, ບັນດາຫົວໜ້າ, ຄະນະຫ້ອງຕໍາຫຼວດ, ຄະນະກອງບັນຊາການ ປກສ ເມືອງທ່າພະບາດ ຕະຫຼອດຮອດສະມາຊິກພັກ, ພະນັກງານ-ນັກຮົບທັງສອງພາກສ່ວນ ເຂົ້າຮ່ວມ.

ໃນທີ່ປະຊຸມ ໄດ້ເຜີຍແຜ່ເຊື່ອມຊືມເອກະສານທີ່ສໍາຄັນ ຄື: ເອກະສານ ເດັດດຽວປັບປຸງປົວແປງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ເອກະສານຈັນຍາບັນ, ຈັນຍາທໍາຂອງນາຍ ແລະ ພົນຕໍາຫຼວດ, ມະຕິເລກທີ 030/ກມສພ, ລົງວັນທີ 3 ມັງກອນ 2018 ຂອງກົມການເມືອງສູນກາງພັກ ວ່າດ້ວຍມາດຖານ, ເງື່ອນໄຂ ພະນັກງານນຳພາ-ຄຸ້ມຄອງ, ເພື່ອເຮັດໃຫ້ສະມາຊິກພັກ, ພະນັກງານ-ນັກຮົບ ຍົກສູງຄຸນທາດການເມືອງ, ຄຸນສົມບັດສິນທໍາປະຕິວັດ, ແບບແຜນວິທີເຮັດວຽກ, ມີນໍ້າໃຈຮັບໃຊ້ປະຊາຊົນ ແລະ ຄວາມເສຍສະຫຼະເພື່ອສ່ວນລວມ, ບໍ່ສວຍໃຊ້ໜ້າທີ່ຕໍາແໜ່ງເພື່ອຫາຜົນປະໂຫຍດສ່ວນຕົວ, ຕ້ອງມີຄວາມຊື່ສັດບໍລິສຸດຕໍ່ພັກ, ປະເທດຊາດ ແລະ ປະຊາຊົນຢ່າງແທ້ຈິງ, ໃນທີ່ປະຊຸມຄະນະປະທານຍັງໄດ້ມີຄໍາເຫັນເຈາະຈີ້ມຕໍ່ການຊີ້ນໍາ-ນໍາພາຂອງຄະນະພັກ, ຄະນະບັນຊາແຕ່ລະຂັ້ນໃນການນໍາພາເຄື່ອນໄຫວວຽກງານໃນໄລຍະຜ່ານມາ, ຈາກນັ້ນຄະນະຮັບຜິດຊອບບັ້ນດໍາເນີນບັ້ນດໍາເນີນຊີວິດການເມືອງກໍ່ໄດ້ເເນະນໍາການປ່ອນບັດ ແລະ ດໍາເນີນການປ່ອນບັດທາບທາມບຸກຄະລິກກະພາບຂອງຄະນະພັກ, ຄະນະບັນຊາ, ເກັບກໍາບັນຫາທີ່ຄວນເອົາໃຈໃສ່ປັບປຸງແກ້ໄຂຕໍ່ການນໍາພາລວມ, ບັ້ນດໍາເນີນຊີວິດການເມືອງໃນຄັ້ງນີ້ ໄດ້ຕີລາຄາຈັດແບ່ງປະເພດສະມາຊິກພັກ ພ້ອມທັງຕໍານິສົ່ງຂ່າວ, ກໍ່ສ້າງຊ່ວຍເຫຼືອເຊີ່ງກັນ ແລະ ກັນ ເພື່ອກໍ່ສ້າງພະນັກງານສະມາຊິກພັກພະນັກງານ-ນັກຮົບ ໃຫ້ມີຄຸນທາດການເມືອງໜັກແໜ້ນປະຕິບັດທຸກມະຕິຄໍາສັ່ງຂອງຂັ້ນເທີງວາງອອກຢ່າງເຂັ້ມງວດ

ຕອນທ້າຍກອງປະຊຸມ ຄະນະປະທານ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາຕໍ່ຄະນະພັກ, ສະມະຊິກພັກຈົ່ງພ້ອມກັນ ເຊີດຊູບົດບາດການນໍາພາຂອງພັກໃຫ້ສູງຂື້ນ, ເພີ່ມທະວີການປັບປຸງແບບແຜນວິທີນໍາພາ-ວິທີເຮັດວຽກໃຫ້ມີວິທະຍາສາດ ແລະ ທັນສະໄໝ, ສືບຕໍ່ເຮັດວຽກງານສຶກສາອົບຮົມ-ນໍາພາແນວຄິດໃຫ້ສະມາຊິກພັກ, ພະນັກງານ-ນັກຮົບໃຫ້ເປັນປົກກະຕິຕໍ່ເນື່ອງ ເພື່ອແນ່ໃສ່ໃຫ້ທຸກສະຫາຍມີຄຸນທາດການເມືອງໜັກແໜ້ນ, ມີຄວາມເຂັ້ມແຂງທາງດ້ານການຈັດຕັ້ງ, ມີຄວາມຊໍານິຊໍານານທາງດ້ານວິຊາສະເພາະ ແລະ ມີລະບຽບວິໄນເຂັ້ມງວດ, ພ້ອມກັນສຸມໃສ່ເຮັດວຽກງານການເມືອງ ແລະ ວຽກງານວິຊາສະເພາະໃຫ້ໄດ້ຮັບຜົນສໍາເລັດເປັນກໍາລັງທີ່ເຂັ້ມແຂງຮັບໃຊ້ຊາດຮັບໃຊ້ປະຊາຊົນຢ່າງແທ້ຈິງ.

 

• Facebook
• Twitter
• Line