ດຳລັດ 299/ລບ ກຳນົດ 5 ຮູບແບບການສະໜອງສິນເຊື່ອ SME

ກອງປະຊຸມເຜີຍແຜ່ດຳລັດ ວ່າດ້ວຍກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ ສະບັບເລກທີ 299/ລບ, ລົງວັນທີ 04 ກັນຍາ 2019 ໄດ້ຈັດຂຶ້ນໃນຕອນເຊົ້າຂອງວັນທີ 25 ສິງຫາ 2020 ຢູ່ຫ້ອງປະຊຸມຫ້ອງວ່າການບໍລິຄຳໄຊ ໂດຍເປັນກຽດເຂົ້າຮ່ວມຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ທັງເປັນປະທານສະພາບໍລິຫານກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ, ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ, ມີຄະນະກະຊວງ ອຄ, ພະແນກອຸດສາຫະກຳ ແລະ ການຄ້າ ຈາກ 6 ແຂວງ: ນະຄອນຫຼວງວຽງຈັນ, ແຂວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ ແລະ ແຂວງໄຊສົມບູນ, ພະແນກການອ້ອມຂ້າງແຂວງ ແລະ ຫ້ອງການ ອຄ 7 ເມືອງ ຂອງແຂວງບໍລິຄຳໄຊ ເຂົ້າຮ່ວມ.

ກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ ( ທສວ ) Small and Medium Enterprise Promotion Fund ( SME Fund ) ແມ່ນການຈັດຕັ້ງການເງິນໜຶ່ງຂອງລັດ ທີ່ຂຶ້ນກັບກະຊວງ ອຸດສາຫະກໄ – ການຄ້າ ( ອຄ ) ເຊິ່ງເຮັດໜ້າທີ່ສະໜອງສິນເຊື່ອໃຫ້ SME ຂອງ ທສວ ແລະ ການສະໜອງທຶນສະໜັບສະໜູນໂຄງການວິຊາການຂອງ ທສວ ເພື່ອໃຫ້ມີແຫຼ່ງທຶນເໝາະສົມ, ໝັ້ນຄົງ ສາມາດສະໜອງທຶນໄດ້ຢ່າງສະໝ່ຳສະເໝີ ແລະ ທັນການ ໃຫ້ບັນດາໂຄງການ SME ໃນ ສປປ ລາວ ຕາມທິດການເພີ່ມທະວີຄວາມເປັນເຈົ້າຕົນເອງ ແລະ ເພິ່ງຕົນເອງໃນການພັດທະນາ ເສດຖະກິດ-ສັງຄົມ, ໂດຍການສະໜອງສິນເຊື່ອ ມີ 5 ຮູບແບບ ຄື: ສະໜອງສິນເຊື່ອ ຜ່ານທະນາຄານທຸລະກິດ ແລະ ສະຖາບັນການເງິນອຶ່ນໆ, ສະໜອງສິນເຊື່ອ ເພື່ອຊ່ວຍຟື້ນຟູ SME ທີ່ມີບັນຫາດ້ານການເງິນ ແຕ່ຄວາມສາມາດໃນການຜະລິດ ແລະ ມີຕະຫຼາດຮອງຮັບທີ່ໝັ້ນຄົງ, ການລົງທຶນຮ່ວມກັບ SME ທີ່ມີແຜນທຸລະກິດທີ່ດີ ແຕ່ບໍ່ສາມາດເຂົ້າຫາແຫຼ່ງທຶນໄດ້ ຍ້ອນຂາດຫຼັກຊັບຄ້ຳປະກັນ, ການປະກອບໃຫ້ກອງທຶນອຶ່ນທີ່ມີເງື່ອນໄຂ ເພື່ອສະໜອງຕໍ່ໃຫ້ SME ໂດຍສະເພາະ ຜູ້ປະກອບກິດຈະການໃໝ່ ແລະ ໃນຮູບແບບອຶ່ນໆ ທີ່ເຫັນວ່າມີປະສິດທິຜົນ ແລະ ເງື່ອນໄຂ ຂອງ SME ທີ່ຈະໄດ້ຮັບສິນເຊື່ອ ສໍາລັບທຶນທີ່ລັດຖະບານປະກອບໃຫ້ ຕ້ອງມີແຜນດຳເນີນທຸລະກິດທີ່ຈະແຈ້ງ ແລະ ຊັດເຈນ, ໄດ້ຮັບການຝຶກອົບຮົມສ້າງຄວາມເຂັ້ມແຂງຈາກຂະແໜງ ອຄ ຫຼື ພາກສ່ວນອື່ນ ທີ່ໄດ້ຮັບການຢັ້ງຢືນຢ່າງເປັນທາງການ, ເປັນວິສາຫະກິດທີ່ຖືບັນຊີຕາມກົດໝາຍວ່າດ້ວຍການບັນຊີ ແລະ ບໍ່ເປັນໜີ້ບໍ່ເກີດດອກອອກຜົນ ຢູ່ນຳທະນາຄານທຸລະກິດ ຫຼື ສະຖາບັນການເງິນອື່ນ, ເປັນຂະແໜງການ ຫຼື ຂົງເຂດບູລິມະສິດທີ່ລັດຖະບານມີຜົນຕອບແທນດ້ານທຸລະກິດ ເພື່ອຮັບປະກັນໃຫ້ ທສວ ມີຄວາມຍືນຍົງ ແລະ ທຶນແຫຼ່ງອື່ນ ຕ້ອງປະຕິບັດຕາມເງື່ອນໄຂຂອງຜູ້ໃຫ້ທຶນ ຫຼື ຕາມການພິຈາລະນາຂອງສະພາບໍລິຫານ ທສວ.

ການສະໜອງສິນເຊື່ອຂອງກອງທຶນ ນັບແຕ່ປີ 2012 ຮອດເດືອນ ກໍລະກົດ 2020 ສາມາດປ່ອຍສິນເຊື່ອໄດ້ຈຳນວນ 460 ສັນຍາ ສຳລັບ SME 349 ຫົວໜ່ວຍ ແລະ ສະໜອງທຶນໃຫ້ໂຄງການວິຊາການ ໄດ້ຈຳນວນ 53 ໂຄງການ ລວມມູນຄ່າ 3 ຕື້ກ່ວາກີບ.

• Facebook
• Twitter
• Line