ໃນວັນທີ 21 ມິຖຸນາ 2022 ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົງ ພ້ອມຄະນະ ໄດ້ລົງຊຸກຍູ້, ຕິດຕາມໂຄງການຂົວຂ້າມນ້ຳຂອງ ແຫ່ງທີ V ບໍລິຄຳໄຊ-ບຶງການ ໂດຍການນຳພາທາງຂອງ ທ່ານ ວິໄຊ ພູມີ ຫົວໜ້າພະແນກໂຍທາທິການ ແລະ ຂົນສົ່ງແຂວງບໍລິຄຳໄຊ ພ້ອມດ້ວຍຄະນະຮັບຜິດຊອບໂຄງການ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້ທ່ານລັດຖະມົນຕີພ້ອມຄະນະ ໄດ້ຮັບຟັງການລາຍງານຄວາມຄືບໜ້າຂອງໂຄງການ ຈາກທ່ານ ໄລທອງ ພົມມະວົງ ຫົວໜ້າໂຄງການກໍ່ສ້າງຂົວຂ້າມນ້ຳຂອງ ມິດຕະພາບ ລາວ-ໄທ ແຫ່ງທີ V ບໍລິຄໍາໄຊ-ບຶງການ ວ່າ: ເລີ່ມແຕ່ວັນທີ 4 ມັງກອນ 2021 ເປັນຕົ້ນມາ, ຮອດປັດຈຸບັນ ການກໍ່ສ້າງຂົວກາງນໍ້າ ລວມທັງທາງເຂົ້າຫົວຂົວ ປະຕິບັດສໍາເລັດແລ້ວ 38,12%, ລື່ນຄາດໝາຍ +15,12% ແລະ ການກໍ່ສ້າງທາງເຊື່ອມຕໍ່ເຂົ້າຂົວ ແລະ ອາຄານດ່ານ ປະຕິບັດໄດ້ຕົວຈິງ 52,55%, ລື່ນຄາດໝາຍ +3,58%.
ໂຄງການກໍ່ສ້າງຂົວຂ້າມນໍ້າຂອງ ມິດຕະພາບ ລາວ-ໄທ ແຫ່ງທີ V ສະເພາະເບື້ອງລາວ ມີມູນຄ່າທັງໝົດ 1.152.377.622,70 ບາດ, ໃນນັ້ນໄດ້ແບ່ງອອກເປັນ 2 ສັນຍາຄື: ສັນຍາທີ 1 ແມ່ນການກໍ່ສ້າງຂົວຂ້າມນໍ້າຂອງເບື້ອງປະເທດລາວ ມີລວງຍາວທັງໝົດ 535 ແມັດ ແລະ ທາງເຂົ້າຫົວຂົວ ລວງຍາວ 85 ແມັດ, ໄລຍະເວລາກໍ່ສ້າງ 36 ເດືອນ ແລະ ໄລຍະຄໍ້າປະກັນ 24 ເດືອນ ແລະ ສັນຍາທີ 2 ແມ່ນການກໍ່ສ້າງທາງເຂົ້າຂົວ ລວງຍາວທັງໝົດ 2.775 ແມັດ ລວມທັງອາຄານດ່ານ ແລະ ສິ່ງອໍານວຍຄວາມສະດວກອື່ນໆເບື້ອງປະເທດລາວ ໄລຍະເວລາກໍ່ສ້າງ 30 ເດືອນ, ໄລຍະຄໍ້າປະກັນ 24 ເດືອນ.
Users Today : 1211
Users Yesterday : 494
This Month : 9052
This Year : 129089
Total Users : 515313
Who's Online : 38