ສະພາ ແລະ ອົງການປົກຄອງແຂວງ ກຽມຄວາມພ້ອມດ້ານເນື້ອໃນ ໃນກອງປະຊຸມສະໄໝສາມັນເທືອທີ 3 ສະພາປະຊາຊົນແຂວງ ຊຸດທີ II

ກອງປະຊຸມຮ່ວມລະຫວ່າງ ຄະນະປະຈຳສະພາປະຊາຊົນແຂວງ ກັບ ອົງການປົກຄອງແຂວງ ໄດ້ຈັດຂຶ້ນໃນວັນທີ 3 ມິຖຸນາ 2022 ຢູ່ຫ້ອງປະຊຸມສະພາປະຊາຊົນແຂວງ ເປັນປະທານໂດຍ ທ່ານ ປອ ສຸວັນນີ ໄຊຊະນະ ປະທານສະພາປະຊາຊົນແຂວງ ແລະ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ, ມີຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດ, ສະມາຊິກສະພາປາຊາຊົນແຂວງ, ພະແນກການ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການສະຫຼຸບຕີລາຄາການກະກຽມ ແລະ ຜົນສຳເລັດຂອງດຳເນີນ ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ຊຸດທີ II ເຫັນວ່າ ໄດ້ສຸມໃສ່ຫຼາຍວຽກງານສຳຄັນ ແລະ ມີຜົນສຳເລັດໃນຫຼາຍດ້ານ ໂດຍສະເພາະແມ່ນການກະກຽມເນື້ອໃນ ໄດ້ມີການປະສານງານ, ດຳເນີນກອງປະຊຸມ ເພື່ອປຶກສາຫາລື ເອກະສານກ່ຽວກັບເນື້ອໃນ, ຮູບແບບ, ວິທີການດໍາເນີນກອງປະຊຸມ, ຈັດກອງປະຊຸມສຳມະນາ ຍົກສູງຄຸນນະພາບທາງດ້ານເນື້ອໃນຕ່າງໆ ໂດຍໄດ້ນໍາເອົາຮ່າງຕິກຳ 4 ສະບັບ ແລະ ຮ່າງບົດສະຫຼຸບການເຄື່ອນໄຫວວຽກງານປະຈໍາປີ 2021 ແລະ ທິດທາງ 2022 ເຂົ້າຄົ້ນຄວ້າ ປະກອບຄຳເຫັນ ມີຜົນສໍາເລັດຕາມຄາດໝາຍທີ່ວາງໄວ້, ພ້ອມກັນນັ້ນ ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນແຂວງ ຊຸດທີ II ກໍ່ໄດ້ດໍາເນີນໄປດ້ວຍບັນຍາກາດທີ່ຟົດຟື້ນ, ໄດ້ສຸມໃສ່ຄົ້ນຄວ້າ, ພິຈາລະນາ ແລະ ຮັບຮອງເອົາຫຼາຍວຽກງານສຳຄັນ ທີ່ເປັນຈຸດສຸມ ແລະ ທ່າແຮງ ໃນການພັດທະນາເສດຖະກິດ-ສັງຄົມ.

ໄດ້ຮັບຟັງການຜ່ານບັນດາເນື້ອໃນ ທີ່ກອງປະຊຸມຄະນະປະຈຳສະພາປະຊາຊົນ ໄດ້ເປັນເອກະພາບ ກ່ຽວກັບບັນດາເນື້ອໃນ ທີ່ຈະນໍາເຂົ້າຄົ້ນຄວ້າ, ພິຈາລະນາ ແລະ ຮັບຮອງໃນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II, ໄດ້ມີການສະເໜີ, ແລກປ່ຽນ ຖອດຖອນບົນຮຽນ ແລະ ປະກອບຄໍາຄິດຄໍາເຫັນ ຕໍ່ຫຼາຍວຽກງານສຳຄັນ ເປັນຕົ້ນແມ່ນການສ້າງຮ່າງນິຕິກໍາຕ່າງໆ ຕ້ອງໃຫ້ມີຄວາມສອດຄ່ອງ, ຖືກຕ້ອງ ຕາມລະບຽບກົດໝາຍ ແລະ ສາມາດນໍາໃຊ້ໄດ້ແທ້, ການເພີ່ມທະວີເກັບກໍາຂໍ້ມູນ ປະກອບເຂົ້າບົດສະຫຼຸບລາຍງານ ຕ້ອງລະອຽດຖືກຕ້ອງກັບຄວາມເປັນຈິງ, ເພື່ອເຮັດໃຫ້ບັນດາເນື້ອໃນມີຄວາມຄົບຖ້ວນສົມບູນ, ຖືກກັບແຕ່ລະຮາກຖານທ້ອງຖິ່ນ ແລະ ສາມາດນໍາໄປຈັດຕັ້ງປະຕິບັດໄດ້ ເພື່ອຍົກສູງຊີວິດການເປັນຢູ່ຂອງພໍ່ແມ່ປະຊາຊົນ ແລະ ເສດຖະກິດ-ສັງຄົມ ໃຫ້ດີຂຶ້ນ.

• Facebook
• Twitter
• Line