ສະພາປະຊາຊົນແຂວງ ສະຫຼຸບວຽກງານກຳມະການວັດທະນະທໍາ – ສັງຄົມ ແລະ ບັນດາເຜົ່າ

ກອງປະຊຸມຄົບຄະນະກໍາມະການວັດທະນະທໍາ – ສັງຄົມ ແລະ ບັນດາເຜົ່າ ສະພາປະຊາຊົນແຂວງບໍລິຄຳໄຊ ປະຈໍາປີ 2021 ໄດ້ຈັດຂຶ້ນໃນວັນທີ 19 ພຶດສະພາ 2022 ຢູ່ຫ້ອງປະຊຸມສະພາປະຊາຊົນແຂວງ, ເປັນປະທານໂດຍ ທ່ານ ນາງ ຂັນທອງ ພັນທະຈັກ ຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ, ປະທານຄະນະກໍາມະການວັດທະນະທໍາ – ສັງຄົມ ແລະ ບັນດາເຜົ່າ, ໃຫ້ກຽດເຂົ້າຮ່ວມໂດຍ ທ່ານ ໃສຄໍາ ທອງລັດ ກໍາມະການພັກແຂວງ ຮອງປະທານສະພາປະຊາຊົນແຂວງ, ມີກໍາມະການວັດທະນະທໍາ – ສັງຄົມ ແລະ ບັນດາເຜົ່າ, ພະແນກການ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ຄະນະກຳມະການວັດທະນະທຳ – ສັງຄົມ ແລະ ບັນດາເຜົ່າ ໄດ້ເອົາໃຈໃສຫຼາຍວຽກງານສຳຄັນ ເຮັດໃຫ້ໄດ້ຮັບການຈັດຕັ້ງປະຕິບັດ ແລະ ໄດ້ຮັບຜົນສຳເລັດຕາມຄາດໝາຍທີ່ວາງໄວ້ ເປັນຕົ້ນແມ່ນ ວຽກງານສຶກສາອົບຮົມການເມືອງ – ແນວຄິດ, ວຽກງານຈັດຕັ້ງ ແລະ ບຸກຄະລາກອນ, ໄດ້ຄົ້ນຄວ້າປະກອບຄຳເຫັນໃສ່ຮ່າງກົດໝາຍ 16 ສະບັບ ເພື່ອພິຈາລະນາຮັບຮອງໃນກອງປະຊຸມສະໄໝວິສາມັນ ເທື່ອທີ 1 ແລະ ສະໄໝສາມັນເທື່ອທີ 2 ສະພາແຫ່ງຊາດຊຸດທີ IX ແລະ ຮ່າງນິຕິກຳໃຕ້ກົດໝາຍ ຂອງຄະນະປະຈຳສະພາແຫ່ງຊາດ 4 ສະບັບ, ຄົ້ນຄວ້າພິຈາລະນາບັນຫາສຳຄັນພື້ນຖານຂອງຊາດ ແລະ ຮັບຮອງເອົາການສ້າງ ແລະ ປັບປຸງກົດໝາຍ 15 ສະບັບ ໃນກອງປະຊຸມຄັ້ງປະຖົມມະລຶກ, ວິສາມັນ ເທື່ອທີ 1 ແລະ ສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX, ຄົ້ນຄວ້າປະກອບຄຳຄິດຄຳເຫັນໃສ່ນິຕິກຳໃຕ້ກົດໝາຍ 3 ສະບັບ, ຄົ້ນຄວ້າແຜນການສ້າງ ແລະ ປັບປຸງນິຕິກຳຂອງແຂວງ ໄລຍະ 5 ປີ 22 ສະບັບ, ກຽມຄວາມພ້ອມ, ລາຍງານຄວາມຄືບໜ້າການສ້າງ ແລະ ປັບປຸງນິຕິກຳໃຕ້ກົດໝາຍໃນຂົງເຂດວັດທະນະທຳ – ສັງຄົມ ແລະ ບັນດາເຜົ່າ ທີ່ຈະນໍາເຂົ້າຄົ້ນຄວ້າພິຈາລະນາຮັບຮອງໃນກອງປະຊຸມສະໄໝສາມັນ ຂອງສະພາປະຊາຊົນແຂວງ ຊຸດທີ II ລວມມີ 6 ສະບັບ.

ພ້ອມນັ້ນ ຍັງໄດ້ເອົາໃຈໃສຕິດຕາມກວດກາ ແກ້ໄຂຄຳສະເໜີຂອງປະຊາຊົນທີ່ໄດ້ສະເໜີຕໍ່ສະມາຊິກສະພາແຫ່ງຊາດ ແລະ ສະມາຊິກປະຊາຊົນແຂວງ, ຫຼັງຈາກນັ້ນ ຍັງໄດ້ມີການສະເໜີແລກປ່ຽນບົດຮຽນເຊິ່ງກັນ ແລະ ກັນ ເປັນຕົ້ນແມ່ນວຽກງານສາສະໜາ, ວຽກງານສຶກສາ, ວຽກງານສາທາລະນະສຸກ, ການເພີ່ມການພົວພັນຮ່ວມມືຂອງພາກສ່ວນກ່ຽວຂ້ອງ, ການຄົ້ນຄວ້າພິຈາລະນາຄຳສະເໜີ, ຄຳຮ້ອງຂໍຄວາມເປັນທຳຂອງປະຊາຊົນ ແລະ ວຽກງານອື່ນໆ.

ໃນກອງປະຊຸມ ຍັງໄດ້ຮັບຟັງການຜ່ານຮ່າງທິດທາງແຜນການເຄື່ອນໄຫວ 5 ປີ ຂອງຄະນະກຳມະການວັດທະນະທຳ – ສັງຄົມ ແລະ ບັນດາເຜົ່າ, ຮັບຟັງການລາຍງານການຈັດຕັ້ງປະຕິບັດບັນດາຄາດໝາຍວຽກງານສາທາລະນະສຸກ, ແຮງງານສະຫວັດດີການສັງຄົມ ໄລຍະ 1 ປີຜ່ານມາ, ວຽກງານຄຸ້ມຄອງຊົນເຜົ່າ, ສາສະໜາ ແລະ ວຽກງານອື່ນໆ.

• Facebook
• Twitter
• Line