ກອງປະຊຸມຖອດຖອນບົດຮຽນວຽກງານກາແດງ ແລະ ວຽກງານເລືອດ ແຂວງບໍລິຄຳໄຊ ປະຈຳປີ 2021 ໄດ້ຈັດຂຶ້ນໃນວັນທີ 18 ພຶດສະພາ 2022 ຢູ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງ ທ່ານ ບຸນຄໍາ ໄຊເຍ່ຍລໍວື່ ປະທານແນວລາວສ້າງຊາດແຂວງບໍລິຄຳໄຊ, ທ່ານ ຮອງສາສະດາຈານ ດຣ ສີງ ເມໂນລາດ ຮອງປະທານອົງການກາແດງລາວ, ມີພາກສ່ວນກ່ຽວຂ້ອງຈາກກະຊວງ, ຄະນະກຳມະການສົ່ງເສີມການບໍຈາກເລືອດແຂວງ, ຕາງໜ້າພະແນກການອ້ອມຂ້າງແຂວງ ແລະ ເມືອງເຂົ້າຮ່ວມ.
ການເຄື່ອນໄຫວຂອງອົງການກາແດງແຂວງບໍລິຄຳໄຊ 1 ປີຜ່ານມາ ເຫັນວ່າມີຫຼາຍງຽກງານພົ້ນເດັ່ນ ແລະ ໄດ້ຮັບຜົນສຳເລັດ ເປັນຕົ້ນແມ່ນ ປຸກລະດົມບໍລິຈາກເລືອດໄດ້ 117 ຄັ້ງ, ຮັບບໍລິຈາກເລືອດ 2.741 ຖົງ ເທົ່າກັບ 91,36%, ສາມາດກວດເລືອດລະບົບ ABO ແລະ ລະບົບເຣຊຸສ (RH) 5.528 ເທື່ອຄົນ, ກວດພະຍາດນໍາສົ່ງທາງເລືອດ 2.697 ເທື່ອຄົນ ແລະ ສາມາດຈ່າຍເລືອດໃຫ້ໂຮງໝໍແຂວງ, ໂຮງໝໍເມືອງ ແລະ ສູນເລືອດຕ່າງໆ ໄດ້ 2.727 ຖົງ .
ສຳລັບທິດທາງແຜນການ ປີ 2022 ອົງການກາແດງແຂວງບໍລິຄຳໄຊ ຈະສືບຕໍ່ຈັດຕັ້ງປະຕິບັດບັນດາໜ້າວຽກງໃຫ້ສຳເລັດ ດ້ວຍປະສິດທິຜົນສູງສຸດ ໂດຍສະເພາະວຽກງານບໍລິຈາກເລືອດ ໃຫ້ບັນລຸຕົວເລກຄາດໝາຍສູ້ຊົນ ຕາມແຜນຍຸດທະສາດເລືອດແຫ່ງຊາດວາງໃຫ້ ຄື 3.100 ຖົງ.
ໃນກອງປະຊຸມ ຍັງໄດ້ມີການສະເໜີ ແລກປ່ຽນຄໍາຄິດຄໍາເຫັນຮ່ວມກັນ ໃນຫຼາຍວຽກງານສຳຄັນ ເປັນຕົ້ນແມ່ນການໂຄສະນາເຜີຍແຜ່ ຄວາມສຳຄັນຂອງວຽກງານກາແດງ ແລະ ວຽກງານເລືອດ, ການປຸກລະດົມຂົນຂວາຍໃຫ້ທຸກຄົນໃນທົ່ວສັງຄົມ ຮ່ວມໃຈກັນບໍລິຈາກເລືອດໃຫ້ຫຼາຍຂຶ້ນ, ການປະສານງານລະຫວ່າງພາກສ່ວນກ່ຽວຂ້ອງ ແລະ ອື່ນໆ.
ຫຼັງຈາກນັ້ນກໍ່ຍັງໄດ້ມີພິທີມອບໃບຍ້ອງຍໍງທ່ານເຈົ້າແຂວງບໍລິຄຳໄຊ ໃຫ້ 19 ກົມກອງ ແລະ ໃບຊົມເຊີຍ ຂອງທ່ານປະທານອົງການກາແດງແຂວງບໍລິຄໍາໄຊ ໃຫ້ 88 ກົມກອງ ທີ່ມີຜົນງານດີເດັ່ນໃນການເຄື່ອນໄຫວປຸກລະດົມບໍລິຈາກເລືອດ ແລະ ປະກອບສ່ວນຈັດຕັ້ງປະຕິບັດແຜນງານເລືອດ ປະຈຳປີ 2021 ໃຫ້ກຽດມອບໂດຍທ່ານ ບຸນຄໍາ ໄຊເຍ່ຍລໍວື່.
Users Today : 389
Users Yesterday : 1225
This Month : 9455
This Year : 129492
Total Users : 515716
Who's Online : 33