ຫົວໜ້າກອງບັນຊາການ ປກສ ແຂວງ ບໍລິຄຳໄຊ ລົງຢ້ຽມຢາມພົບປະໂອ້ລົມ ແລະ ໃຫ້ທິດຊີ້ນໍາກຳລັງ ປກສ ເມືອງທ່າພະບາດ

 ຕອນບ່າຍວັນທີ 5 ພຶດສະພາ 2022 ທ່ານ ພັນເອກ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ ບໍລິຄຳໄຊ ໄດ້ລົງຢ້ຽມຢາມພົບປະໂອ້ລົມ ແລະ ໃຫ້ທິດຊີ້ນໍາກໍາລັງ ປກສ ເມືອງ ທ່າພະບາດ, ເປັນກຽດຕ້ອນຮັບໂດຍ ທ່ານ ພັນໂທ ດວງໄຊ ຈັນທະວັງໂສ ຫົວໜ້າກອງບັນຊາການ ປກສ ເມືອງ ທ່າພະບາດ ພ້ອມດ້ວຍຄະນະ, ມີບັນດາພະນັກງານຫຼັກແຫຼ່ງຂັ້ນບັນຊານຳພາ ເຂົ້າຮ່ວມ.

 ທ່ານ ພັນໂທ ດວງໄຊ ຈັນທະວັງໂສ ໄດ້ລາຍງານສະພາບຂອງເມືອງໂດຍຫຍໍ້ ໃຫ້ທ່ານປະທານໄດ້ຮັບຊາບ ວ່າ: ໃນໄລຍະຜ່ານມາ ຄະນະພັກກອງບັນຊາການ ປກສ ເມືອງໄດ້ຢຶດໝັ້ນຫຼັກການນໍາພາຂອງພັກ ແລະ ສຸມໃສ່  ຫຼັກການ 3 ທິດນໍາ ເພື່ອເປັນທິດທາງໃນການຈັດຕັ້ງຜັນຂະຫຍາຍ ບັນດາມາດຕະການທີ່ກໍານົດໄວ້ໃນວາລະແຫ່ງຊາດ ຄື: ຄວາມເດັດຂາດ, ຄວາມໂປ່ງໃສ ແລະ ຄວາມເປັນມືອາຊີບ ຂອງກຳລັງປ້ອງກັນຄວາມສະຫງົບເມືອງ, ຈຸດປະສົງ ກໍ່ເພື່ອເປັນການປຸກລະດົມ, ຂົນຂວາຍທຸກກໍາລັງແຮງໃນທົ່ວສັງຄົມ ເຂົ້າໃນການແກ້ໄຂບັນຫາປະກົດການຫຍໍ້ທໍ້ທີ່ເກີດຂື້ນ, ບັນຫາຢາເສບຕິດ ທີ່ລະບາດເປັນວົງກວ້າງ ແລະ ຮຸນແຮງໃຫ້ຫຼຸດລົງ, ສ້າງໃຫ້ສັງຄົມມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ, ເຮັດໃຫ້ທົ່ວເມືອງມີຄວາມສະຫງົບ.

 ໃນຕອນທ້າຍ ທ່ານ ພັນເອກ ກົງຈັນ ໄຊປັນຍາ ກໍ່ໄດ້ໃຫ້ກຽດໂອ້ລົມ ພ້ອມທັງເນັ້ນໜັກໃຫ້ຄະນະພັກ – ຄະນະບັນຊາ ກໍາລັງ ປກສ ເມືອງ ທ່າພະບາດ ທຸກສະຫາຍ ຈົ່ງພ້ອມກັນຈັດຕັ້ງປະຕິບັດ 4 ແຜນງານໃຫຍ່ ແລະ 41 ໂຄງການຂອງກະຊວງ ປກສ ວາງອອກ ພ້ອມທັງຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ດ້ວຍຄວາມຮັບຜິດຊອບສູງ, ຖືເປັນບູລິມະສິດອັນດັບໜຶ່ງໃນການແກ້ໄຂບັນຫາປະກົດການຫຍໍ້ທໍ້ໃນສັງຄົມ, ທ່ານຍັງຮຽກຮ້ອງມາຍັງຄະນະພັກຄະນະບັນຊາ ຕ້ອງມີຄວາມສາມັກຄີຢ່າງແໜ້ນແຟ້ນ ພ້ອມກັນເຮັດວຽກງານສຶກສາອົບຮົມການເມືອງ – ແນວຄິດໃຫ້ແກ່ພະນັກງານ – ນັກຮົບໃຫ້ເປັນປົກກະຕິຕໍ່ເນື່ອງ, ໃກ້ຊິດຕິດແທດ ຊີ້ນໍາບັນດາເລົ່າລົບວິຊາສະເພາະ, ປກສ ກຸ່ມບ້ານໃຫ້ຕັດສິນໃຈສູງໃນການປະຕິບັດວຽກງານຕ່າງໆ, ມີຄວາມຊື່ສັດບໍລິສຸດ, ບໍ່ສວຍໃຊ້ໜ້າທີ່ຕໍາແໜ່ງ, ດໍາເນີນຄະດີຕໍ່ຜູ້ກະທໍາຜິດຢ່າງຖືກຕ້ອງ, ພາວະວິໄສ, ຍຸຕິທໍາ, ສືບຕໍ່ປັບປຸງສ້າງຄອບຄົວ ແລະ ບ້ານປ້ອງກັນຄວາມສະຫງົບດີໃຫ້ໄດ້ຮ້ອຍສ່ວນຮ້ອຍ  ເພື່ອເຮັດໃຫ້ພາຍໃນເມືອງທ່າພະບາດ ຮັບປະກັນໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ກາຍເປັນເມືອງປອດຢາເສບຕິດຢ່າງສິ້ນເຊີງ.

 

• Facebook
• Twitter
• Line