ພິທີປາຖະກະຖາ ວັນສ້າງຕັ້ງຊາວໜຸ່ມ ປະຊາຊົນ ປະຕິວັດລາວ ຄົບຮອບ 67 ປີ ( 14 ເມສາ 1955 – 14 ເມສາ 2022 ) ໄດ້ຈັດຂຶ້ນໃນຕອນເຊົ້າຂອງວັນທີ 3 ພຶດສະພາ 2022 ຢູ່ຫ້ອງປະຊຸມສະພາປະຊາຊົນແຂວງ ໃຫ້ກຽດປາຖະກະຖາ ໂດຍທ່ານ ໃສຄໍາ ທອງລັດ ຮອງປະທານສະພາປະຊາຊົນແຂວງ, ມີເລຂາ, ຮອງເລຂາຊາວໜຸ່ມຮາກຖານສະພາປະຊາຊົນແຂວງ ແລະ ສະມາຊິກຊາວໜຸ່ມ ພາຍໃນສະພາປະຊາຊົນແຂວງເຂົ້າຮ່ວມ.
ທ່ານ ໃສຄໍາ ທອງລັດ ໄດ້ຍົກໃຫ້ເຫັນປະຫວັດຄວາມເປັນມາຂອງຊາວໜຸ່ມປະຊາຊົນປະຕິວັດລາວວ່າ: ຫຼາຍຮ້ອຍປີແຫ່ງການເຕົ້າໂຮມ, ການປົກປັກຮັກສາ ແລະ ສ້າງສາພັດທະນາປະເທດຊາດນັ້ນ, ຊາວໜຸ່ມຈໍານວນບໍ່ໜ້ອຍ ໄດ້ເສຍສະຫຼະຊີວິດ, ເລືອດເນື້ອ ເພື່ອປົກປັກຮັກສາເອກະລາດ ແລະ ຜືນແຜ່ນດີນອັນແສນຮັກຂອງຕົນ, ຜ່ານຂະບວນການດັ່ງກ່າວນັ້ນ ໄດ້ມີບັນພະບູລຸດທີ່ມີຊື່ສຽງເຊັ່ນ: ເຈົ້າຂຸນບູລົມ, ເຈົ້າຟ້າງຸ່ມ, ເຈົ້າສຸລິຍະວົງສາ, ເຈົ້າໄຊເສດຖາທິລາດ, ເຈົ້າອານຸວົງ, ປະທານໄກສອນ ພົມວິຫານ ແລະ ທ່ານອືື່ນໆ ໄດ້ນໍາພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງສັດຕູພາຍນອກ ໄດ້ນໍາພາປະເທດຊາດ ຜ່ານພາຍຸລົມແດງ ໃນແຕ່ລະຍຸກແຕ່ລະສະໄໝ ແລະ ຮັກສາດີນແດນໄວ້ໄດ້ຢ່າງໝັ້ນຄົງ, ມີນໍ້າໃຈຮັກເຊື້ອແພງຊາດບໍ່ຍອມຈໍານົນສັດຕູ, ນໍ້າໃຈເສຍສະຫຼະເລືອດເນື້ອເພື່ອຊາດ, ຍ້ອນໄດ້ຖືກອົບຮົມບົ່ມສອນມາແຕ່ຕອນຍັງໝຸ່ມ, ທັງໝົດນັ້ນ ແມ່ນມູນເຊື້ອອັນລວມຍອດຂອງຊາວໜຸ່ມລາວ ທີ່ຕອບສະໜອງຄວາມຮຽກຮ້ອງຕ້ອງການຂອງປະເທດຊາດ ເຮັດສໍາເລັດພາລະກໍາປະຫວັດສາດຊາດຂອງຕົນ ເສີມຂະຫຍາຍບົດບາດປະຈັນບານ ເຂົ້າໃນສອງໜ້າທີ່ຍຸດທະສາດຄື: ການປົກປັກຮັກສາ ແລະ ສ້າງສາພັດທະນາປະເທດຊາດ.
ຍ້ອນເຫັນໄດ້ບົດບາດ, ໜ້າທີ່ ແລະ ຄວາມຈົ່ງຮັກພັກດີຂອງຊາວໜຸ່ມ ຕໍ່ພັກ, ຕໍ່ປະເທດຊາດ , ພັກປະຊາຊົນປະຕິວັດລາວ ຈື່ງຖືເອົາ ວັນທີ 14 ເມສາ 1955 ເປັນວັນສ້າງຕັ້ງ ຄະນະຊາວໜຸ່ມປະຊາຊົນປະຕິວັດລາວ ເປັນວັນສຳຄັນຍິ່ງໃຫ່ຍແຫ່ງການເຕົ້າໂຮມຄວາມສາມັກຄີຊາວໜຸ່ມລາວບັນດາເຜົ່າ ເປັນວັນແຫ່ງການສຶກສາຮ່ຳຮຽນ ແລະ ສືບທອດມູນເຊື້ອຊາວໜຸ່ມຮຸ່ນກ່ອນ, ເພື່ອເຮັດໃຫ້ພາລະບົດບາດຂອງອົງການຈັດຕັ້ງ ຊາວໜຸ່ມປະຊາຊົນປະຕິວັດລາວ ກວ້າງຂວາງສູງສົ່ງ ແລະ ໜັກແໜ້ນເຂັ້ມແຂງຂື້ນ, ສືບຕໍ່ສ້າງຜົນງານຂ່ຳນັບຮັບຕ້ອນວັນສຳຄັນຂອງພັກ-ຂອງຊາດ ໃຫ້ເປັນຂະບວນຟົດຟື້ນຕໍ່ເນື່ອງ ຊາວໜຸ່ມຈົ່ງນຳໜ້າ, ປະຈັນບານ ເຂົ້າໃນໜ້າທີ່ວຽກງານໃຫ້ສົມກັບ ປະທານໄກສອນ ພົມວິຫານ ຂະໝານນາມໄວ້ວ່າ: “ ຊາວໜຸ່ມຈົ່ງກາຍເປັນດັ່ງນົກອິນຊີ ທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງກາຍເປັນສິນໄຊ ແຫ່ງຍຸກສະໄໝພວກເຮົາ ”. ນອກນັ້ນ ຍັງໄດ້ຍົກໃຫ້ເຫັນ ຜົນງານການເຄື່ອນໄຫວຂອງຄະນະບໍລິຫານງານຊາວໜຸ່ມແຂວງບໍລິຄໍາໄຊ ໃນໄລຍະຜ່ານມາ ທີ່ໄດ້ສຸມທຸກສະຕິເຫື່ອແຮງເຂົ້າໃນການເຄື່ອນໄຫວວຽກງານວິຊາສະເພາະ, ວຽກງານຊາວໜຸ່ມ, ວຽກງານຂະບວນການ ແລະ ການຊ່ວຍເຫຼືອສັງຄົມ ເຊີ່ງໄດ້ມີຫຼາຍຜົນງານທີ່ພົ້ນເດັ່ນ ແລະ ພ້ອມກັນເຮັດສໍາເລັດທຸກໜ້າຕາມການຈັດຕັ້ງຂັ້ນເທິງມອບໝາຍ.
ກອງປະຊຸມໄດ້ຮັບຟັງ ການສະຫຼຸບຕີລາຄາ ການຈັດຕັ້ງປະຕິບັດວຽກງານ ຊາວໜຸ່ມຮາກຖານສະພາປະຊາຊົນແຂວງ ໃນໄລຍະ 3 ເດືອນ ແລະ ທິດທາງແຜນການໃນຕໍ່ໜ້າ ປີ 2022 ແລະ ເອກະສານບົດແນະນໍາການຈັດຕັງປະຕິບັດ ກົດລະບຽບຄະນະຊາວໜຸ່ມປະຊາຊົນ ປະຕິວັດລາວ ສະໄໝທີ່ VIII.
Users Today : 553
Users Yesterday : 1225
This Month : 9619
This Year : 129656
Total Users : 515880
Who's Online : 20