ຮອງປະທານສະພາແຂວງ ລົງເຄື່ອນໄຫວຊຸກຍູ້ຂະແໜງສຶກສາ ທີ່ເມືອງວຽງທອງ

    ໃນວັນທີ 19 ເມສາ 2022 ທ່ານ ໃສຄໍາ ທອງລັດ ກໍາມະການພັກແຂວງ ຮອງປະທານສະພາປະຊາຊົນແຂວງ ບໍລິຄໍາໄຊ ແລະ ທ່ານ ນາງ ຂັນທອງ ພັນທະຈັກ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ, ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ພ້ອມດ້ວຍວິຊາການ, ພາກສ່ວນທີ່ກ່ຽວຂ້ອງຂັ້ນແຂວງ, ຂັ້ນເມືອງ ໄດ້ລົງເຄື່ອນໄຫວຊຸກຍູ້, ຕິດຕາມ, ກວດກາການຈັດຕັ້ງປະຕິບັດບັນດາຄາດໝາຍໃນຂົງເຂດສຶກສາທິການ ແລະ ກິລາ ຢູ່ເມືອງ ວຽງທອງ.

    ຈຸດປະສົງໃນການເຄື່ອນໄຫວໃນຄັ້ງນີ້ ເພື່ອຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດາຄາດໝາຍໃນຂົງເຂດສຶກສາທິການ ແລະ ກິລາ, ການປັບປຸງຄຸນນະພາບການຮຽນ – ການສອນທຸກຊັ້ນທຸກສາຍໃນໄລຍະໃໝ່ ແລະ ການຈັດຕັ້ງປະຕິບັດວຽກງານກິລາ-ກາຍຍະກໍາຕາມມະຕິກອງປະຊຸມສະພາແຫ່ງຊາດທີ່ໄດ້ຮັບຮອງໃຫ້ມີຈຸດສຸມ, ປະສິດທິພາບ ແລະ ປະສິດທິຜົນ ເຊິ່ງໄດ້ຈັດກອງປະຊຸມ ເພື່ອຮັບຟັງການລາຍງານການຈັດຕັ້ງປະຕິບັດວຽກງານຈາກພາກສ່ວນຕ່າງໆໃນຂົງເຂດການສຶກສາ ຢູ່ຫ້ອງປະຊຸມຊັ້ນ III ຫ່ອງວ່າການເມືອງ ວຽງທອງ.

ພ້ອມກັນນັ້ນ ຄະນະດັ່ງກ່າວ ຍັງໄດ້ລົງຢ້ຽມຢາມ, ຕິດຕາມ ການຮຽນ – ການສອນ ແລະ ເບິ່ງອາຄານຂອງໂຮງຮຽນ ມສ ວຽງທອງ, ໂຮງຮຽນ ປະຖົມສົມບູນຫ້ວຍຫອຍ, ໂຮງຮຽນອະນຸບານນ້ຳຢ້າງ, ໂຮງຮຽນອະນຸບານຈະເລີນຮຸ່ງເຮື່ອງ.

ເນື່ອງໃນໂອກາດທີ່ທ່ານຮອງປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ມາເຄື່ອນໄຫວເຮັດວຽກ ແລະ ຢ້ຽມຢາມໂຮງຮຽນໃນຄັ້ງນີ້ ໄດ້ນຳເອົາອຸປະກອນການຮຽນຈຳນວນໜື່ງມອບໃຫ້ນ້ອງນັກຮຽນຜູ້ທີ່ດ້ວຍໂອກາດ.

• Facebook
• Twitter
• Line