ບັນຍາກາດມື້ທີສອງຂອງການຫຼີ້ນບຸນຕຸດສົງການປີໃໝ່ລາວ 2565

ໃນວັນທີ 15 ເມສາ 2022 ເປັນມື້ທີສອງຂອງບຸນຕຸດສົງການປີໃໝ່ລາວ 2565 ໄດ້ໝູນວຽນມາຮອດອີກຄັ້ງໜື່ງ ເຖິງປີນີ້ຈະຖືກຜົນກະທົບຈາກ ໂຄວິດ-19 ແຕ່ບັນຍາກາດຂອງກິດຈະກຳທາງສາສະໜາ ແລະ ວັດທະນະທຳ ຂອງພໍ່ແມ່ປະຊາຊົນ ກໍ່ຍັງຮັກສາໄດ້ຄືກັບທຸກໆປີ.

ບຸນຕຸດສົງການປີນີ້ ອອກຕົນຍາດໂຍມທັງຫຼາຍຈະໄດ້ເຂົ້າມາເຕົ້າໂຮມຢູ່ວັດ ເພື່ອເຮັດພິທີອັງເຊີນພຣະພຸດທະຮູບລົງຫົດສົງ ຕາມຮີດຄອງປະເພນີ. ການສົງພຣະນີ້ ກໍ່ແມ່ນເພື່ອເປັນສິລິມົງຄຸນແກ່ຕົວເອງ ແລະ ຄອບຄົວ, ນອກນັ້ນ ຍັງເປັນການຮັກສາວັດທະນະທຳ, ຮີດຄອງປະເພນີອັນດີງາມຂອງຊາດ ທີ່ບັນພະບູລຸດຂອງເຮົາໄດ້ປະຕິບັດມາແຕ່ບູຮານນະການໄວ້ໃຫ້ຄົງຢູ່ກັບຊາດລາວຕະຫຼອດໄປ. ລູກຫຼານທີ່ເກີດໃໝ່ໃຫຍ່ລຸນ ກໍ່ໄດ້ຮັກສາຮີດຄອງປະເພນີອັນດີງາມນີ້ໄວ້ ການເຂົ້າວັດສົງພຣະກໍ່ຕ້ອງແຕ່ງກາຍໃຫ້ເປັນລະບຽບຮຽບຮ້ອຍ ຜູ້ຍິງກໍ່ຄວນນຸ່ງສິ້ນ ແລະ ເສື້ອທີ່ມິດຊິດບໍ່ໃຫ້ບາງຈົນເກີນໄປ, ການຫຼິ້ນນ້ຳກໍ່ຕ້ອງໃຊ້ນ້ຳທີ່ສະອາດ ບໍ່ຄວນໃຊ້ນ້ຳສີ ຫຼື ໃຊ້ຖົງຢາງດຶກແກ່ງໃສ່ກັນ.

ການຫຼິ້ນນ້ຳປີນີ້ ເຫັນວ່າທຸກຄົນມີຄວາມລະມັດລະວັງ ເປັນລະບຽບຮຽບຮ້ອຍ ຖືກຕາມຮີດຄອງປະເພນີ, ຖືກລະບຽບທີ່ວາງອອກ ແລະ ປະຕິບັດຕາມມາດຕະການປ້ອງກັນພະຍາດ ໂຄດວິດ-19.

• Facebook
• Twitter
• Line