ການນຳແຂວງຮ່າຕິ້ງ ອວຍພອນການນຳແຂວງບໍລິຄຳໄຊ ເນື່ອງໃນໂອກາດປີໃໝ່ລາວ

ໃນວັນທີ 9 ເມສາ 2022 ຢູ່ຫ້ອງຮັບຮອງຂອງແຂວງ ທ່ານ ຮວ່າງຈຸງຢຸ້ງ ກຳມະການຄະນະບໍລິຫານງານສູນກາງພັກກອມມູນິດຫວຽດນາມ, ເລຂາພັກແຂວງ, ປະທານສະພາປະຊາຊົນແຂວງ, ຫົວໜ້າຄະນະຜູ້ແທນສະພາແຫ່ງຊາດ ປະຈຳແຂວງຮ່າຕິ້ງ ສາທາລະນະລັດ ສັງຄົມນິຍົມ ຫວຽດນາມ ພ້ອມຄະນະ ໄດ້ນຳເອົາກະຕ່າດອກໄມ້ ເຂົ້າອວຍພອນການນຳ ແຂວງ ບໍລິຄຳໄຊ ເນື່ອງໃນໂອກາດວັນບຸນປີໃໝ່ລາວ ພສ 2565 ທີ່ຈະມາເຖິງນີ້, ໂດຍການຕ້ອນຮັບຢ່າງອົບອຸ່ນສະໜິດສະໜົມຈາກ ທ່ານ ປອ ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະບໍລິຫານງານພັກແຂວງບໍລິຄຳໄຊ ພ້ອມຄະນະ.

ໂອກາດນີ້ ທ່ານ ປອ ກອງແກ້ວ ໄຊສົງຄາມ ໄດ້ຕາງໜ້າໃຫ້ຄະນະພັກ, ຄະນະປົກຄອງແຂວງ, ສະພາປະຊາຊົນແຂວງ ແລະ ປະຊາຊົນບັນດາເຜົ່າ ສະແດງຄວາມຂອບອົກຂອບໃຈເປັນຢ່າງສູງ ຕໍ່ຄະນະນຳແຂວງຮ່າຕິ້ງ ພິເສດແມ່ນທາງດ້ານການສຶກສາ ທີ່ໄດ້ໃຫ້ທຶນຕໍ່ແຂວງບໍລິຄຳໄຊ ໄປສຶກສາຢູ່ແຂວງຮ່າຕິ້ງຫຼາຍພໍສົມຄວນ.

ພ້ອມນີ້ ຍັງເປັນການສະແດງເຖິງໄມຕີຈິດມິດຕະພາບ, ສະໜິດສະໜົມ, ຄວາມສາມັກຄີແບບພິເສດ ລະຫວ່າງສອງຊາດລາວ – ຫວຽດນາມ, ຫວຽດນາມ – ລາວ ເວົ້າລວມ, ເວົ້າສະເພາະ ກໍ່ຄືແຂວງບໍລິຄຳໄຊ ແລະ ແຂວງຮ່າຕິ້ງ, ຍັງເປັນການເພີ່ມພູນຄູນສ້າງສາຍພົວພັນແບບພິເສດ ລະຫວ່າງສອງຊາດລາວ – ຫວຽດນາມ, ຫວຽດນາມ – ລາວ ອັນທີ່ເປັນມູນເຊື້ອມາແຕ່ບູຮານນະການ, ຊຶ່ງຍາມໃດກໍ່ໄດ້ມີການອຸ້ມຊູຊ່ວຍເຫຼືອເຊິ່ງກັນ ແລະ ກັນ ຕະຫຼອດມາ.

ໂອກາດມາຢ້ຽມຢາມໃນຄັ້ງນີ້ ແຂວງຮ່າຕິ້ງ ຍັງໄດ້ມອບຊຸດກວດວິເຄາະພະຍາດ ໂຄວິດ – 19 ແບບ ATK ຈຳນວນ 5000 ຊຸດ ໃຫ້ແຂວງບໍລິຄຳໄຊ.

• Facebook
• Twitter
• Line