ຄະນະເສດຖະສາດ ແລະ ບໍລິຫານທຸລະກິດ ມຊ ແລະ ວິທະຍາໄລ ບໍລິຫານທຸລະກິດ ຄອມບີຊ ຮ່ວມມືດ້ານວິຊາການ

ພິທີເຊັນສັນຍາ ( MOA ) ວ່າດ້ວຍການຮ່ວມມືທາງດ້ານວິຊາການ ລະຫວ່າງ ຄະນະເສດຖະສາດ ແລະ ບໍລິຫານທຸລະກິດ ( ຄສບ ) ມະຫາວິທະຍາໄລແຫ່ງຊາດ ແລະ ວິທະຍາໄລ ບໍລິຫານທຸລະກິດ ຄອມບີຊ ( ວຄບ ) ໄດ້ຈັດຂື້ນໃນຕອນເຊົ້າຂອງວັນທີ 08 ເມສາ 2022 ຢູ່ຫ້ອງປະຊຸມຂອງວິທະຍາໄລ ຄອມບີຊ ເມືອງປາກຊັນ ແຂວງບໍລິຄຳໄຊ, ຕາງໜ້າ ຄະນະເສດຖະສາດ ແລະ ບໍລິຫານທູລະກິດ ມຊ ເຊັນໂດຍທ່ານ ຮສ. ປອ ພູເພັດ ກ້ຽວພິລາວົງ ຄະນະບໍດີຄະນະເສດຖະສາດ ແລະ ບໍລິຫານທຸລະກິດ ແລະ ຕາງໜ້າ ວິທະຍາໄລຄອມບີຊ ເຊັນໂດຍທ່ານ ສີສົມເພັດ ສີສຸກແສນບັນດິດ ອຳນວຍການວິທະຍາໄລ ຄອມບີຊ, ຊ້ອງໜ້າໂດຍທ່ານ ຮສ ໂພສີ ທິບດາວັນ ຮອງອະທິບໍດີ ມະຫາວິທະຍາໄລແຫ່ງຊາດ ແລະ ທ່ານ ສີທາ ແກ້ວດາລາວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະ ແລະ ພະນັກງານທັງສອງຝ່າຍ ເຂົ້າຮ່ວມເປັນສັກຂີພິຍານ.

ຈຸດປະສົງ ກໍ່ເພື່ອເລັ່ງໃສ່ຍຸດທະສາດແຜນພັດທະນາການສຶກສາໃນໄລຍະໃໝ່ ໃຫ້ມີຄຸນນະພາບ ໂດຍສະເພາະນັກສຶກສາວິທະຍາໄລ ຄອມບີຊ ໃຫ້ມີຄຸນນະພາບ ທາງດ້ານຄຸນສົມບັດ – ຄວາມຮູ້ຄວາມສາມາດເປັນທີ່ຍອມຮັບຂອງສັງຄົມ ເພື່ອປະກອບສ່ວນໃນການສ້າງສາພັດທະນາປະເທດຊາດ ໃຫ້ຈະເລີນຂຶ້ນເທື່ອລະກ້າວ.

ທັງສອງພາກສ່ວນ ໄດ້ຕົກລົງເຫັນດີຮ່ວມມືກັນດ້ານວິຊາການ ເຊິ່ງມີລາຍລະອຽດດັ່ງນີ້: ຄະນະເສດຖະສາດ ແລະ ບໍລິຫານທຸລະກິດ  ປະເມີນຫຼັກສູດການສຶກສາລະດັບຊັ້ນສູງ (ອະນຸປະລິນຍາ) ຂອງສາຂາວິຊາບໍລິຫານທຸລະກິດ ທີ່ໄດ້ຮັບອະນຸມັດນໍາໃຊ້ຈາກກົມອາຊີວະສຶກສາມາແລ້ວ ເພື່ອປັບປຸງໃຫ້ສາມາດເຊື່ອມກັບຫຼັກສູດລະດັບປະລິນຍາຕີ ຂອງພາກວິຊາບໍລິຫານທຸລະກິດລະບົບຕໍ່ເນື່ອງ ຂອງຄະນະເສດຖະສາດ ແລະ ບໍລິຫານທຸລະກິດ ມຊ ໄດ້, ຊ່ວຍເຫຼືອເອກະສານ ຄູ່ມື, ຕຳລາສອນ ຫຼື ຄູ່ມືອື່ນທີ່ຈຳເປັນຕໍ່ການບໍລິຫານວິຊາການ, ຈັດອາຈານສອນຊ່ວຍບາງວິຊາທີຈຳເປັນ, ຈັດອາຈານທີ່ປຶກສາ ແລະ ນຳພາການຂຽນບົດໂຄງການຈົບຊັ້ນ, ພິຈາລະນາຈັດຝຶກອົບຮົມ, ສຳມະນາ ເພື່ອພັດທະນາວິຊາການ ແລະ ຄູສອນ ໃນຫົວຂໍ້ທີ່ທາງ ວຄບ ຕ້ອງການ, ພິຈາລະນາສະເໜີຕໍ່ ມຊ ເພື່ອຂໍອະນຸມັດຈັດຫຼັກສູດປະລິນຍາຕີຕໍ່ເນື່ອງ ໂດຍໃຫ້ວິທະຍາໄລ ຄອມບີຊ ເປັນສາຂາໃຫ້ຜູ້ຈົບການສຶກສາ ສາມາດສະເໜີຕໍ່ ມຊ ໄດ້ ແລະ ພິຈາລະນາໃຫ້ໂຄຕານັກສຶກສາທີ່ຈົບຮຽນໃໝ່ ຂອງ ວຄບ ທີ່ຮຽນເກັ່ງ ສາຍບໍລິຫານທຸລະກິດ ເຂົ້າຮຽນຕໍ່ເນື່ອງຢູ່ພາກວິຊາບໍລິຫານທຸລະກິດ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດຕາມຄວາມເໝາະສົມ.

• Facebook
• Twitter
• Line