ສຳເລັດກອງປະຊຸມໃຫຍ່ ຄັ້ງທີ V ຂອງໜ່ວຍພັກຂະແໜງຈັດຕັ້ງ – ບໍລິຫານ, ບັນຊີ ແລະ ກວດກາ

ກອງປະຊຸມໃຫຍ່ ຄັ້ງທີ V ຂອງໜ່ວຍພັກຂະແໜງຈັດຕັ້ງ-ບໍລິຫານ, ບັນຊີ ແລະ ກວດກາ ໄດ້ຈັດຂຶ້ນໃນຕອນເຊົ້າຂອງວັນທີ 07 ເມສາ 2022 ຢູ່ຫ້ອງປະຊຸມຂອງພະແນກການເງິນແຂວງ ໂດຍພາຍໃຕ້ການເປັນປະທານ ສະຫາຍ ດວງຕາ ເພຍແກ້ວ ເລຂາໜ່ວຍພັກຂະແໜງຈັດຕັ້ງ-ບໍລິຫານ, ບັນຊີ ແລະ ກວດກາ, ໃຫ້ກຽດເຂົ້າຮ່ວມໂດຍ ສະຫາຍ ບຸນລ້ຽງ ດວງສະເພົາທອງ ກຳມະການພັກແຂວງ ຫົວໜ້າພະແນກການເງິນແຂວງ ແລະ ສະຫາຍ ວັນໄຊ ເງຍຈັນທະສອນ ຮອງຫົວໜ້າຄະນະຈັດຕັ້ງແຂວງ, ມີຄະນະພະແນກ, ຄະນະຮັບຜິດຊອບຂັ້ນແຂວງ, ສະມາຊິກພັກພາຍໃນຂະແໜງ ແລະ ແຂກຖືກເຊີນ ເຂົ້າຮ່ວມ.

ໜ່ວຍພັກຂະແໜງຈັດຕັ້ງ-ບໍລິຫານ, ບັນຊີ ແລະ ກວດກາ ເປັນໜ່ວຍພັກໜຶ່ງທີ່ມີພາລະບົດບາດເປັນເສນາທິການໃຫ້ແກ່ຄະນະພັກພະແນກການເງິນແຂວງ ປະກອບມີພະນັກງານ-ລັດຖະກອນທັງໝົດ 28 ສະຫາຍ, ຍິງ 14 ສະຫາຍ ໃນນີ້ ມີສະມາຊິກພັກ 21 ສະຫາຍ ຍິງ 08 ສະຫາຍ.

ຕະຫຼອດໄລຍະ 5 ປີ ຜ່ານມາ ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ສະມາຊິກພັກ, ພະນັກງານ ເປັນວຽກງານສໍາຄັນຕົ້ນຕໍ ໃນການນໍາພາ – ຊີ້ນຳ ເພື່ອຍົກສູງຄຸນທາດການເມືອງ, ຄຸນສົມບັດສິນທຳປະຕິວັດ, ຮັບປະກັນຄວາມເປັນເອກະພາບ ແລະ ຜົນສຳເລັດ ເຊິ່ງສະແດງອອກຄື: ການຈັດຕັ້ງເຊື່ອມຊຶມແນວທາງ, ມະຕິ, ຄໍາສັ່ງ, ກົດລະບຽບພັກ, ກົດໝາຍ ແລະ ລະບຽບການຕ່າງໆຂອງລັດ ໄດ້ 36 ຄັ້ງ, ໃນແຕ່ລະປີມີສະມາຊິກພັກປະເພດແຂງກວມ 95% ຂຶ້ນໄປ, ສະມາຊິກພັກໄປຍົກລະດັບ ດ້ານທິດສະດີການເມືອງຂັ້ນຕົ້ນ 45 ວັນ 6 ສະຫາຍ ຍິງ 5 ສະຫາຍ, ປະລີນຍາໂທ 1 ສະຫາຍ.

ວຽກງານບັນຊີວິສາຫະກິດ ໄດ້ແນະນໍາການຖືບັນຊີ, ກວດກາການຖືບັນຊີ, ອອກໃບຕິດຕາມການຖືບັນຊີ, ຂື້ນທະບຽນການແຕ່ງຕັ້ງພະນັກງານບັນຊີ ພ້ອມໄດ້ນຳໃຊ້ລະບຽບການດ້ານບັນຊີ ເລກທີ 531/ກງ, ລົງວັນທີ 26 ກຸມພາ 2016 ຕໍ່ຫົວໜ່ວຍບັນຊີ ທີ່ປະຕິບັດບໍ່ທັນຄົບຖ້ວນ ຕາມມາດຕະຖານການຖືບັນຊີ ເປັນເງິນມອບເຂົ້າງົບປະມານທັງໝົດ 659 ລ້ານກີບ, ຈັດເກັບເງິນຄ່າບໍລິການໄດ້ທັງໝົດ 107,6 ລ້ານກີບ, ເກັບກູ້ພັນທະງົບປະມານທີ່ເຊື່ອງອໍາ ແລະ ຕົກເຮ່ຍເສຍຫາຍໄດ້ທັງໝົດ ມອບເຂົ້າງົບປະມານລັດ ຈຳນວນ 99 ລ້ານກ່ວາກີບ.

ໃນແຕ່ລະສົກປີງົບປະມານ ຜ່ານການປະສານສົມທົບກວດກາຄືນ ເຫັນວ່າ ຫຼາຍຫົວໜ່ວຍງົບປະມານໄດ້ມີຄວາມເປັນເຈົ້າການ, ມີຄວາມຈິງໃຈແກ້ໄຂ ໂດຍສອດຄ່ອງກັບຄຳແນະນຳ ຂອງຄະນະກວດສອບທັນເວລາ, ພ້ອມນີ້ ຍັງໄດ້ຕິດຕັ້ງຕູ້ຮັບຄຳສົ່ງຂ່າວ ຈຳນວນ 02 ໜ່ວຍ ເຊີ່ງຕັ້ງໄວ້ຢູ່ 2 ຈຸດ ຄື: ຢູ່ຕໍ່ໜ້າພະແນກການເງິນ ແລະ ດ່ານພາສີສາກົນປາກຊັນ ເພື່ອເປີດກ້ວາງໃຫ້ສັງຄົມມີສ່ວນຮ່ວມໃນການຕິດຕາມ, ກວດກາ, ສາມາດສ້າງໜ່ວຍພັກເປັນໜ່ວຍພັກ ປອດໃສ, ເຂັ້ມ ແລະ ໜັກແໜ້ນ ໄດ້ 5 ປີຕິດຕໍ່ກັນ.

ຈາກນັ້ນ ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາເລຂາໜ່ວຍພັກຊຸດໃໝ່ ແລະ ໄດ້ເປັນເອກະສັນກັນເລືອກເອົາສະຫາຍ ດວງຕາ ເພຍແກ້ວ ເປັນເລຂາໜ່ວຍພັກຂະແໜງຈັດຕັ້ງ-ບໍລິຫານ, ບັນຊີ ແລະ ກວດກາ ຊຸດທີ V, ສະຫາຍ ຄຳຫຼ້າ ລໍວັນສິງ ເປັນຮອງເລຂາ ແລະ ສະຫາຍ ສຸວັນນະວົງ ເຂັມມະວົງ ເປັນຄະນະ ທັງເປັນຜູ້ກວດກາ.

• Facebook
• Twitter
• Line