ທ່າພະບາດ ປະກາດສ້າງຄອບຄົວ ແລະ ບ້ານ ແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດທາງ 3 ສ້າງ

ເພື່ອເປັນການຜັນຂະຫຍາຍ ເນື້ອໃນຄໍາຂວັນຂອງສະຫະພັນແມ່ຍິງລາວ ແລະ ຍົກລະດັບຂະບວນການແຂ່ງຂັນ 3 ດີ ຂອງສະມາຊິກສະຫະພັນແມ່ຍິງລາວ ມາເປັນການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ, ໃນວັນທີ 25 ມີນາ 2022  ຢູ່ທີ່ບ້ານຫາດໄຊ ເມືອງທ່າພະບາດ ແຂວງບໍລິຄຳໄຊ ໄດ້ເປີດພິທີປະກາດສ້າງຄອບຄົວ ແລະ ບ້ານ ແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດທາງ 3 ສ້າງ ໃຫ້ ບ້ານ ຫາດໄຊ, ບ້ານ ຜາໂປງ ແລະ ບ້ານ ຫົງທອງ ໂດຍການເປັນປະທານຮ່ວມຂອງທ່ານ ຄໍາປຸ່ນ ສີຫາລາດ ຮອງເຈົ້າເມືອງ ທ່າພະບາດ ແລະ ທ່ານ ນາງ ປານີ ຫຼວງນາມ ປະທານສະຫະພັນແມ່ຍິງເມືອງ, ມີບັນດາຄະນະຮັບຜິດຊອບຂັ້ນເມືອງ – ຂັ້ນບ້ານ ພ້ອມດ້ວຍອົງການປົກຄອງບ້ານ ທັງ 3 ບ້ານ ແລະ ພໍ່ແມ່ປະຊາຊົນ ເຂົ້າຮ່ວມ

ໃນພິທີດັ່ງກ່າວ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 37/ມທບ ວ່າດ້ວຍການແຕ່ງຕັ້ງຄະນະກໍາມະການຮັບຜິດຊອບຂັ້ນເມືອງ – ຂັ້ນບ້ານ ໃນການສ້າງຄອບຄົວ ແລະ ບ້ານ ແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ, ຜ່ານເນື້ອໃນຜັນຂະຫຍາຍວຽກງານ 3 ດີ ຕິດພັນກັບວຽກງານ 3 ສ້າງ ແລະ ຜ່ານຄູ່ມືແນະນໍາ ການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ, ໃນນັ້ນ ໄດ້ຍົກໃຫ້ເຫັນຄວາມສໍາຄັນ, ເນື້ອໃນ, ມາດຖານ, ເງື່ອນໄຂ ຂອງການສ້າງຄອບຄົວ ແລະ ບ້ານ ແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ ມີຄວາມຈໍາເປັນ ແລະ ສໍາຄັນໃນແຕ່ລະຂົງເຂດ ເພາະເປັນພື້ນຖານຕົ້ນຕໍໃນການສ້າງບ້ານ ແລະ ກຸ່ມບ້ານພັດທະນາ ເພື່ອສ້າງເງື່ອນໄຂໃຫ້ແກ່ການຂະຫຍາຍຕົວ ແລະ ການຄົງຕົວຂອງສັງຄົມຢ່າງຕໍ່ເນື່ອງ.

ໃນການສ້າງຄອບຄົວແມ່ຍິງ 3 ດີ ຕິດພັນກັບຄອບຄົວພັດທະນາ ປະກອບມີ 10 ເງື່ອນໄຂ, ບ້ານແມ່ຍິງ 3 ດີ ຕິດພັນກັບບ້ານພັດທະນາຕາມທິດ 3 ສ້າງ ມີ 9 ເງື່ອນໄຂ ທຸກມາດຖານເງື່ອນໄຂຕ້ອງບັນລຸ 90 ສ່ວນຮ້ອຍຂຶ້ນໄປ ສໍາລັບເຂດເທດສະບານ ແລະ 70 ສ່ວນຮ້ອຍຂຶ້ນໄປ ສໍາລັບເຂດຊົນນະບົດ ຈຶ່ງສາມາດປະກາດເປັນບ້ານແມ່ຍິງ 3 ດີ ຢ່າງເປັນທາງການໄດ້.

ນອກນັ້ນ, ຄະນະຮັບຜິດຊອບຂັ້ນເມືອງ ໄດ້ແນະນໍາອົບຮົມ ວິທີການຈັດຕັ້ງປະຕິບັດແຕ່ລະບາດກ້າວ ແລະ ນໍາສະເໜີແບບຟອມປະເມີນ, ແບບຟອມສັງລວມໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ.

 

 

• Facebook
• Twitter
• Line