ບ້ານ ໄຊຈະເລີນ ສໍາເລັດກອງປະຊຸມໃຫຍ່ຄັ້ງທີ VII

     ໃນວັນທີ 25 ມີນາ 2022 ບ້ານ ໄຊຈະເລີນ, ເມືອງວຽງທອງ, ແຂວງບໍລິຄຳໄຊ ໄດ້ດຳເນີນກອງປະຊຸມໃຫຍ່ ຄັ້ງທີ VII ຂອງຕົນຂື້ນ ຢູ່ຫ້ອງປະຊຸມຂອງບ້ານ ພາຍໃຕ້ການເປັນປະທານຂອງ ທ່ານ ຈັນຟອງ ອ່ອນພະຈັນ ເລຂາພັກບ້ານ – ນາຍບ້ານ ໄຊຈະເລີນ, ໂດຍເປັນກຽດເຂົ້າຮ່ວມຂອງ ທ່ານ ສົມໃຈ ຊົງລາວ່າງ ຮອງເລຂາພັກເມືອງ, ປະທານອົງການກວດກາພັກ-ລັດເມືອງວຽງທອງ, ມີພະນັກງານກໍ່ສ້າງຮາກຖານ, ສະມາຊິກພັກ, ອຳນາດການປົກຄອງບ້ານຕາມ 5 ໜ່ວຍງານ, ພໍ່ແມ່ປະຊາຊົນພາຍໃນບ້ານ ແລະ ແຂກຖືກເຊີນ ເຂົ້າຮ່ວມ.

     ກອງປະຊຸມ ທ່ານ ຈັນຟອງ ອ່ອນພະຈັນ ໄດ້ຜ່ານບົດລາຍງານການເມືອງທັງສອງພາກຕໍ່ກອງປະຊຸມ ທ່ານໄດ້ຕີລາຄາຄືນການຊີ້ນຳ – ນຳພາຂອງຄະນະພັກໃນການປະຕິບັດວຽກງານຢ່າງຮອບດ້ານໄລຍະ 5 ປີ ຜ່ານມາ ບ້ານ ໄຊຈະເລີນ ມີສະມາຊິກພັກທັງໝົດ 19 ສະຫາຍ, ຍີງ 3 ສະຫາຍ.

ຜ່ານມາ ຄະນະພັກໄດ້ພ້ອມກັນສຶກສາອົບຮົມແນວຄິດການເມືອງໃຫ້ສະມາຊິກພັກ ແລະ ພໍ່ແມ່ປະຊາຊົນ, ເຊື່ອມຊືມແນວທາງການເມືອງຂອງພັກ – ລັດ, ປຸກລະດົມທົ່ວປວງຊົນເຂົ້າຮ່ວມຂະບວນການປ້ອງກັນຊາດປ້ອງກັນຄວາມສະຫງົບຂອງບ້ານ, ຍົກໃຫ້ເຫັນຜົນງານຫຼາຍດ້ານມີທັງດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະໄດ້ແກ້ໄຂໃນຕໍ່ໜ້າ.

ບ້ານໄຊຈະເລີນ ມີ 119 ຫຼັງຄາເຮືອນ, ມີ 153 ຄອບຄົວ, ມີພົນລະເມືອງ 598 ຄົນ ຍິງ 276 ຄົນ, ປະຊາຊົນ ມີອາຊີບເຮັດນາ, ເຮັດໄຮ່,​ ປູກພືດ ແລະ ລ້ຽງສັດ, ມີເນື້ອທີ່ທັງໝົດ 5.765 ເຮັກຕ່າ, ພາຍໃນບ້ານມີສັດລ້ຽງປະເພດງົວ ຈໍານວນ 100 ໂຕ, ຄວາຍ 100 ໂຕ, ໝູ 50 ໂຕ, ແບ້ 14 ໂຕ ແລະ ສັດປີກຈໍານວນ 600 ໂຕ, ມີເນື້ອທີ່ເຮັດນາ ຈໍານວນ 80 ເຮັກຕ່າ, ເນື້ອທີ່ໄຮ່ໝູນວຽນ 50 ເຮັກຕ່າ, ເນື້ອທີສວນມັນຕົ້ນ 60 ເຮັກຕ່າ, ສະເລ່ຍລາຍຮັບເຂົ້າກິນ 301 ກິໂລ/ຄົນ/ປີ, ສະເລ່ຍລາຍຮັບ 3.900.000 ກີບ ຕໍ່ຄົນ/ຕໍ່ປີ, ບ້ານມີຄອບຄົວພົ້ນທຸກຈຳນວນ 113 ຄອບຄົວ, ຄອບຄົວຍັງບໍ່ທັນພົ້ນທຸກ 40 ຄອບຄົວ.

ກອງປະຊຸມ ໄດ້ຜ່ານທິດທາງແຜນການ 5 ປີຕໍ່ໜ້າເພື່ອເປັນບ່ອນອີງໃນການນຳພາ – ຊີ້ນໍາພັດທະນາບ້ານຕໍ່ໄປ, ກອງປະຊຸມໄດ້ປ່ອນບັດຄັດເລືອກເອົາຄະນະພັກບ້ານ ແລະ ຄະນະບ້ານຊຸດໃໝ່ເຊີ່ງໄດ້ເລືອກເອົາ ທ່ານ ຄໍາທອງ ສິນນະວົງ ເປັນເລຂາພັກບ້ານ – ເປັນນາຍບ້ານ, ທ່ານ ຄໍາຄູນ ສີຫານາມ ເປັນຮອງເລຂາພັກບ້ານ – ເປັນຮອງນາຍບ້ານ, ທ່ານ ທອງອອນ ນ້ອຍໄຊຍະສິດ ເປັນກຳມະການເປັນຜູ້ກວດກາພັກ-ເປັນຮອງນາຍບ້ານ.

 

 

• Facebook
• Twitter
• Line