ພາກລັດ ກັບ ພາກທຸລະກິດ ເມືອງປາກກະດິງ ປຶກສາຫາລືກ່ຽວກັບການບໍລິການນ້ຳມັນເຊື້ອໄຟ

ຕອນເຊົ້າວັນທີ 22 ມີນາ 2022 ຢູ່ທີ່ຫ້ອງການອຸດສາຫະກຳ ແລະ ການຄ້າ ເມືອງປາກກະດິງ ແຂວງບໍລິຄຳໄຊ ໄດ້ຈັດກອງປະຊຸມ ປຶກສາຫາລືແລກປຽ່ນບົດຮຽນ ລະຫວ່າງ ພາກລັດ ກັບພາກທຸລະກິດນ້ຳມັນເຊື້ອໄຟພາຍໃນເມືອງ.

ເປັນກຽດເຂົ້າຮ່ວມຂອງທ່ານ ພົງສະຫວັດ ຄຳສຸກຖາວົງ ຮອງເຈົ້າເມືອງປາກກະດິງ ຜູ້ຊີ້ນຳວຽກງານເສດຖະກິດຂັ້ນເມືອງ, ທ່ານ ກອງແກ້ວ ຫລວງລາດບັນດິດ ຫົວຫນ້າຫ້ອງການອຸດສາຫະກຳ ແລະ ການຄ້າເມືອງ, ມີຕາງຫນ້າຫ້ອງວ່າການ ແລະ ຜູ້ປະກອບການທຸລະກິດນ້ຳມັນເຊື້ອໄຟ ເຂົ້າຮ່ວມ.

ກອງປະຊຸມ ໄດ້ເຜີຍແຜ່ດຳລັດທຸລະກິດນ້ຳມັນເຊື້ອໄຟ ສະບັບເລກທີ 331/ນຍ ບາງມາດຕາ  ແລະ ຜ່ານແຈ້ງການສະບັບເລກທີ 0376/ກຄພນ ກ່ຽວກັບການປັບປຸງ (ດັດສົມ) ແລະ ການອະນຸຍາດດຳເນີນທຸລະກິດປ້ຳນ້ຳມັນເຊື້ອໄຟ ແນໃສ່ໃຫ້ຜູ້ປະກອບການຮັບຮູ້ເຂົ້າໃຈເລິກເຊີ່ງ ແລະ ພ້ອມກັນດຳເນີນທຸລະກິດພາຍໃຕ້ລະບຽບກົດໝາຍຢ່າງເຂັ້້ມງວດ, ບໍ່ສວຍໃຊ້ໂອກາດ ແລະ ເອົາປຽບຜູ້ຊົມໃຊ້ທຸກຮູບແບບ ປາສະຈາກຫາງສຽງສັງຄົມຈົ່ມວ່າ.

ບັນດາທ່ານທີ່ເຂົ້າຮ່ວມກອງປະຊຸມ ຕ່າງກໍ່ໄດ້ປະກອບຄຳຄິດຄຳເຫັນຮ່ວມກັນຢ່າງກົງໄປກົງມາ ແລະ ເຫັນດີເປັນເອກະພາບກັນ ໃຫ້ພາກສ່ວນກ່ຽວຂ້ອງລົງກວດກາຕາມຕົວຈິງ, ຖ້າພົບເຫັນການຝ່າຝືນແມ່ນໃຫ້ປະຕິບັດຕາມລະບຽບກົດໝາຍຢ່າງເຂັ້ມງວດ ແລະ ສະເໜີໃຫ້ພາກສ່ວນກ່ຽວຂ້ອງຄົ້ນຄ້ວາຄືນການເສຍອາກອນນ້ຳມັນເຊື້ອໄຟ ໃຫ້ເປັນເອກະພາບກັບເມືອງອື່ນ – ແຂວງອື່ນ ໃນຂອບເຂດທົ່ວປະເທດ.

 

• Facebook
• Twitter
• Line