5 ບໍລິສັດ ຂອງແຂວງບໍລິຄຳໄຊ ໄດ້ຮັບລາງວັນນັກທຸລະກິດດີເດັ່ນ ປະຈຳປີ 2021

ໃນວັນທີ 18 ມີນາ 2022 ຢູ່ຫໍປະຊຸມແຫ່ງຊາດ ນະຄອນຫຼວງວຽງຈັນ ສະມາຄົມນັກທຸລະກິດໜຸ່ມແຂວງບໍລິຄຳໄຊ ໄດ້ເຂົ້້າຮ່ວມງານມອບລາງວັນນັກທຸລະກິດດີເດັ່ນ ປະຈຳປີ 2021 ໂດຍມີທ່ານ ທອງມະນີ ໂຄດປັນຍາ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ, ທ່ານ ຄອນສະຫັວນ ສອນຄຳໄຊ ປະທານສະມາຄົມນັກທຸກລະກິດແຂວງ ພ້ອມດ້ວຍຄະນະ ໂດຍການເປັນປະທານຂອງພະນະ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ຜູ້ຊີ້ນຳວຽກງານເສດຖະກິດ, ມີບັນດາແຂກຖືກເຊີນຈາກກະຊວງ, ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ, ສະມາຄົມນັກທຸລະກິດໜຸ່ມແຫ່ງຊາດ ແລະ ຜູ້ປະກອບການນັກທຸລະກິດດີເດັ່ນທົ່ວປະເທດ ເຂົ້້າຮ່ວມ.

ທ່ານ ຄຳແສນ ສີສະວົງ ປະທານສະມາຄົມນັກທຸລະກິດໜຸ່ມແຫ່ງຊາດ ໄດ້ຜ່ານບົດສະຫຼຸບການເຄື່ອນໄຫວຂອງສະມາຄົມນັກທຸລະກິດໜຸ່ມແຫ່ງຊາດ ໃນໄລຍະ 1 ປີທີຜ່ານມາ ວ່າ: ສະມາຄົມ ໄດ້ສຸມໃສ່ໃນການສ້າງແຜນຍຸດທະສາດ, ພັດທະນາ ໂດຍອີງໃສ່ພາລະບົດບາດຂອງສະມາຄົມ ເພື່ອເປັນການສົ່ງເສີມແກ່ຜູ້ປະກອບກິດຈະການທຸກສາຂາອາຊີບ ໃຫ້ມີຄວາມເຂັ້ມແຂງຢ່າງຮອບດ້ານ ສົ່ງເສີມໃຫ້ຜູ້ປະກອບກິດຈະການມີທ່າແຮງ ແລະ ຄວາມສາມາດ ສືບຕໍ່ພັດທະນາທຸລະກິດຂອງຕົນເອງ ໃຫ້ກ່າວເຂົ້າສູ່ມາດຕະຖານສາກົນ ແລະ ອື່ນໆ, ມາຮອດປະຈຸບັນ ສະມາຄົມນັກທຸລະກິດໜຸ່ມ ມີສະມາຊິກທັງໝົດ 1.250 ບໍລິສັດ, ມີຈຳນວນ 43.000 ກວ່າຄົນ.

ຈາກນັ້ນ ທ່ານ ສອນໄຊ ສີພັນດອນ ໄດ້ໃຫ້ກຽດໂອ້ລົມເພື່ອເປັນທິດເຍືອງທາງໃຫ້ແກ່ນັກທຸລະກິດໜຸ່ມ ກ່ອນອື່ນໝົດທ່ານໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວທີນັກທຸລະກິດໜຸ່ມແຫ່ງຊາດຍາດມາໄດ້, ພ້ອມດຽວກັນນັ້ນ ທ່ານຍັງໄດ້ເນັ້ນໃຫ້ບັນດານັກທຸລະກິດ ສືບຕໍ່ຜັນຂະຫຍາຍຜົນງານຂອງສະມາຄົມຜູ້ປະກອບກິດຈະການໜຸ່ມທັງຫຼາຍໃນຂອບເຂດທົ່ວປະເທດ, ສືບຕໍ່ປະກອບສ່ວນເຂົ້້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ພ້ອມນີ້ ທ່ານຍັງໄດ້ຮຽກຮ້ອງໃຫ້ຜູ້ປະກອບກິດຈະການລາວທັງໜຸ່ມ ແລະ ອາວຸໂສ ຕ້ອງໄດ້ຍົກສູງຄວາມສາມະຄີຮ່ວມກັນ, ເປັນລູກຄ້າ ເປັນຄູຮ່ວມທຸລະກິດທີ່ດີນຳກັນ ແລະ ຕ້ອງມີການຮ່ວມມືກັບບັນດານັກທຸລະກິດ ແລະ ອົງກອນເສດຖະກິດຕ່າງໆຢູ່ໃນໂລກໃຫ້ຫຼາຍຂຶ້ນ ເພື່ອຍາດແຍ່ງຕະຫລາດທັງຄວາມຮູ້ ແລະ ທຶນຮອນ ເພື່ອນຳມາລົງທຶນເພີ່ມຂຶ້ນ ປະກອບສ່ວນໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນສີວິໄລຢ່າງບໍ່ຍຸດຢັ້ງ.

ງານມອບລາງວັນນັກທຸລະໜຸ່ມດີເດັ່ນປະຈຳປີ 2021 ທີ່ຜ່ານເງື່ອນໄຂການຄັດເລືອກໃນທົ່ວປະເທດ ມີຈຳນວນໝົດ 111 ແຫ່ງ, ໃນນັ້ນ ມີທຸລະກິດຂະໜາດນ້ອຍ 18 ແຫ່ງ. ສຳລັບສະນັກທຸລະກິດໜຸ່ມແຂວງບໍລິຄຳໄຊ ທີ່ໄດ້ຮັບລາງວັນນັກທຸລະກິດໜຸ່ມດີເດັ່ນປະຈຳປີ 2021 ມີຈຳນວນ 5 ບໍລິສັດ ໄດ້ແກ່ : ທ່ານ ຄອນສະຫວັນ ສອນຄຳໄຊ ບໍລິສັດ ບີເອັມ ການຄ້າຂາອອກ – ຂາເຂົ້າ ຈໍາກັດຜູ້ດຽວ, ທ່ານ ປາໂນ່ ສຸວັນນະລາ ບໍລິສັດກໍ່ສ້າງ ແລະ ຕິດຕັ້ງໄຟຟ້າປາໂນ່ ຈຳກັດ, ທ່ານ ໄຊຍະເພັດ ຈັນທິສອນ ບໍລິສັດ ເອັດອີເອັດ ກໍ່ສ້າງຄົບວົງຈອນ, ທ່ານ ສິນທະນາ ພິມມະສອນ ບໍລິສັດສິນທະນາການຄ້າ ຂາອອກ – ຂາເຂົ້າຈໍາກັດ ແລະ ທ່ານ ສຸດທິພົງ ຈັນທະພັນ ບໍລິສັດ ເອັສພີ ການຄ້າ ຂາອອກ – ຂາເຂົ້້າ ແລະ ບໍລິການ ຈຳກັດຜູ້ດຽວ ເຊິ່ງໃຫ້ກຽດມອບລາງວັນນັກທຸລະກິດເດັ່ນ ຄັ້ງນີ້ໂດຍທ່ານ ອາລຸນໄຊ ສູນນະລາດ ກຳມະການສູນກາງພັກ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ.