ແມ່ຍິງບໍລິຄຳໄຊ ຈັດກິດຈະກໍາຕ້ອນຮັບວັນແມ່ຍິງສາກົນ ຄົບຮອບ 112 ປີ ແລະ ວັນສ້າງຕັ້ງແຂວງບໍລິຄໍາໄຊ ຄົບຮອບ 38

ໃນຕອນເຊົ້າວັນທີ 4 ມີນາ 2022 ສະຫະພັນແມ່ຍິງແຂວງບໍລິຄໍາໄຊ ໄດ້ຈັດຕັ້ງປາຖະກະຖາຫວນຄືນປະຫວັດຄວາມເປັນມາ ວັນສ້າງຕັ້ງແມ່ຍິງສາກົນ ຄົບຮອບ 112 ປີ ແລະ ວັນສ້າງຕັ້ງແຂວງ ບໍລິຄຳໄຊ ຄົບຮອບ 38 ປີ ພ້ອມທັງຈັດກິດຈະກໍາເຕັ້ນອອກກໍາລັງກາຍ ຢູ່ສວນສາທາລະນະ ທ່ານ ສີສົມພອນ ລໍວັນໄຊ ໂດຍໃຫ້ກຽດເຂົ້າຮ່ວມ ແລະ ເລົ່າປະຫວັດວັນສ້າງຕັ້ງວັນແມ່ຍິງສາກົນໂດຍ ທ່ານ ບຸນຄໍາ ໄຊເຍ່ຍລໍວື່ ຄະນະປະຈຳພັກແຂວງ ປະທານແນວລາວສ້າງຊາດແຂວງບໍລິຄຳໄຊ, ມີຄະນະບໍລິຫານງານສະຫະພັນແມ່ຍິງແຂວງ, ແມ່ຍິງຮາກຖານ, ພ້ອມດ້ວຍສະມາຊິກແມ່ຍິງ ແລະ ພະແນກການອ້ອມຂ້າງແຂວງ ເຂົ້າຮ່ວມ.

ທ່ານ ບຸນຄໍາ ໄຊເຍ່ຍລໍວື່ ໄດ້ຍົກໃຫ້ເຫັນເຖິງ ປະຫວັດຄວາມເປັນມາ ຂອງວັນແມ່ຍິງສາກົນ ວັນທີ 8 ມີນາ ແມ່ນເຫດການ-ການເມືອງທີ່ສໍາຄັນ ເປັນຂີດໝາຍແຫ່ງໄຊຊະນະອັນພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດ ອັນເປັນທໍາໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ.

ເປັນວັນລະນຶກເຖິງການຕໍ່ສູ້ຂອງແມ່ຍິງ ເພື່ອປົດປ່ອຍຕົນເອງ ແລະ ທວງໃຫ້ມີສິດສະເໜີພາບ ປະຊາທິປະໄຕ ຄືກັນກັບຜູ້ຊາຍ ທວງໃຫ້ພວກນາຍທຶນແກ້ໄຂຊິວິດການເປັນຢູ່ ພາຍໃຕ້ຄໍາຂວັນ ” ຜູ້ໜຶ່ງເຮັດວຽກມື້ລະ 8 ຊົ່ວໂມງ ” ແມ່ຍິງ ແລະ ຜູ້ຊາຍເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ ຕ້ານສົງຄາມຮຸກຮານ ປົກປັກຮັກສາສັນຕິພາບຂອງໂລກ.

ຍົກໃຫ້ເຫັນບັນດາອົງການຈັດຕັ້ງ, ສົນທິສັນຍາ, ຖະແຫຼງການ ແລະ ກອງປະຊຸມຕ່າງໆກ່ຽວກັບແມ່ຍິງໃນລະດັບສາກົນ, ພາກພື້ນ ແລະ ອາຊ່ຽນ ທີ່ເປັນການຈັດຕັ້ງສົ່ງເສີມສິດສະເໝີພາບລະຫວ່າງຍິງ-ຊາຍ, ນະໂຍບາຍດ້ານຕ່າງໆ ແລະ ກົນໄກສົ່ງເສີມຄວາມກາ້ວໜ້າຂອງແມ່ຍິງ ໃນ ສປປ ລາວ.

ຕອນທ້າຍພິທີ ກໍ່ໄດ້ມີກິດຈະກໍາ ຖາມ – ຕອບ ຄວາມຮູ້ກ່ຽວກັບວັນແມ່ຍິງສາກົນ ແລະ ກໍ່ຍັງໄດ້ມີກິດຈະກໍາເຕັ້ນແອໂລບິກປະກອບສຽງເພງ ໂດຍການນຳພາຂອງທິມງານຄູຝຶກ ຈາກສູນອອກກຳລັງກາຍປາກຊັນຟິດເນັດ ເພື່ອເປັນການສ້າງຂະບວນການຕ້ອນຮັບ ວັນແມ່ຍິງສາກົນ ຄົບຮອບ 112 ປີ ແລະ ວັນສ້າງຕັ້ງແຂວງບໍລິຄໍາໄຊ ຄົບຮອບ 38 ປີ ໃຫ້ເປັນຂະບວນການຟົດຟື້ນ ແລະ ເຕັມໄປດ້ວຍຄວາມໝາຍຄວາມສໍາຄັນ.

• Facebook
• Twitter
• Line