ກອງປະຊຸມປຶກສາຫາລື ໂຄງປະກອບກົງຈັກການຈັດຕັ້ງ ດ່ານຊາຍແດນສາກົນ ປາກຊັນ – ບຶງການ

ກອງປະຊຸມປຶກສາຫາລື ການຈັດຕັ້ງໂຄງປະກອບ ກົງຈັກການຈັດຕັ້ງ ດ່ານຊາຍແດນສາກົນປາກຊັນ ແຂວງ ບໍລິຄໍາໄຊ ໄດ້ຈັດຂື້ນໃນຕອນເຊົ້າວັນທີ 02 ມີນາ 2022 ທີ່ຫ້ອງປະຊຸມດ່ານຊາຍແດນສາກົນປາກຊັນ, ໂດຍການເປັນກຽດເຂົ້າຮ່ວມເປັນປະທານຂອງ ທ່ານ ບຸນສົງ ເພັດຈະເລີນ ຫົວໜ້າຄະນະຈັດຕັ້ງແຂວງ.

 ທ່ານ ພັນໂທ ວົງວິໄລ ອີນທິສານ ໄດ້ຂື້ນຜ່ານ ບົດລາຍງານການຈັດຕັ້ງປະຕິບັດ ການຈັດຕັ້ງໂຄງປະກອບ ກົງຈັກການຈັດຕັ້ງ ດ່ານຊາຍແດນສາກົນປາກຊັນ ເຊີ່ງໄດ້ມີການຈັດຕັ້ງປະຕິບັດຕາມດໍາລັດ ເລກທີ 558/ ລບ ວ່າດ້ວຍ ດ່ານຊາຍແດນ ແລະ ສະໜາມບິນສາກົນ, ສະພາບລວມ ແລະ ຈຸດພິເສດຂອງດ່ານ, ດ້ານໂຄງສ້າງ ແລະ ບຸກຄະລາກອນ.

ດ່ານຊາຍແດນສາກົນປາກຊັນ ເປັນຮາກຖານພັກໜື່ງທີ່ປະກອບມີ 03 ໜ່ວຍພັກຂື້ນກັບ ແລ ະ 03 ອົງການຈັດຕັ້ງມະຫາຊົນ ເຊີ່ງປະກອບດ້ວຍ 05 ຂະແໜງການຂອງລັດ ຄື: ວຽກງານກວດກາຄົນເຂົ້າ – ອອກເມືອງ, ວຽກງານພາສີ, ຂະແໜງກັກກັນພຶດ-ສັດ, ອາຫານ, ຢາ ແລະ ຄວບຄຸມພະຍາດຕິດຕໍ່, ຫ້ອງການບໍລິຫານ ແລະ ວຽກງານຄຸ້ມຄອງພື້ນຖານໂຄງລ່າງ.

ຈຸດປະສົງຂອງກອງປະຊຸມ ເພື່ອປັບປຸງໂຄງສ້າງການຈັດຕັ້ງຂອງດ່ານ ເຮັດໃຫ້ວຽກງານດັ່ງກ່າວມີປະສິດທິຜົນ, ອໍານວຍຄວາມສະດວກໃຫ້ການບໍລິການ, ການແລກປ່ຽນສີນຄ້າ, ການເຂົ້າ – ອອກຂອງຜູ້ໂດຍສານ ໃຫ້ມີຄວາມວ່ອງໄວ ຖືກຕ້ອງໂປ່ງໃສ, ປະກອບສ່ວນສ້າງສາຍພົວພັນ ຮ່ວມມືມິດຕະພາບທີ່ດີ ກັບບັນດາປະເທດທີ່ມີຊາຍແດນຕິດຈອດກັບ ສປປ ລາວ, ບັນດາປະເທດໃນພາກພື້ນ ແລະ ສາກົນ, ແນໃສ່ເຮັດໃຫ້ການພັດທະນາເສດຖະກິດ – ສັງຄົມແຫ່ງຊາດ ມີການຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ.

ຍົກໃຫ້ເຫັນໂຄງປະກອບກົງຈັກການຈັດຕັ້ງ ດ່ານຊາຍແດນສາກົນປາກຊັນ ເຊີ່ງປະກອບມີຄະນະຊີ້ນໍາຈາກກະຊວງ, ກົມ ແລະ ພະນັກງານ – ວິຊາການມາຈາກພະແນກການ, ຂະແໜງການຕ່າງໆ ທີ່ກ່ຽວຂ້ອງຕາມລະບົບ.

ບັນດາຜູ້ແທນຕາງໜ້າໃຫ້ພະແນກການ, ຂະແໜງການ ກໍ່ໄດ້ມີການປະກອບຄໍາຄິດ ຄໍາເຫັນຄົ້ນຄວ້າປຶກສາຫາລືກ່ຽວກັບການຈັດຕັ້ງບຸກຄະລາກອນເຂົ້າໃນໂຄງປະກອບ ກົງຈັກການຈັດຕັ້ງ ດ່ານຊາຍແດນສາກົນປາກຊັນ ໃຫ້ຖືກຕ້ອງຕາມລະບົບຄົບຊຸດ ຂອງລະບຽບການ ທີ່ໄດ້ກໍານົດໄວ້.

 

 

 

• Facebook
• Twitter
• Line