ສຶກສາແຂວງບໍລິຄໍາໄຊ ເຜີຍແຜ່ເຊື່ອມຊຶມ ຈັນຍາບັນຂອງພະນັກງານ – ລັດຖະກອນ

ໃນຕອນເຊົ້າຂອງວັນທີ 1 ມີນາ 2022 ພະແນກສຶກສາທິການ ແລະ ກິລາ ແຂວງບໍລິຄໍາໄຊ ໄດ້ຈັດພິທີເຜີຍແຜ່ເຊື່ອມຊຶມ ແລະ ຜັນຂະຫຍາຍດໍາລັດ ສະບັບ 184/ລບ, ລົງວັນທີ 26 ມິຖຸນາ 2019 ວ່າດ້ວຍຈັນຍາບັນຂອງພະນັກງານ – ລັດຖະກອນ, ໃຫ້ກຽດເຜີຍແຜ່ເອກະສານໂດຍທ່ານ ລົມ ແພງສຸກ ຫົວໜ້າພະແນກສຶກສາທິການ ແລະ ກິລາແຂວງ, ມີຄະນະພະແນກ, ຫົວໜ້າຂະແໜງ-ຮອງຂະແໜງ ແລະ ພະນັກງານພາຍໃນພະແນກ ເຂົ້າຮ່ວມ.

ໃນພິທີ ທ່ານ ລົມ ແພງສຸກ ໄດ້ເຜີຍແຜ່ຈັນຍາບັນຂອງພະນັກງານລັດຖະກອນ ໃນມາດຕາ 2 ວ່າ: ຈັນຍາບັນຂອງພະນັກງານ – ລັດຖະກອນ ແມ່ນກົດການປະພືດທີ່ພະນັກງານ – ລັດຖະກອນແຕ່ລະຄົນຕ້ອງເຄົາລົບ ແລະ ປະຕິບັດຢ່າງເຂັ້ມງວດ.

ພ້ອມນັ້ນ ທ່ານຍັງໄດ້ເນັ້ນໃນໝວດທີ 2 ຈັນຍາບັນຂອງພະນັກງານ – ລັດຖະກອນປະກອບດ້ວຍ 4 ປະເພດ ຄື: ຈັນຍາບັນຕໍ່ຕົນເອງ, ຈັນຍາບັນຕໍ່ວິຊາຊີບ,ຈັນຍາບັນຕໍ່ການຈັດຕັ້ງ, ຈັນຍາບັນຕໍ່ປະຊາຊົນ ແລະສັງຄົມ.

ການເຊື່ອມຊືມໃນຄັ້ງນີ້ ກໍ່ເພຶ່ອເປັນການສຶກສາອົບຮົມ ປູກຈິດສໍານຶກໃຫ້ກັບບັນດາພະນັກງານຫຼັກແຫຼ່ງ ຂອງຂະແໜງການສຶກສາ ຕ້ອງຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານທີ່ດີ, ເຄື່ອນໄຫວວິຊາຊີບດ້ວຍຄວາມສັດຊື່ ແລະ ບໍ່ສະແຫວງຫາຜົນປະໂຫຍດໃນທາງທີ່ບໍ່ຖືກຕ້ອງ ແລະ ປະຕິບັດຈັນຍາບັນຂອງຕົນຢ່າງເຂັ້ມງວດ, ເຄົາລົບ ແລະ ມີສະຕິຕໍ່ການຈັດຕັ້ງ, ມີຄວາມຮັບຜິດຊອບສູງ ຕໍ່ໜ້າທີ່ວຽກງານທີ່ໄດ້ຮັບມອບໝາຍ, ບໍລິການຮັບໃຊ້ປະຊາຊົນ ແລະ ສັງຄົມ ດ້ວຍຄວາມຈິງໃຈ, ສະເໝີພາບ, ໂປ່ງໃສ, ມີກິລິຍາມາລະຍາດດີ, ຖະໝອມຖ່ອມໂຕ, ບໍ່ຮຽກຮ້ອງສິ່ງຕອບແທນ, ບໍ່ສ້າງຄວາມຫຍຸ້ງຍາກໃຫ້ແກ່ປະຊາຊົນ ແລະ ສັງຄົມໃນການປະຕິບັດໜ້າທີ່ວຽກງານ.

ພ້ອມນີ້ ນາງ ຄໍາຮັກ ໄລວັນ ຮອງຫົວນ້າພະແນກສຶກສາທິການ ແລະ ກິລາແຂວງ ຍັງໄດ້ປາຖະກະຖາ ວັນແມ່ຍິງສາກົນ ຄົບຮອບ 112 ປີ ( 08 ມີນາ 1910 – 08 ມີນາ 2022 ) ເຊີ່ງເນື້ອໃນເອກະສານທີ່ປາຖະກະຖາສະເຫຼີມສະຫຼອງວັນແມ່ຍິງສາກົນ ມີ: ປະຫວັດຄວາມເປັນມາຂອງວັນແມ່ຍິງສາກົນວັນທີ 8 ມີນາ, ບັນດາອົງການຈັດຕັ້ງ, ສົນທີສັນຍາ, ຖະແຫຼງການ ແລະ ກອງປະຊຸມຕ່າງໆ ກ່ຽວກັບແມ່ຍິງໃນລະດັບສາກົນພາກພື້ນ ແລະ ອາຊຽນ, ນະໂຍບາຍ ແລະ ກົນໄກສົ່ງເສີມຄວາມກ້າວໜ້າຂອງແມ່ຍິງໃນ ສປປ ລາວ, ວຽກງານພົວພັນຮ່ວມມືກັບຕ່າງປະເທດ ປີ 2021 ແລະ ການເຄື່ອນໄຫວຮ່ວມມືກັບສາກົນ ແລະ ການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າ.

ໃນຕອນທ້າຍຂອງພິທີ ເນື່ອງໃນໂອກາດສະເຫຼີມສະຫຼອງວັນແມ່ຍິງສາກົນ ທ່ານຫົວໜ້າພະແນກສຶກສາທິການ ແລະ ກິລາແຂວງ ກໍ່ໄດ້ມອບຂອງຂັວນໃຫ້ສະຫະພັນແມ່ຍິງພາຍໃນພະແນກສຶກສາທິການ ແລະ ກິລາແຂວງ ທີ່ໄດ້ອອກແຮງແຂ່ງຂັນປະຕິບັດ ຂໍ້ແຂ່ງຂັນ 3 ດີ ຂອງແມ່ຍິງລາວດີເດັ່ນ.

• Facebook
• Twitter
• Line