ບໍລິຄຳໄຊ ເຜີຍແຜ່ – ເຊື່ອມຊຶມມະຕິກອງປະຊຸມໃຫຍ່ແມ່ຍິງ ຄັ້ງທີ VIII

ໃນວັນທີ 28 ກຸມພາ 2022 ຢູ່ຫ້ອງຮັບຮອງຂອງແຂວງ ທ່ານ ປອ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ເຈົ້າແຂວງບໍລິຄໍາໄຊ ພ້ອມດ້ວຍຄະນະ ໄດ້ເປັນກຽດຕ້ອນຮັບ ທ່ານ ນາງ ອິນລາວັນ ແກ້ວບຸນພັນ ກໍາມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ ພ້ອມດ້ວຍຄະນະ ເນື່ອງໃນໂອກາດມາເຜີຍແຜ່ເຊື່ອມຊຶມມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ຢູ່ແຂວງບໍລິຄຳໄຊ.

ຫຼັງຈາກນັ້ນ ຢູ່ສະໂມສອນໃຫຍ່ຂອງແຂວງ ກໍ່ໄດ້ມີກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ໃຫ້ກຽດເຜີຍແຜ່ໂດຍ ທ່ານ ນາງ ອິນລາວັນ ແກ້ວບຸນພັນ, ມີຄະນະປະທານສະຫະພັນແມ່ຍິງແຂວງ, ຄະນະກອງທຶນໜຶ່ງດວງໃຈບໍລິຄຳໄຊຊ່ວຍເຫຼືອສັງຄົມ, ຮາກຖານສະຫະພັນແມ່ຍິງ, ສະມາຊິກແມ່ຍິງ ແລະ ພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ໄດ້ໄຂຂຶ້ນໃນວັນທີ 18 – 19 ພະຈິກ 2021 ທີ່ນະຄອນຫຼວງວຽງຈັນ ມີຜູ້ແທນສົມບູນຈໍານວນ 331 ສະຫາຍ ແລະ ແຂກຖືກເຊີນເຂົ້າຮ່ວມ, ບັນດາຜູ້ແທນກອງປະຊຸມໃຫຍ່ ໄດ້ພ້ອມກັນຍົກສູງຄວາມຮັບຜິດຊອບ, ສຸມສະຕິປັນຍາ ໃສ່ການຄົ້ນຄ້ວາປະກອບຄຳຄິດເຫັນຢ່າງເລິກເຊິ່ງ ແລະ ໄດ້ເປັນເອກະສັນກັນຮັບຮອງເອົາ ທິດທາງແຜນການ 5 ປີ ຕໍ່ໜ້າ ເຊິ່ງມີເນື້ອໃນຕົ້ນຕໍ ດັ່ງນີ້: ຮັບຮອງເອົາບົດລາຍງານການເມືອງ (2021-2025) ເຊິ່ງໄດ້ວາງຄາດໝາຍສູ້ຊົນ ແລະ ທິດທາງລວມຫຼາຍວຽກງານສໍາຄັນ ເປັນຕົ້ນແມ່ນແມ່ຍິງລາວບັນດາເຜົ່າ ໄດ້ຄົ້ນຄວ້າເຊື່ອມຊຶມແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ, ແຜນພັດທະນາເສດຖະກິດ – ສັງຄົມແຫ່ງຊາດ, ແຜນພັດທະນາແມ່ຍິງລາວ, ມູນເຊື້ອສໍາຄັນຕ່າງໆຂອງຊາດ, ຂອງພັກ, ຂອງແມ່ຍິງ ກວມເອົາ 80% ຂຶ້ນໄປ ຂອງແມ່ຍິງໃນເກນອາຍຸ 15 ຂຶ້ນໄປ, ເຜີຍແຜ່ເຊື່ອມຊຶມຂໍ້ແຂ່ງຂັນ 3 ດີ, ສ້າງບຸກຄົນ 3 ດີ, ສະຫະພັນແມ່ຍິງ 3 ດີ ກວມ 80% ຂຶ້ນໄປ.

ສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ ໃນກຸ່ມເປົ້າໝາຍ, ສົ່ງເສີມແມ່ຍິງໄດ້ເປັນເຈົ້າຂອງທຸລະກິດ, ການຜະລິດກະສິກຳ, ຫັດຖະກຳ ໃຫ້ມີຈຳນວນເພີ່ມຂຶ້ນ, ຊຸກຍູ້ໃຫ້ແມ່ຍິງ ແລະ ເດັກນ້ອຍ ໄດ້ເຂົ້າເຖິງຂະບວນຍຸຕິທໍາ, ໄດ້ຮັບການປົກປ້ອງສິດຜົນປະໂຫຍດ, ການຊ່ວຍເຫຼືອຈາກການຈັດຕັ້ງແຕ່ລະຂັ້ນ, ທົ່ວສັງຄົມໃຫ້ມີຈໍານວນເພີ່ມຂຶ້ນ ເຮັດໃຫ້ປະກົດການຫຍໍ້ທໍ້ໃນສັງຄົມນັບມື້ຫຼຸດລົງ ເທື່ອລະກ້າວ, ແມ່ຍິງໄດ້ຮັບການບໍລິການທາງດ້ານສາທາລະນະສຸກ ຢ່າງທົ່ວເຖິງ.

ຮັບຮອງທິດທາງແຜນພັດທະນາແມ່ຍິງແຫ່ງຊາດ 5 ປີ ເຊິ່ງໄດ້ວາງຈຸດໝາຍລວມ, 10 ແຜນງານ, 65 ໂຄງການ, ຮັບຮອງເອົາກົດລະບຽບຂອງສະຫະພັນແມ່ຍິງລາວ ສະບັບປັບປຸງ ສະໄໝທີ VIII ປະກອບດ້ວຍ 11 ໝວດ 39 ມາດຕາ ໃນນັ້ນປັບປຸງໃໝ່ 11 ໝວດ, 27 ມາດຕາ ແລະ ເພີ່ມຂຶ້ນ 1 ມາດຕາ, ຮັບຮອງເອົາ ຄຳຂັວນຂອງສະຫະພັນແມ່ຍິງຄື: “ພັດທະນາຄວາມສະເໝີພາບຍິງ-ຊາຍ ຕິດພັນກັບການພັດທະນາປະເທດຊາດ” ແລະ ຂໍ້ແຂ່ງຂັນ 3 ດີ ຄື: “ພົນລະເມືອງດີ, ພັດທະນາດີ ແລະ ສ້າງຄອບຄົວດີ”.

ກອງປະຊຸມໃຫຍ່ ໄດ້ພ້ອມກັນໃຊ້ສິດປະຊາທິປະໄຕ ເລືອກຕັ້ງເອົາຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ຈໍານວນ 63 ທ່ານ ແລະ ໃນກອງປະຊຸມຄົບຄະນະຄັ້ງປະຖົມມະລຶກ ເປັນເອກະສັນຮັບຮອງເອົາ ທ່ານ ນາງ ອິນລາວັນ ແກ້ວບຸນພັນ ເປັນປະທານ, ທ່ານ ນາງ ສິລິກິດ ບຸບຜາ ເປັນຮອງປະທານ, ທ່ານ ນາງ ລາວັນ ສຸດທິສານ ເປັນຮອງປະທານ ທັງເປັນປະທານຄະນະກວດກາ, ທ່ານ ນາງ ທຳມາ ເພັດວິໄຊ ແລະ ທ່ານ ປອ ນາງ ຈັນໂສດາ ພອນທິບ ເປັນຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ.

• Facebook
• Twitter
• Line