ພິທີເຊັນບົດບັນທຶກຄວາມເຂົ້າໃຈ ( MOU ) ກ່ຽວກັບການສະໜອງຜະລິດຕະພັນ ນ້ຳດື່ມວັນ ລະຫວ່າງພະແນກອຸດສາຫະກຳ ແລະ ການຄ້າ ແຂວງບໍລິຄຳໄຊ ແລະ ບໍລິສັດ ວັນນະແສງການຄ້າ ຈຳກັດຜູ້ດຽວ ໄດ້ຈັດຂຶ້ນໃນຕອນບ່າຍຂອງວັນທີ 25 ກຸມພາ 2022 ຢູ່ຫ້ອງປະຊຸມ ພະແນກອຸດສາຫະກຳ ແລະ ການຄ້າແຂວງ, ຕາງໜ້າໃຫ້ແກ່ອໍານາດການປົກຄອງແຂວງບໍລິຄຳໄຊ ເຊັນໂດຍ ທ່ານ ໄກສອນ ຈັນສີນາ ຫົວໜ້າພະແນກອຸດສາຫະກຳ ແລະ ການຄ້າແຂວງ, ຕາງໜ້າບໍລິສັດ ເຊັນໂດຍ ທ່ານ ນາງ ວຽງນະສອນ ອຸນາລົມ ຜູ້ອຳນວຍການ ບໍລິສັດ ວັນນະແສງການຄ້າ ຈຳກັດຜູ້ດຽວ, ໂດຍຊ້ອງໜ້າຂອງພະນັກງານທັງສອງຝ່າຍເຂົ້າຮ່ວມເປັນສັກຂີພິຍານ.
ຈຸດປະສົງຂອງການເຊັນບົດບັນທຶກ ກໍ່ເພື່ອເປັນການຊຸກຍູ້ສົ່ງເສີມ ບັນດາຫົວໜ່ວຍທຸລະກິດ – ຜະລິດຕະພັນສິນຄ້າ ພາຍໃນແຂວງ ໃຫ້ມີຄວາມຍືນຍົງ ໂດຍສະເພາະແມ່ນຜະລິດຕະພັນທີ່ເກີດຈາກໂຮງງານຂະຫຍາຍຕົວ, ໂຮງງານທີ່ສາມາດຜະລິດໄດ້ຢ່າງກວ້າງຂວາງ.
ພະແນກອຸດສາຫະກຳ ແລະ ການຄ້າ ແຂວງ ບໍລິຄຳໄຊ ຈຶ່ງໄດ້ເຊັນສັນຍາຮັບຊື້ ແລະ ບໍລິສັດກໍ່ສະໜອງນໍ້າດື່ມວັນ ໃຫ້ພະແນກຕາມຄວາມຕ້ອງການ ຕາມລາຄາທີ່ທ້ອງຕະຫຼາດຈຳໜ່າຍ ໃນແຕ່ລະໄລຍະ.
ການເຊັນສັນຍານີ້ ເພື່ອຈະກາຍເປັນແຮງຊຸກດັນໃຫ້ແກ່ໂຮງງານທີ່ມີຄວາມມຸ້ງໝັ້ນຕັ້ງໃຈຜະລິດ ເພື່ອເປັນຕົວແບບໃຫ້ແກ່ໂຮງງານອື່ນໆ ເຮັດໃຫ້ການນຳເອົານ້ຳດື່ມຈາກຕ່າງແຂວງ ຫຼື ຕ່າງປະເທດ ນຳເຂົ້າມາຊົມໃຊ້ພາຍໃນແຂວງ ໃຫ້ນັບມື້ນັບໜ້ອຍລົງເປັນກ້າວໆ ແລະ ພັກດັນຫົວໜ່ວຍການຜະລິດພາຍໃນແຂວງ ໃຫ້ເຂັ້ມແຂງຍືນຍົງຕະຫຼອດໄປ.
ບໍລິສັດນ້ຳດື່ມວັນ ຜະລິດໂດຍໂຮງງານນ້ຳດື່ມແສງແກ້ວ ພາຍໃຕ້ການບໍລິຫານງານໂດຍ ບໍລິສັດວັນນະແສງການຄ້າ ຈຳກັດ ທີ່ມີສຳນັກງານຕັ້ງຢູ່ບ້ານທົ່ງນ້ອຍ ເມືອງປາກຊັນ ແຂວງບໍລິຄຳໄຊ, ເປັນໂຮງງານຜະລິດໂດຍເຄື່ອງຈັກລະບົບອັດຕະໂນມັດ ເກືອບ 100% ແລະ ໄດ້ຮັບການຢັ້ງຢືນຄວາມສະອາດ ແລະ ປອດໄພດ້ານການຜະລິດອາຫານສາກົນ (GMP) ແລະ ວາງຈຳຫນ່າຍພາຍໃນແຂວງບໍລິຄຳໄຊ.
Users Today : 567
Users Yesterday : 1225
This Month : 9633
This Year : 129670
Total Users : 515894
Who's Online : 32