ເປີດການຮຽນ – ການສອນວິຊາຊີບ ຂະແໜງຕັດຫຍິບໃຫ້ຊາວໜຸ່ມ

      ໃນວັນທີ 24 ກຸມພາ 2022 ຢູ່ສູນການສຶກສານອກໂຮງຮຽນ ເມືອງ ວຽງທອງ ແຂວງ ບໍລິຄໍາໄຊ ໄດ້ຈັດພິທີ ເປີດຊຸດຝຶກອົບຮົມການຮຽນ – ການສອນວິຊາຊີບ ( ຂະແໜງຕັດຫຍິບ) ໄລຍະ 3 ເດືອນ ໃຫ້ຊາວໜຸ່ມຜູ້ດ້ອຍໂອກາດ ຢູ່ໃນບ້ານເປົ້າໝາຍຂອງແຜນງານພັດທະນາທ້ອງຖີ່ນແຂວງບໍລິຄໍາໄຊ, ແຜນງານລາວ/030 ໂດຍເປັນກຽດເຂົ້າຮ່ວມຂອງ ທ່ານ ດວງໃຈ ພົມມີໄຊ ຄະນະປະຈໍາພັກເມືອງ, ຫົວໜ້າຄະນະໂຄສະນາອົບຮົມເມືອງວຽງທອງ, ມີຄະນະຫ້ອງການສຶກສາທິການ ແລະ ກິ ລາເມືອງ, ມີຜູ້ຊ່ຽວຊານສາກົນປະຈໍາແຂວງບໍລິຄໍາໄຊ, ຜູ້ປະສານງານແຜນງານລາວ/030 ຂັ້ນແຂວງ, ຄູ – ອາຈານ ແລະ ນັກຝຶກອົບຮົມ ເຂົ້າຮ່ວມ.

      ພິທີ ທ່ານ ອາຈານ ສີສົມພອນ ແກ້ວວົງວິຈິດ ຜູ້ອໍານວຍການສູນການສຶກສານອກໂຮງຮຽນ ໄດ້ຜ່ານບົດລາຍງານຫຍໍ້ ໃນການຈັດຕັ້ງປະຕິບັດຊຸດຝຶກອົບຮົມຄັ້ງນີ້ ວ່າ: ພາຍໃນສູນ ມີຄູອາຈານສອນບໍາລຸງທົ່ວໄປ ລວມທັງໝົດ 10 ສະຫາຍ, ຍິງ 4 ສະຫາຍ, ມີຄູຝຶກຕັດຫຍິບ 4 ສະຫາຍ, ຍິງ 4 ສະຫາຍ, ຄູຝຶກເຄື່ອງຜູ້ຍິງ 2 ສະຫາຍ, ຄູຝຶກເຄື່ອງຜູ້ຊາຍ 2 ສະຫາຍ.

ໃນການຝຶກອົບຮົມຄັ້ງນີ້ ມີນັກຝຶກອົບຮົມທັງໝົດ 12 ຄົນ, ຈະໄດ້ຮຽນຕາມຄູ່ມືການສິດສອນວິຊາຕັດຫຍິບ ທີ່ທາງກົມການສຶກສານອກໂຮງຮຽນເປັນຜູ້ກຳນົດ ໂດຍຈະຈັດແບ່ງເວລາຮຽນໜື່ງວັນມີ 6 ຊົ່ງໂມງຮຽນ ແລະ ຜູ້ເຂົ້າຝຶກ ຈະໄດ້ຮຽນຮູ້ກ່ຽວກັບການແຕ້ມແບບຊຸດ, ຕັດ ແລະ ຫຍິບສິ້ນ, ຫຍິບກະໂປງ, ຫຍິບໂສ້ງຫົວຫູດ, ຫຍິບເສື້ອຄໍມົນແບບພື້ນຖານ, ຫຍິບເສື້ອຄໍຈີນ, ຫຍິບເຊື້ອຄໍເຊີດ, ຫຍິບເສື້ອຄໍຮາວາຍ, ຫຍິບເສື້ອຄໍປ້າຍ, ລວມເວລາຮຽນທັງໝົດມີ 13 ອາທິດ 390 ຊົ່ວໂມງຮຽນ.

ຄະນະຮັບຜິດຊອບ ຊຸດອົບຮົມ ກ່າວວ່າ: ການຈັດຝຶກອົບຮົມວິຊາຊີບຕັດຫຍິບ ໃຫ້ຊາວໜຸ່ມຜູ້ດ້ອຍໂອກາດໃນຄັ້ງນີ້ ກໍ່ເພື່ອເປັນການສົ່ງເສີມການສ້າງວຽກເຮັດງານທຳ ໃນສາຂາວິຊາຊີບ ທີ່ພັກ – ລັດ ໄດ້ສະຫງວນໄວ້ໃຫ້ພົນລະເມືອງລາວ, ເຊິ່ງພາຍຫລັງສຳເລັດການຝຶກແລ້ວ ກໍ່ສາມາດນຳໃຊ້ຄວາມຮູ້ທີ່ມີ ໄປປະກອບອາຊີບ ສ້າງວຽກເຮັດງານທຳ ຊ່ວຍໃຫ້ເສດຖະກິດຄອບຄົວດີຂຶ້ນ.

• Facebook
• Twitter
• Line