ສຶກສາແຂວງບໍລິຄໍາໄຊ ຕີລາຄາຄືນວຽກງານລົງກໍສ້າງຮາກຖານຕາມສາຍຕັ້ງ

ກອງປະຊຸມສະຫຼຸບວຽກງານກໍສ້າງຮາກຖານຕາມສາຍຕັ້ງ ຂອງຂະແໜງສຶກສາທິການ-ກິລາແຂວງ ໄດ້ຈັດຂຶ້ນໃນວັນທີ 22 ກຸມພາ 2022 ທີ່ຫ້ອງປະຊຸມສູນພັດທະນາຄູ ເມືອງປາກຊັນ ແຂວງບໍລິຄຳໄຊ ໂດຍການເປັນປະທານຂອງ ທ່ານ ລົມ ແພງສຸກ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ມີບັນດາຄູ-ອາຈານຈາກຂະແໜງສຶກສາ, ຫ້ອງການສຶກສາ 7 ເມືອງ, ສູນສຶກສາ, ຮອງເຈົ້າເມືອງ ແລະ ແຂກຖືກເຊີນ ເຂົ້າຮ່ວມ.

ກອງປະຊຸມ ໄດ້ຫຼຸບຕີລາຄາຄືນຜົນການຈັດຕັ້ງປະຕິບັດວຽກງານລົງກໍສ້າງຮາກຖານຕາມສາຍຕັ້ງ ໃນໄລຍະ 3 ເດືອນທ້າຍປີ 2021 ວ່າ: ຄະນະພັກ, ຄະນະພະແນກສຶກສາທິການ ແລະ ກິລາ ໄດ້ມີມະຕິຕົກລົງແຕ່ງຕັ້ງໃຫ້ພະນັກງານລົງລົງກໍ່ສ້າງຮາກຖານຕາມສາຍຕັ້ງຢູ່ບັນດາເມືອງ ເພື່ອເກັບກຳຂໍ້ມູນ, ສະພາບຂອງທ້ອງຖີ່ນ, ຄວາມອາດສາມາດຂອງຫ້ອງການສຶກສາທິການ ແລະ ກິລາເມືອງ ແລະ ໂຮງຮຽນ ໃນການຜັນຂະຫຍາຍແຜນຍຸດທະສາດຂອງການສຶກສາ ແລະ ກິລາ.

ໄລຍະການລົງກໍສ້າງຮາກຖານຕາມສາຍຕັ້ງ ພະແນກສຶກສາທິການ ແລະ ກິລາແຂວງ ລວມມີ 7 ໜ້າວຽກທີ່ໄດ້ຈັດຕັ້ງປະຕິບັດຜ່ານມາ ຈຸດເລີ່ມແມ່ນດ້ານການສຶກສາອົບຮົມການເມືອງ – ແນວຄິດ ໃຫ້ພະນັກງານ ຄູ – ອາຈານຢູ່ບັນດາເມືອງ ແລະ ໂຮງຮຽນ, ພ້ອມທັງນໍາເອົານິຕິກໍາທີ່ສໍາຄັນຂອງ ພັກ – ລັດ ລົງເຜີຍແຜ່ໃຫ້ເຂົາເຈົ້າເຂົ້າໃຈ, ມີແນວຄິດອຸ່ນອຽນທຸ່ນທ່ຽງ, ຫ້າວຫັນໃນການປະຕິບັດໜ້າທີ່ວິຊາສະເພາະ ແລະ ໜ້າທີ່ວຽກງານທີ່ຂັ້ນເທິງມອບໝາຍໃຫ້ ອົບຮົມໃນຫົວຂໍ້ຕ່າງໆ ສ້າງຄວາມເຂັ້ມແຂງໃຫ້ຜູ້ບໍລິຫານການສຶກສາ ແລະ ກິລາ ໃນສະພາບການໃໝ່ແຫ່ງຍຸກສະໄໝ ຊຸກຍູ້ ການຈັດການຮຽນ – ການສອນ “ສອນດີ – ຮຽນເກັ່ງ ” ຕາມຫົວຂໍ້ວິທະຍາສາດໃຫ້ປະກົດຜົນເປັນຈິງ.

ຊຸກຍູ້ການຈັດ ການຮຽນ – ການສອນ ແບບປະສົມປະສານ ( ສອນແບບເຊິ່ງໜ້າ ແລະ ແບບທາງໄກ ) ເພື່ອຮອງຮັບການແຜ່ລະບາດຂອງພະຍາດໂຄວິດ -19.

ຊຸກຍູ້ການສ້າງໂຮງຮຽນຄຸນນະພາບ, ໂຮງຮຽນຕົວແບບ, ໂຮງຮຽນປອດຢາເສບຕິດ, ໂຮງຮຽນຕົວແບບດ້ານ ກິລາ – ສິລະປະ ແລະ ໂຮງຮຽນສີຂຽວ ໃຫ້ເປັນຮູບປະທໍາ.

ຊຸກຍູ້ການຫຼຸດຜ່ອນອັດຕາປະລະການຮຽນ, ການຄ້າງຫ້ອງ, ເພີ່ມອັດຕາການເຂົ້າຮຽນ ແລະ ອັດຕາການເລື່ອນຂັ້ນ – ຊັ້ນ ໃຫ້ຫຼາຍຂັ້ນ ການເກັບກໍາຂໍ້ມູນສະຖິຕິນັກຮຽນປະລະ ແລະ ບໍາລຸງ ການຮຽນ – ການສອນ ການສຶກສານອກໂຮງຮຽນ ແລະ ວຽກອື່ນໆທີ່ປິ່ນອ້ອມ.

ໂອກາດນີ້ ເພື່ອເປັນການຢັ້ງຍືນຜົນສຳເລັດຂອງວຽກງານດັ່ງກ່າວ ທ່ານ ລົມ ແພງສຸກ ໄດ້ໃຫ້ກຽດມອບໃບຍ້ອງຍໍ ໃຫ້ແກ່ຜູ້ທີ່ມີສ່ວນໃນຜົນສຳເລັດ ການລົງກໍສ້າງຮາກຖານຕາມສາຍຕັ້ງຂອງຂະແໜງການສຶກສາ.

• Facebook
• Twitter
• Line