ຮວບຕົວຜູ້ຄ້າຢາບ້າ 2 ລາຍມາດຳເນີນຄະດີ

ເວລາປະມານ 13ໂມງ ວັນທີ  09 ກຸມພາ 2022 ນີ້, ເຈົ້າໜ້າທີ່ວິຊາສະເພາະ ປກສ ເມືອງບໍລິຄັນ ແຂວງບໍລິຄຳໄຊ ໄດ້ຮັບແຈ້ງຄວາມຈາກພົນລະເມືອງດີວ່າ : ຈະມີການນັດຊື້-ຂາຍຢາເສບຕິດ ( ຢາ ບ້າ ) ຢູ່ເຮືອນ ຂອງ ທ້າວ ກໍ ( ນາມສົມມຸດ ) ບ້ານໂພນມຸງຄູນ ເມືອງບໍລິຄັນ ແຂວງບໍລິຄຳໄຊ, ເຈົ້າໜ້າທີ່ວິຊາສະເພາະຈື່ງສະເໜີຂໍຄຳສັ່ງກວດຄົ້ນເຄຫາສະຖານ ຈາກໄອຍະການປະຊາຊົນເຂດ 1 ເພື່ອນຳການກວດຄົ້ນເຮືອນຫຼັງດັ່ງກ່າວ,  ສາມາດກັກຕົວເປົ້າໝາຍໄດ້ 01 ຄົນ ຊື່ ທ້າວ ທະນົງສັກ ອາຍຸ 28 ປີ ພ້ອມຂອງກາງຢາບ້າ 133 ເມັດ, ປືນລ່າເນື້ອປະເພດປືນແກ໊ບ 01 ກະບອກ ພ້ອມດ້ວຍລູກປືນ ຈຳນວນ 58 ລູກ ແລະ ລົດຈັກເວບຈີນ ສີດຳແດງ 01 ຄັນ ບໍ່ມີປ້າຍທະບຽນ.

ຜ່ານການສືບສວນ-ສອບສວນຂອງເຈົ້າໜ້າທີ່ວິຊາສະເພາະ ທ້າວ ທະນົງສັກ ໄດ້ຮັບສາລະພາບວ່າ : ຢາບ້າຈຳນວນ 133 ເມັດ ທີ່ກວດພົບເຫັນຢູ່ຖົງໂສ້ງເບື້ອງຊ້າຍ, ປືນແກ໊ບ ພ້ອມດ້ວຍລູກປືນ ແມ່ນເປັນຂອງຕົນເອງຢ່າງແທ້ຈີງ, ເຊີ່ງຕົນໄດ້ມີການພົວພັບເສບຢາເສບຕິດມາແຕ່ປີ 2012, ຕົກມາຮອດເດືອນ ເມສາ 2020 ຈື່ງຫັນມາ ຄ້າ-ຂາຍຢາບ້າ ມາຈົນຮອດປະຈຸບັນ,  ຢາບ້າທີ່ນຳມາຂາຍໃຫ້ກຸ່ມໄວລຸ່ນພາຍໃນເມືອງບໍລິຄັນ ແມ່ນຊື່ມາຈາກ ທ້າວ ຂໍ ( ນາມສົມມຸດ ) ປະຊາຊົນ ບ້ານໂນນສົມບູນ ເມືອງບໍລິຄັນ ແຂວງບໍລິຄຳໄຊ, 50 ເມັດ ໃນລາຄາ 200.000 ກີບ, ຈຸດນັດສົ່ງແຕ່ລະຄັ້ງແມ່ນ ເຮືອນຂອງ ທ້າວ ຄໍ ( ນາມສົມມຸດ ) ບ້ານໂພນມຸງຄູນ ເມືອງບໍລິຄັນ, ຄັ້ງຫຼ້າສຸດແມ່ນ ຊື່ນຳທ້າວ ໄຊ ເຮີ ປະຊາຊົນ ບ້ານ ສີສະຫວາດ ເມືອງບໍລິຄັນ ແຂວງບໍລິຄຳໄຊ  ໃນຈຳນວນ 200 ເມັດ, ໃນລາຄາ 300.000 ກີບ, ຕົກມາຮອດ ວັນທີ 09 ກຸມພາ 2022  ຈື່ງຖືກເຈົ້າໜ້າທີ່ກັກຕົວມາດໍາເນີນຄະດີ. ຈາກນັ້ນທາງເຈົ້າໜ້າທີ່ວິຊາສະເພາະໄດ້ທຳການ ສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການຈື່ງສາມາດກັກໄດ້ອີກ 01 ເປົ້າໝາຍຄື: ທ້າວ ໄຊເຮີ ອາຍຸ 23 ປີ ປະຊາຊົນ ບ້ານ ສີສະຫວາດ ເມືອງບໍລິຄັນ ແຂວງບໍລິຄຳໄຊ ພ້ອມຂອງກາງຢາບ້າຈຳນວນ 2.152 ເມັດ, ທ້າວ ໄຊເຮີ ຍັງໄດ້ຮັບສາລະພາບຕໍ່ເຈົ້າໜ້າທີ່ວ່າ,  ຕົນແມ່ນໄດ້ເລີ່ມເຄື່ອນໄຫວຄ້າຂາຍຢາບ້າມາແຕ່ ປີ 2017 ຈົນຮອດປະຈຸບັນ, ຢາບ້າທີ່ນຳມາຂາຍ ແມ່ນຊື້ນຳ ທ້າວ ງໍ ( ນາມສົມມຸດ ) ປະຊາຊົນ ບ້ານ ວັດທາດ ເມືອງບໍລິຄັນ ແຂວງບໍລິຄຳໄຊ, ຊື້ຈຳນວນ 10 ຄັ້ງ, ຄັ້ງລະ 05 ຖົງນ້ອຍ, ຕົກເປັນເງີນຄັ້ງລະ 400.000 ກີບ, ແລ້ວນໍາໄປຂາຍຕໍ່ ໃນລາຄາ 500.000 ກີບ, ຕໍ່ 01 ຖົງນ້ອຍ. ຕໍ່ມາທ້າວ ໄຊ ເຮີ ຍັງໄດ້ຊື້ນຳ ທ້າວ ຈໍ ( ນາມສົມມຸດ ) ບໍ່ຮູ້ບ້ານ ເມືອງວຽງທອງ ແຂວງບໍລິຄຳໄຊ, ຊື້ຫຼາຍຄັ້ງຈົນຈື່ບໍ່ໄດ້, ຊື້ຄັ້ງລະ 01 ມັດ ໃນລາຄາ 2.000.000ກີບ, ການຊື້ຂາຍແຕ່ລະຄັ້ງແມ່ນ ທ້າວ ໄຊເຮີ ເປັນຜູ້ໂທຫາ ທ້າວ ຈໍ ມາສົ່ງໃຫ້, ຄັ້ງສຸດທ້າຍ  ທ້າວ ໄຊເຮີ ຊື້ຢາບ້າ ນຳທ້າວ ຈໍ  ແມ່ນວັນທີ 08 ກຸມພາ 2022  ຈຳນວນ 01 ມັດ ເທົ່າກັບ 10 ຖົງນ້ອຍ, ໃນລາຄາ 3.500.000 ກີບ, ພາຍຫຼັງໄດ້ຢາບ້າແລ້ວ ທ້າວ ໄຊເຮີ ກໍ່ໄດ້ມາເຊົ່າຫ້ອງພັກ ແຫ່ງໜື່ງ ຂອງບ້ານໂພນມຸງຄູນ ເມືອງບໍລິຄັນ ແຂວງບໍລິຄຳໄຊ ເພື່ອລໍຖ້າຂາຍຕໍ່ໃຫ້ກັບໄວລຸ້ນເຂດບ້ານໂພນມຸງຄຸນ, ຕົກມາຮອດເວລາ 18 ໂມງ 35 ນາທີ ຂອງວັນທີ 11 ກຸມພາ 2022 ຈຶ່ງຖືກເຈົ້າໜ້າທີ່ກັກຕົວມາດໍາເນີຄະດີ.

ຜ່ານການສຶບສວນ-ສອບສວນຂອງເຈົ້າໜ້າທີ່ວິຊາສະເພາະເຫັນວ່າ : ທ້າວ ທະນົງສັກ  ແມ່ນມີເຈດຕະນາ ເຄື່ອນໄຫວ ມີຢາເສບຕິດປະເພດຢາບ້າໄວ້ໃນຄອງຄອງ, ເພື່ອເສບ ແລະ ຂາຍ, ນອກນັ້ນ ຍັງມີອາວຸດລ່າເນື້ອໄວໃນຄອບຄອງ ໂດຍບໍ່ຖືກຕ້ອງຕາມລະບຽບກົດໝາຍ ການກະທຳດັ່ງກ່າວແມ່ນຜິດ ໃນມາດຕາ 320, 315, 331 ຂອງປະມວນກົດໝາຍອາຍາສະບັບປັບປຸງປີ 2017, ສວ່ນ ທ້າວ ໄຊເຮີ  ໄດ້ມີເຈດຕະນາ ຄ້າ-ຂາຍ ຢ້າບ້າ, ມີຢາເສບຕິດໄວ້ໃນຄອບຄອງ ແມ່ນຜິດໃນມາດຕາ  315 ແລະ 320  ຂອງກົດໝາຍອາຍາ ປີ 2017  ເຫັນວ່າທັງ 02 ມີເຈດຕະນາເຄື່ອນໄຫວກະທຳຜິດ ເຫັນສົມຄວນດຳເນີນຄະດີຕາມລະບຽບກົດໝາຍ. ສ່ວນຜູ້ຮ່ວມຂະບວນການດັ່ງກ່າວເຈົ້າໜ້າທີ່ພວມເລັ່ງຕິດຕາມເພື່ອກັກຕົວມາດໍາເນີນຄະດີໃນຂັ້ນຕອນຕໍ່ໄປ.

• Facebook
• Twitter
• Line