ເມືອງທ່າພະບາດ ມີບ້ານປ້ອງກັນຄວາມສະຫງົບດີ ກວມເອົາ100%

 

ເພື່ອຄວາມຮັບປະກັນໃຫ້ເມືອງທ່າພະບາດ ມີຄວາມແໜ້ນທາງດ້ານການເມືອງ, ເຂັ້ມແຂງທາງດ້ານວຽກງານປ້ອງກັນຊາດ-ປ້ອງກັນຄວາມສະຫງົບ  ອົງຄະນະພັກເມືອງທ່າພະບາດ ໄດ້ສຸມໃສ່ວຽກງານຢ່າງຮອບດ້ານ ໃຫ້ມີຄວາມເຂັ້ມແຂງຢ່າງຕໍ່ເນື່ອງ ໂດຍສະເພາະແມ່ນວຽກງານວຽກງານປ້ອງກັນຊາດ-ປ້ອງກັນຄວາມສະຫງົບ ກໍ່ແມ່ນຍຸດທະສາດອັນໜື່ງ ທີ່ເມືອງທ່າພະບາດຕອ້ງໄດ້ໃຫ້ຄວາມສຳຄັນເປັນພິເສດ ດັ່ງ ທ່ານ ປອ ດວງຕາ ມໍລະຄາສຸກ ກຳມະການພັກແຂວງ ເລຂາພັກເມືອງ-ເຈົ້າເມືອງ ທັງເປັນປະທານປ້ອງກັນຊາດ-ປ້ອງກັນຄວາມສະຫງົບຂັ້ງເມືອງທ່າພະບາດ ໄດ້ໃຫ້ສຳພາດ ໃນວັນທີ 13 ສິງຫາ 2020 ນີ້ວ່າ:

 ເມືອງທ່າພະບາດ ປະກອບມີ 26 ບ້ານ, 5.366 ຄອບຄົວ ມີຈໍານວນພົນທັງຫມົດ 29.057 ຄົນ, ຍິງ 14.658 ຄົນ, ມີບ້ານເລາະລຽບຕາມຊາຍແດນປະເທດໄທ ຈໍານວນ 14 ບ້ານ ຕະຫຼອດໄລຍະ 5 ປີ ການນຳທຸກຂັ້ນໄດ້ສຸມໃສ່ ວຽກກໍ່ສ້າງຮາກຖານການເມືອງຢ່າງແຂງແຮງ ໂດຍຖືເອົາວຽກງານດັ່ງກ່າວເປັນວຽກງານຈຸດສຸມ ເພື່ອເຮັດໃຫ້ທົ່ວເມືອງມີຄວາມສະຫງົບ-ປອດໄພຮອບດ້ານ, ປະຊາຊົນມີຄວາມຕື່ນຕົວທາງດ້ານການເມືອງ-ແນວຄິດ, ມີສະຕິຕໍ່ການຈັດຕັ້ງ ແລະ ລະບຽບກົດຫມາຍ, ມີຄວາມສາມັກຄີປອງດອງ ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ, ສ້າງສາພັດທະນາດ້ານເສດຖະກິດ ແກ້ໄຂຊີວິດການເປັນຢູ່ໃຫ້ດີຂຶ້ນ. ຄະນະນຳຂອງເມືອງ ໄດ້ແຕ່ງຕັ້ງຄະນະຊີ້ນຳ ແລະ ກອງເລຂາກໍ່ສ້າງຮາກຖານ ເພື່ອຄົ້ນຄ້ວາຄັດເລືອກເອົາພະນັກງານຫຼັກແຫຼ່ງ ປະກອບເປັນພະນັກງານກໍ່ສ້າງຮາກຖານການເມືອງ ມີທັງໝົດ 35-45 ສະຫາຍ ຕໍ່ປີ ໂດຍປະຕິບັດຕາມ 4 ເນື້ອໃນ 4 ຄາດໝາຍນັ້ນ ເມືອງທ່າພະບາດ ແມ່ນໄດ້ສູມໃສ່ວຽກສຶກສາອົບຮົມການເມືອງ-ແນວຄິດ, ວຽກປ້ອງກັນຊາດ-ປ້ອງກັນຄວາມສະຫງົບ, ວຽກຊຸກຍູ້ຂະບວນການເສດຖະກິດ ແກ້ໄຂຄວາມທຸກຍາກ, ວຽກວັດທະນະທໍາສັງຄົມ, ວຽກກໍ່ສ້າງ ແລະ ປັບປຸງລະບົບການເມືອງຢູ່ຂັ້ນຮາກຖານ ໃຫ້ມີຄວາມເຂັ້ມແຂງໜັກແໜ້ນ, ພ້ອມດຽວກັນນັ້ນຍັງໄດ້ແຕ່ງຕັ້ງຄະນະຕິດຕາມ, ກວດກາ ໃນແຕ່ລະໄລຍະຢ່າງຕໍ່ເນື່ອງ ເພື່ອຕີລາລາປະເມີນຜົນແຕ່ລະວຽກງານ ໃຫ້ໄດ້ຕາມເງື່ອນໄຂ ແລະ ມາດຖານທີ່ວາງໄວ້.

ມາຮອດປະຈຸບັນ ເມືອງທ່າພະບາດ ສາມາດປະກາດສ້າງບ້ານປ້ອງກັນຄວາມສະຫງົບ ທົ່ວເມືອງ 26 ບ້ານ ເທົ່າກັບ 100%, ຮັບຮອງເປັນບ້ານປ້ອງກັນຄວາມສະຫງົບດີ ໄດ້ 1 ບ້ານ, ສ້າງບ້ານປ້ອມໝັ້ນສູ້ຮົບ ກຸ່ມບ້ານສູ້ຮົບຕິດລຽນໄດ້ 25 ບ້ານ, ໃນ 34 ໜ່ວຍພັກຮາກຖານບ້ານ ສາມາດຢັ້ງຢືນເປັນໜ່ວຍພັກປອດໃສເຂັ້ມແຂງ, ໜັກແໜ້ນໄດ້ 23 ໜ່ວຍພັກ ເທົ່າກັບ 76%, ສ້າງຄອບຄົວພັດທະນາ ຕາມດໍາລັດ 309/ລບ ໄດ້ 457 ຄອບຄົວ, ກວດກາປະເມີນຕາມດໍາລັດ 348/ລບ ເມືອງທ່າພະບາດ ຍັງເຫຼືອຄອບຄົວບໍ່ທັນພົ້ນທຸກພຽງແຕ່ 23 ຄອບຄົວ ແລະ ຄອບຄົວອານາຖາ 2 ຄອບຄົວ.

• Facebook
• Twitter
• Line