ກຳລັງ ປກສ ເມືອງປາກກະດິງ ເຊື່ອມຊືມມະຕິ 04/ຄບສພ

ເພື່ອຜັນຂະຫຍາຍມະຕິ 04/ຄບສພ ໃຫ້ໄດ້ຮັບຜົນດີ ໃນຕອນເຊົ້າວັນທີ  08 ກຸມພາ 2022 ຢູ່ທີ່ຫ້ອງປະຊຸມກຸ່ມເສດຖະກິດ ເມືອງປາກກະດິງ ແຂວງບໍລິຄຳໄຊ ໄດ້ຈັດກອງປະຊຸມເຜີຍແຜ່ເຊື່ອມຊືມມະຕິຄະນະບໍລິຫານງານສູນກາງພັກ ວ່າດ້ວຍເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ ໃຫ້ຂົງເຂດກຳລັງ ປ້ອງກັນຄວາມສະຫງົບຂອງເມືອງ, ເປັນກຽດເຜີຍແຜ່ເຊື່ອມຊືມໂດຍທ່ານ ບຸນຄົບ ຈັນທະວົງ ຮອງເລຂາຄະນະບໍລິຫານພັກ ເມືອງປາກກະດິງ, ມີຫົວຫນ້າ ແລະ ຄະນະ ພ້ອມດ້ວຍນາຍ ແລະ ພົນຕຳຫລວດ ເຂົ້າຮ່ວມ.

ຈຸດປະສົງການເຜີຍແຜ່ ເພື່ອແນ່ໃສ່ປັບປຸງຄຸນທາດການເມືອງ, ວິທີການເຮັດວຽກ ແລະ ຊັບຊ້ອນຈັດວາງພະນັກງານ ໃຫ້ຖືກຕ້ອງຕາມຄວາມຮູ້ຄວາມສາມາດ, ຄວາມຮຽກຮ້ອງຕ້ອງການຂອງຫນ້າທີ່ວຽກງານ ແລະ ການເລັ່ງທວງຂອງສະພາບການໃນໄລຍະໃໝ່, ພັກເຮົາມີຄວາມຈຳເປັນຕ້ອງໄດ້ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ.

ເພື່ອແກ້ໄຂຄວາມບໍ່ເປັນເອກະພາບ, ຄວາມບໍ່ເຂັ້ມງວດຕໍ່ທິດນຳ, ຫຼັກການຂອງພັກ, ກົດໝາຍ, ລະບຽບການ ກ່ຽວກັບການປະຕິບັດວຽກງານພະນັກງານ ແລະ ການເສື່ອມຖອຍດ້ານຄຸນນະພາບການເມືອງ, ຄຸນສົມບັດສິນທຳປະຕິວັດ ກໍ່ຄືປະກົດການຫຍໍ້ທໍ້ຕ່າງໆໃນຖັນແຖວພະນັກງານຢ່າງເຂັ້ມງວດ ຕາມກົດໝາຍ ແລະ ນິຕິກຳທີ່ກ່ຽວຂ້ອງ.

ເຊີ່ງແມ່ນໜຶ່ງໃນບັນຫາທີ່ສຳຄັນ ພົວພັນເຖີງການກຳອຳນາດ ແລະ ການຄົງຕົວຂອງພັກເຮົາ, ທັງເປັນບັນຫາຍຸດທະສາດພື້ນຖານຍາວນານ ເພື່ອສ້າງໃຫ້ມີຖັນແຖວພະນັກງານ (ນຳພາ, ຄຸ້ມຄອງ ແລະ ວິຊາການ) ທີ່ພຽບພ້ອມ ແລະ ປ່ຽມລົ້ນໄປດ້ວຍຄຸນທາດການເມືອງ, ຄຸນສົມບັດສິນທຳປະຕິວັດທີ່ໜັກແໜ້ນ, ມີນ້ຳໃຈເສຍສະຫຼະສູງ, ເປັນແບບຢ່າງທີ່ດີໃນການດຳລົງຊີວິດ, ມີຈັນຍາບັນ, ຈັນຍາທຳ, ມີຄວາມຮູ້ຄວາມສາມາດ-ຊຳນິຊຳນານ, ມີແບບແຜນເຮັດວຽກແບບວິທະຍາສາດ, ຮັບໃຊ້ປະຊາຊົນ ແລະ ປະເທດຊາດຢ່າງສຸດໃຈ, ສືບທອດພາລະກິດປະຕິວັດຂອງພັກ ແລະ ຂອງຊາດລາວ ໃຫ້ຍືນຍົງຄົງຕົວ.

 

• Facebook
• Twitter
• Line