ກອງປະຊຸມດັ່ງກ່າວໄດ້ໄຂຂຶ້ນໃນຕອນເຊົ້າຂອງວັນທີ 25 ມັງກອນ 2022 ຢູ່ທີ່ຫ້ອງປະຊຸມກຸ່ມເສດຖະກິດເມືອງປາກກະດິງ ແຂວງບໍລິຄຳໄຊ ພາຍໃຕ້ການເປັນປະທານຂອງ ທ່ານ ສີອຳພອນ ໝາຍໝັ້ນ ຫົວໜ້າຫ້ອງວ່າການເມືອງໂດຍ ໃຫ້ກຽດເຂົ້າຮ່ວມຂອງ ທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ, ມີຮອງເຈົ້າເມືອງ, ຫົວໜ້າຫ້ອງການຕະຫລອດຮອດພະນັກງານວິຊາການພາຍໃນຫ້ອງວ່າການ ແລະ ຫ້ອງການອ້ອມຂ້າງເຂົ້າຮ່ວມ.
ກອງປະຊຸມໄດ້ຮັບຟັງການຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານຮອບດ້ານຂອງຫ້ອງວ່າການເມືອງປະຈຳປີ 2021 ແລະ ຜ່ານທິດທາງແຜນການປີ 2022 ຫ້ອງວ່າການເມືອງປາກກະດິງເປັນອົງການຈັດຕັ້ງໜຶ່ງໃນໂຄງປະກອບກົງຈັກຂອງອົງຄະນະພັກ, ອົງການປົກຄອງເມືອງ ມີພາລະບົດບາດ, ສິດ ແລະ ໜ້າທີ່ເປັນເສນາທິການຊ່ວຍວຽກປິ່ນອ້ອມໃຫ້ແກ່ເລຂາພັກເມືອງ, ເຈົ້າເມືອງ, ຮອງເຈົ້າເມືອງ ແລະ ຄະນະພັກເມືອງ, ອຳນວຍຄວາມສະດວກໃນການຊຸກຍູ້ຕິດຕາມການຈັດຕັ້ງປະຕິບັດມະຕິ, ຂໍ້ຕົກລົງ ກອງປະຊຸມຂອງພັກ ແລະ ລັດເປັນໃຈກາງປະສານງານລະຫວ່າງການນຳຂັ້ນຕ່າງໆແຕ່ຂັ້ນເທິງລົງຮອດຂັ້ນຮາກຖານບ້ານ ແລະ ປະກອບມີ 3 ໜ່ວຍງານຄື: ໜ່ວຍງານຄົ້ນຄວ້າສັງລວມ, ໜ່ວຍງານຄຸ້ມຄອງບໍລິຫານ, ພິທີການ ແລະ ການເງິນ, ໜ່ວຍງານຈັດຕັ້ງ, ກວດກາ ແລະ ກໍ່ສ້າງຮາກຖານການເມືອງມີພະນັກງານລັດຖະກອນທັງໝົດ 22 ທ່ານ, ຍິງ6 ໃນໄລຍະຜ່ານມາໄດ້ຖືເອົາວຽກງານການເມືອງ-ແນວຄິດເຊື່ອມຊຶມໃຫ້ຖັນແຖວພະນັກງານ, ສະມາຊິກພັກ, ຍົກສູງຄວາມເປັນເຈົ້າການປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມີຄວາມເອົາໃຈໃສ່ຕໍ່ໜ້າທີ່ວຽກງານທີ່ໄດ້ຮັບການມອບໝາຍພ້ອມປະສານງານກັບຂົງເຂດປ້ອງກັນຊາດ-ປ້ອງກັນຄວາມສະຫງົບ, ຂົງເຂດຍຸຕິທຳ ແລະ ນິຕິບັນຍັດເຮັດໃຫ້ທົ່ວເມືອງມີຄວາມສະຖຽນລະພາບທາງດ້ານການເມືອງ, ສັງຄົມມີຄວາມສີວິໄລ, ພ້ອມກັນນັ້ນກອງປະຊຸມຍັງໄດ້ຮັບຟັງການປະກອບຄຳເຫັນຈາກຫ້ອງການອ້ອມຂ້າງຕໍ່ຮ່າງບົດສະຫລຸບ ແລະ ທິດທາງແຜນການເພື່ອເຮັດໃຫ້ມີເນື້ອໃນຄົບຖ້ວນສົມບູນໃນການຈັດຕັ້ງປະຕິບັດໃນຕໍ່ໜ້າ ແລະ ຕອນທ້າຍຍັງໄດ້ມອບໃບຍ້ອງຍໍໃຫ້ແກ່ພະນັກງານຜູ້ທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານໃນໜຶ່ງປີຜ່ານມາ.
Users Today : 331
Users Yesterday : 1225
This Month : 9397
This Year : 129434
Total Users : 515658
Who's Online : 26