ສຳເລັດກອງປະຊຸມໃຫຍ່ ຄັ້ງທີ V ຄະນະພັກຮາກຖານຫ້ອງວ່າການ ແຂວງບໍລິຄຳໄຊ

ກອງປະຊຸມໃຫຍ່ ຄັັ້ງທີ V ຄະນະພັກຮາກຖານຫ້ອງວ່າການ ແຂວງບໍລິຄຳໄຊ ໄດ້ຈັດຂຶ້ນໃນວັນທີ 21 ມັງກອນ 2022 ຢູ່ຫ້ອງປະຊຸມຂອງຕົນ ໂດຍພາຍໃຕ້ການເປັນປະທານ ສະຫາຍ ສົມໃຈ ຄຸນພະໄຊ ກໍາມະການພັກແຂວງ, ເລຂາຄະນະພັກຮາກຖານຫ້ອງວ່າການແຂວງ, ໃຫ້ກຽດເຂົ້າຮ່ວມໂດຍ ສະຫາຍ ກອງແກ້ວ ໄຊສົງຄາມ ກໍາມະການສູນກາງພັກ, ເລຂາຄະນະບໍລິຫານງານພັກແຂວງບໍລິຄຳໄຊ, ມີຄະນະພັກຮາກຖານ, ສະມາຊິກພັກ ແລະ ແຂກຮັບເຊີນ ເຂົ້າຮ່ວມ.

ໃນກອງປະຊຸມ ໄດ້ຮັບຟັງການຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງຄະນະພັກຮາກຖານຫ້ອງວ່າການແຂວງ ແຕ່ປີ 2018 – 2021 ເຫັນວ່າ ໄດ້ສຸມໃສ່ຫຼາຍວຽກງານສໍາຄັນ ແລະ ຍາດໄດ້ຜົນສໍາເລັດໃນຫຼາຍດ້ານ ໂດຍສະເພາະແມ່ນດ້ານການເມືອງ-ແນວຄິດ ໄດ້ສຶກສາອົບຮົມໃຫ້ສະມາຊິກພັກ, ພະນັກງານ-ລັດຖະກອນ ເປັນເຈົ້າການປົກປ້ອງແນວທາງຂອງພັກ, ຕອບຕ້ານສິ່ງຫຍໍ້ທໍ້ແນວຄິດສວຍໂອກາດ, ສວຍໃຊ້ໜ້າທີ່ຕໍາແໜ່ງ, ພະຍາດອາດຍາສິດ, ເອກະຊົນ, ສໍ້ລາດບັງຫຼວງ, ຫຼີ້ນກິນຟູມເຟືອຍ ແລະ ມີຄວາມຮັບຜິດຊອບຕໍ່ໜ້າທີ່ການເມືອງຂອງຕົນໄດ້ດີ, ມີຄວາມສາມັກຄີພາຍໃນພັກ, ຕ້ານໄດ້ແນວຄິດຫຼາຍພັກ, ຫຼາຍເຄົ້າ, ຈຸ້ມເຈື້ອພັກພວກ, ໄດ້ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IV ຂອງຕົນເປັນອັນລະອຽດ ແລະ ເຂົ້າສູ່ວຽກງານຕົວຈິງໃນແຕ່ລະດ້ານ ໂດຍຖືເອົາການປັບປຸງ ແລະ ກໍ່ສ້າງພັກຕາມ 5 ຫຼັກການ, 3 ທິດນໍາ ເພື່ອເຮັດໃຫ້ພາຍໃນພັກມີຄວາມໜັກແໜ້ນເຂັ້ມແຂງ, ບັນດາໜ່ວຍພັກທີ່ຂື້ນກັບຄະນະພັກຮາກຖານ ສາມາດຍາດໄດ້ນາມມະຍົດ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ທຸກໆປີ. ພ້ອມນັ້ນ ຍັງໄດ້ເອົາໃຈໃສ່ ວຽກງານກໍ່ສ້າງພັກພະນັກງານ ໂດຍໄດ້ສົ່ງພະນັກງານໄປຍົກລະດັບທິດສະດີການເມືອງ-ການປົກຄອງ ແລະ ດ້ານວິຊາສະເພາະ ທັງພາຍໃນ ແລະ ຕ່າງປະເທດ.

ກອງປະຊຸມໄດ້ພ້ອມກັນຄົ້ນຄວ້າ ປະກອບຄຳເຫັນໃຫ້ຮ່າງລາຍງານການເມືອງ ແລະ ບົດສຳຫຼວດການນຳພາຂອງຄະນະພັກ ຕີລາຄາດ້ານດີ, ດ້ານອ່ອນ ແລະ ຂໍ້ຄົງຄ້າງ ພ້ອມນີ້ ຍັງໄດ້ເປັນເອກະພາບກັນຮັບຮອງເອົາທິດທາງແຜນການ 5 ປີຕໍ່ໜ້າ.

ຈາກນັ້ນ ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຊຸດໃໝ່ ແລະ ໃນກອງປະຊຸມຄັ້ງປະຖົມມະລືກ ຂອງຄະນະພັກຮາກຖານ ສະໄໝທີ V ໄດ້ເປັນເອກະສັນເລືອກເອົາ ສະຫາຍ ສົມໃຈ ຄຸນພະໄຊ ເປັນເລຂາຄະນະພັກຮາກຖານ, ສະຫາຍ ສາຍຄໍາ ວົງຄໍາທອງ ເປັນຮອງເລຂາຄະນະພັກຮາກຖານ, ສະຫາຍ ສົມໃຈ ແກ້ວສຸວັນ ເປັນປະທານກວດກາພັກ, ສະຫາຍ ຄໍາຫຼ້າ ຫຼວງແສງເພັດ ເປັນຮອງປະທານກວດກາພັກ, ສະຫາຍ ພທ ເພັດສະໄໝ ໂຮມຂະສິດ, ສະຫາຍ ພັນສະໝອນ ຈັນທະສອນ ແລະ ສະຫາຍ ຂັນແກ້ວ ວິໄລວັນ ເປັນຄະນະ.

• Facebook
• Twitter
• Line