ບໍລິຄໍາໄຊ ມອບໃບຢັ້ງຢືນ ການຍົກລະດັບທິດສະດີການເມືອງ – ການປົກຄອງ ໃຫ້ຄະນະໜ່ວຍພັກບ້ານ – ຄະນະບ້ານ

ພິທີປິດ ຊຸດອົບຮົມທິດສະດີການເມືອງ – ການປົກຄອງ ໄລຍະສັ້ນ 10 ວັນ ຮຸ່ນທີ XVII ໃຫ້ເລຂາພັກບ້ານ, ນາຍບ້ານ ພາຍໃນແຂວງບໍລິຄຳໄຊ ໄດ້ຈັດຂຶ້ນໃນວັນທີ 20 ມັງກອນ 2022 ຢູ່ໂຮງຮຽນການເມືອງ – ການປົກຄອງແຂວງ ໂດຍການເຂົ້າຮ່ວມຂອງ ສະຫາຍ ວັນວິໄລ ແດນພູຫຼວງ ຮອງເລຂາພັກແຂວງບໍລິຄໍາໄຊ, ມີຄະນະຮັບຜິດຊອບຊຸດຝຶກອົບຮົມ ແລະ ຄະນະໜ່ວຍພັກບ້ານ, ຄະນະບ້ານ ພາຍໃນ 7 ເມືອງທົ່ວແຂວງ ເຂົ້າຮ່ວມ.

ຊຸດຝຶກອົບຮົມຄັ້ງນີ້ ໄດ້ດໍາເນີນການການຮຽນ – ການສອນ ແຕ່ວັນທີ 11 ມັງກອນ ເຊິ່ງເປັນການຝຶກອົບຮົມ ຕາມຫຼັກສູດທິດສະດີການເມືອງ – ການປົກຄອງ ໄລຍະ 10 ວັນ ທີ່ສະຖາບັນການເມືອງ ແລະ ການປົກຄອງແຫ່ງຊາດກຳນົດ ແລະ ມີ 9 ຫົວຂໍ້ວິທະຍາສາດຂອງແຂວງ, 3 ຫົວຂໍ້ຂອງແຂວງ ແລະ ຍັງມີວາລະແຫ່ງຊາດອີກ 2 ຫົວຂໍ້ ໂດຍໄດ້ດໍາເນີນການຮຽນ – ການສອນ ໃນ 3 ກຸ່ມວິຊາ, ມີ 18 ບົດ ເຊັ່ນ: ຍົກສູງຄຸນນະພາບສະມາຊິກພັກ ແລະ ວຽກງານຂະຫຍາຍພັກໃນໄລຍະໃໝ່, ຄວາມຮູ້ພື້ນຖານກ່ຽວກັບກົດໝາຍຂະແໜງກະສິກຳ ແລະ ປ່າໄມ້, ການນຳພາຂອງໜ່ວຍພັກບ້ານ ຕໍ່ການສ້າງເສດຖະກິດຄອບຄົວ, ວຽກງານຍຸຕິທຳຮາກຖານ ແລະ ການສ້າງບ້ານປອດຄະດີ ແລະ ອື່ນໆ, ໃນນີ້ມີຊົ່ວໂມງຮຽນ 36 ຊົ່ວໂມງ ແລະ ສົນທະນາແລກປ່ຽນ 36 ຊົ່ວໂມງ.

ໂອກາດນີ້ ສະຫາຍ ວັນວິໄລ ແດນພູຫຼວງ ຮອງເລຂາພັກແຂວງບໍລິຄໍາໄຊ ໄດ້ເປັນກຽດຂຶ້ນມອບ ໃບຢັ້ງຢືນການຜ່ານຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 10 ວັນ ຮຸ່ນທີ XVII ໃຫ້ເລຂາພັກບ້ານ, ນາຍບ້ານ ຈໍານວນ 42 ສະຫາຍ, ຍິງ 3 ສະຫາຍ ທີ່ໄດ້ສຳເລັດການຝຶກອົບຮົມ ຢ່າງສົມກຽດ.

• Facebook
• Twitter
• Line