ເມືອງບໍລິຄັນ ຖືກຮັບຮອງເປັນເມືອງສາມັກຄີປອງດອງເປັນເມືອງທີ່ 5 ຂອງແຂວງບໍລິຄໍາໄຊ.

         ພີທີປະກາດຮັບຮອງເອົາ ເມືອງບໍລິຄັນ ເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງເປັນເມືອງທີ່ 5 ຂອງແຂວງບໍລິຄໍາໄຊ ໄດ້ຈັດຂື້ນໃນວັນທີ່ 12 ມັງກອນ 2022 ນີ້. ຢູ່ສະໂມສອນຂອງເມືອງບໍລິຄັນ ໃຫ້ກຽດເຂົ້າຮ່ວມພິທີຂອງທ່ານ ບຸນຄໍາ ໄຊເຍ່ຍລໍວື່ ຄະນະປະຈໍາພັກແຂວງ ປະທານແນວລາວສ້າງຊາດແຂວງບໍລິຄໍາໄຊ, ທ່ານ ວັນດີ ຈັນສົມບັດ ຮອງຫົວໜ້າກົມຊົນເຜົ່າ ສູນກາງແນວລາວສ້າງຊາດ, ທ່ານ  ວັນເລີນ ປຸ້ຍໄມນີ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງບໍລິຄັນ, ມີແຂກຖືກເຊີນຈາກພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ, ຂັ້ນເມືອງ, ການນໍາຈາກບັນດາເມືອງອ້ອມຂ້າງພ້ອມດ້ວຍອໍານາດການປົກຄອງບ້ານທົ່ວເມືອງເຂົ້າຮ່ວມ.

ທ່ານ ບຸນມີ ວໍລະຈັກ ປະທານແນວລາວສ້າງຊາດເມືອງ ໄດ້ລາຍງານວ່າ: ການຈັດຕັ້ງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງໃນໄລຍະຜ່ານມາ. ເມືອງບໍລິຄັນ ມີ 44 ບ້ານ, ມີປະຊາກອນທັງໝົດ 57,006 ຄົນ, ຍິງ 9,338 ຄົນ ມີ 10 ຊົນເຜົ່າຢູ່ຮ່ວມກັນ, ທົ່ວເມືອງສາມາດຮັບຮອງເອົາຄອບຄົວສາມັກຄີປອງດອງໄດ້ແລ້ວ 8,127ຄອບຄົວ ກວມ 86,56%, ຍັງມີຄອບຄົວທີ່ບໍ່ຜ່ານການຮັບຮອງມີ 1,261ຄອບຄົວ ກວມ 13,44%, ສາມາດຮັບຮອງເອົາບ້ານສາມັກຄີປອງດອງໄດ້ 44 ບ້ານ ກວມ 100%, ຜ່ານ ມາ ໄດ້ເອົາໃຈໃສ່ສືກສາອົບຮົມການເມືອງແນວຄິດເຮັດໃຫ້ປະຊາຊົນມີຄວາມຮັບຮູ້ ແລະ ເຂົ້າໃຈຢ່າງເລີ່ກເຊີ່ງຕໍ່ແນວທາງນະໂຍບາຍຂອງພັກ-ລັດມີຄວາມຕື່ນຕົວປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງບ້ານ, ເປັນເຈົ້າການໃນການສ້າງສາພັດທະນາຕົນເອງສູງເຮັດໃຫ້ຊີວິດການເປັນຢູ່ດີຂື້ນ ຄວາມທຸກຍາກໄດ້ຮັບການແກ້ໄຂ, ມີຄອບຄົວຕົວແບບໃນການປູກຝັງ ແລະ ລ້ຽງສັດກາຍເປັນຄອບຄົວພັດທະນາຫຼາຍຂື້ນ, ປະຊາຊົນມີຄວາມອູ່ນອຽງທຸ່ນທ່ຽງເຊື້ອໜັ້ນຕໍ່ການນໍາພາຂອງພັກ-ລັດ ແລະ ມີຄວາມສາມັກຄີເປັນປືກແຜ່ນແໜ້ນໜາຮັກແພງຊ່ວຍເຫຼືອເຊີ່ງກັນ ແລະ ກັນ.

ໃນຕອນທ້າຍຂອງພິທີຍັງໄດ້ມອບໃບຢັ້ງຢືນເມືອງສາມັກຄີປອງດອງໃຫ້ເມືອງບໍລິຄັນ ເປັນກຽດມອບໂດຍທ່ານ ບຸນຄໍາ ໄຊເຍ່ຍລໍວື່ ປະທານແນວລາວສ້າງຊາດແຂວງບໍລິຄໍາໄຊ ພ້ອມທັງໂອ້ລົມຕໍ່ພິທີດັ່ງກ່າວ ກ່ອນອື່ນທ່ານຍັງໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະອັນພົ້ນເດັ່ນຂອງບັນດາເມືອງອໍານາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າທີ່ໄດ້ປະກອບສ່ວນຫຼາຍດ້ານໃນໄລຍະຜ່ານມາຈົນສາມາດຮັບຮອງເອົາເມືອງບໍລິຄັນ ເປັນເມືອງສາມັກຄີປອງດອງເປັນເມືອງທີ່ 5 ຂອງແຂວງບໍລິຄໍາໄຊ ຈົ່ງເອົາໃຈໃສປະຕີບັດຕາມ 4 ເນື້ອໃນ 4 ຄາດໝາຍ, ແຜນພັດທະນາເສດຖະກີດ-ສັງຄົມຂອງແຂວງ, ເມືອງວາງອອກໃຫ້ສອດຂ້ອງ ຮັກສາຄວາມສາມັກຄີເປັນປືກແຜ່ນແໜ້ນໜາ ສືບຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບເຮັດໃຫ້ຂອບເຂດຂອງຕົນຮັບຜິດຊອບມີຄວາມສະຫງົບປອດໄພຂື້ນເປັນກ້າວໆ. ຈາກນັ້ນບັນດາການນໍາພັກລັດຂັ້ນແຂວງ, ຂັ້ນເມືອງ ແລະ ອໍານາດການປົກຄອງບ້ານໄດ້ເຂົ້າຮ່ວມພິທີຕັດແຖບ, ເປີດປ້າຍ ແລະ ລັ່ນຄ້ອງ 9 ບາດເພື່ອຍັ້ງຢືນວ່າ ເມືອງບໍລິຄັນ ໄດ້ຮັບຮອງເປັນເມືອງສາມັກຄີປອງດອງ.

• Facebook
• Twitter
• Line