ສູນການສຶກສານອກໂຮງຮຽນ ເມືອງຄໍາເກີດ ປິດຊຸດອົບຮົມຕັດຫຍິບວິຊາຊີບໃຫ້ຊາວໜຸ່ມບ້ານເປົ້າໝາຍ

ໃນວັນທີ 11 ມັງກອນ 2022 ຢູ່ສູນການສຶກສານອກໂຮງຮຽນເມືອງ ໄດ້ຈັດພິທີປິດຊຸດເຝຶກອົບຮົມວິຊາຊີບຫຼັກສູດໄລຍະສັ້ນ 3 ເດືອນ ໃຫ້ຊາວໜຸ່ມບ້ານເປົ້າໝາຍ 19 ບ້ານ ຂຶ້ນ ໂດຍການເປັນປະທານຂອງທ່ານ ແສງແກ້ວ ໃສມະນີ ຮອງເຈົ້າເມືອງຄຳເກີດ, ໃຫ້ກຽດເຂົ້າຮ່ວມໂດຍ ທ່ານ ອຈ ໂພເພັດ ກຸນນາວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ແລະ ທ່ານ ຍອດ ລໍວັນໄຊ ຮອງຫົວໜ້າພະແນກແຜນການ ແລະ ການລົງທືນແຂວງບໍລິຄຳໄຊ, ມີແຂກຖືກເຊີນ, ນັກສຳມະນາກອນ ແລະພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນພິທີ ທ່ານ ອ່ອນຕໍ້ ເທບຄໍາເຮືອງ ຫົວໜ້າສູນການສຶກສານອກໂຮງຮຽນເມືອງ ໄດ້ລາຍງານວ່າ: ຊຸດອົບຮົມດັ່ງກ່າວ ໄດ້ເລີ່ມສອນແຕ່ວັນທີ 22 ເດືອນ ກໍລະກົດ ຫາ ວັນທີ 22 ເດືອນ ຕຸລາ 2021, ວິຊາຮຽນມີທັງໝົດ 10 ວິຊາຮຽນ ຄື: ພື້ນຖານຂອງການຢຽບຈັກ, ຄວາມຮູ້ທົ່ວໄປກ່ຽວກັບການໃຊ້ອຸປະກອນຕັດຫຍິບ, ວິທີແຕ້ມແບບ, ຕັດ ແລະ ຫຍິບສີ້ນສຳເລັດ, ວິທີແຕ້ມແບບ, ຕັດ ແລະ ຫຍິບກະໂປ່ງ, ຫຍິບເສື້ອຕ່າງໆ, ເພື່ອເປັນຄວາມຮູ້ພື້ນຖານໃຫ້ແກ່ຊາວໜຸ່ມໄວໜຸ່ມຜູ້ດ້ອຍໂອກາດ ໃຫ້ມີວຽກເຮັດ, ມີວິຊາຊີບເປັນຂອງຕົນ, ມີນັກສຳມະນາກອນທັງໝົດ 20 ນ້ອງ, ຍິງ 19 ນ້ອງ, ມີຄູ-ອາຈານສອນ ທັງໝົດ 6 ຄົນ, ຍິງ 4 ຄົນ, ເປັນລຸ້ນທີ 15 ຊິ່ງໄດ້ຮັບການສະໜັບສະໜູນຈາກໂຄງການລາວ/030 ປະຈຳແຂວງບໍລິຄຳໄຊ ເຊີ່ງເປັນມູນຄ່າທັງໝົດ 94 ລ້ານກີບ.

ຕອນທ້າຍ ທ່ານ ປະທານກໍ່ໄດ້ໂອ້ລົມ ຕໍ່ພິທີວ່າ ໃຫ້ນັກສຳມະນາກອນທີ່ມາຝຶກອົບຮົມຄັ້ງນີ້ ຈົ່ງນຳເອົາບົດຮຽນທີ່ຕົນຮຽນ ໄປປະກອບເປັນອາຊີບ, ສ້າງວຽກເຮັດງານທຳເປັນຂອງຕົນເອງໃຫ້ເກີດດອກອອກຜົນ.

ໃນພິທີ ໄດ້ມອບໃບຢັ້ງຢືນໃຫ້ແກ່ນັກສຳມະນາກອນ ມອບໂດຍທ່ານ ແສງແກ້ວ ໃສມະນີ ຄະນະປະຈຳພັກເມືອງ, ຮອງເຈົ້າເມືອງຄຳເກີດ.

ພ້ອມນັ້ນ ທ່ານປະທານ ແລະ ແຂກທີ່ຖືກເຊີນຍັງໄດ້ພາກັນເລາະຊົມຜົນງານຂອງກຸ່ມຜູ້ຮຽນຕັດຫຍິບທີ່ຜະລິດໄດ້ໃນໄລຍະ 3 ເດືອນທີ່ຜ່ານມາ ແລະ ທາງກຸ່ມຜູ້ຮຽນ ຍັງໄດ້ມອບໂຕະຫີນ 1 ຊຸດ ໃນມູນຄ່າ 750.000 ກີບ ເພື່ອເປັນຂອງທີ່ລະນຶກໃຫ້ສູນການສຶກສານອກໂຮງຮຽນເມືອງອີກດ້ວຍ.

• Facebook
• Twitter
• Line