ບໍລິຄຳໄຊ ຍົກລະດັບທິດສະດີການເມືອງ – ການປົກຄອງ ໃຫ້ 50 ຄະນະໜ່ວຍພັກບ້ານ – ຄະນະບ້ານ

ຊຸດຝຶກອົບຮົມທິດສະດີການເມືອງ – ການປົກຄອງ ໄລຍະສັ້ນ ຮຸ່ນທີ XVII ໃຫ້ເລຂາພັກບ້ານ, ນາຍບ້ານ ພາຍໃນແຂວງບໍລິຄຳໄຊ ໄດ້ໄຂຂຶ້ນໃນວັນທີ 11 ມັງກອນ 2022 ຢູ່ໂຮງຮຽນການເມືອງ – ການປົກຄອງແຂວງ ໂດຍການເຂົ້າຮ່ວມຂອງ ທ່ານ ວັນວິໄລ ແດນພູຫຼວງ ຮອງເລຂາພັກແຂວງ, ມີຄະນະຮັບຜິດຊອບຊຸດຝຶກອົບຮົມ ແລະ ຄະນະໜ່ວຍພັກບ້ານ, ຄະນະບ້ານ ຈຳນວນ 50 ບ້ານ ພາຍໃນ 7 ເມືອງທົ່ວແຂວງ ເຂົ້າຮ່ວມ.

ໃນພິທີ ໄດ້ຮັບຟັງລາຍງານກ່ຽວກັບການກະກຽມຊຸດຝຶກອົບຮົມ ໂດຍໄດ້ຍົກໃຫ້ເຫັນສະພາບລວມ, ເປົ້າໝາຍເຂົ້າຮ່ວມຝຶກອົບຮົມ, ຂໍ້ສະດວກ – ຂໍ້ຫຍຸ້ງຍາກ ແລະ ອື່ນໆ, ມີເປົ້າໝາຍເຂົ້າຮ່ວມຝຶກອົບຮົມທັງໝົດ 50 ສະຫາຍ, ຍິງ 5 ສະຫາຍ ໃນນັ້ນ ເລຂາພັກບ້ານ 3 ສະຫາຍ, ຮອງເລຂາພັກບ້ານ 13 ສະຫາຍ, ຜູ້ກວດກາໜ່ວຍພັກບ້ານ 20 ສະຫາຍ, ຄະນະພັກບ້ານ ຮອງນາຍບ້ານ 3 ສະຫາຍ ແລະ ສະມາຊິກພັກ ຮອງນາຍບ້ານ 11 ສະຫາຍ.

ການຝຶກອົບຮົມ ແມ່ນປະຕິບັດຕາມຫຼັກສູດທິດສະດີການເມືອງ – ການປົກຄອງ ໄລຍະສັ້ນ 10 ວັນ ທີ່ສະຖາບັນການເມືອງ ແລະ ການປົກຄອງແຫ່ງຊາດກຳນົດ ໂດຍຈະໄດ້ດຳເນີນການຮຽນ – ການສອນ ໃນ 3 ກຸ່ມວິຊາ, ມີ 18 ບົດ ຄື: ຍົກສູງຄຸນນະພາບສະມາຊິກພັກ ແລະ ວຽກງານຂະຫຍາຍພັກໃນໄລຍະໃໝ່, ຄວາມຮູ້ພື້ນຖານກ່ຽວກັບກົດໝາຍຂະແໜງກະສິກຳ ແລະ ປ່າໄມ້, ການນຳພາຂອງໜ່ວຍພັກບ້ານ ຕໍ່ການສ້າງເສດຖະກິດຄອບຄົວ, ວຽກງານຍຸຕິທຳຮາກຖານ ແລະ ການສ້າງບ້ານປອດຄະດີ ແລະ ອື່ນໆ, ຈະໃຊ້ເວລາທັງໝົດ 75 ຊົ່ວໂມງຈຶ່ງສຳເລັດ.

ຊຸດຝຶກອົບຮົມຄັ້ງນີ້ ໄດ້ປະຕິບັດມາດຕະການປ້ອງກັນໂຄວິດ-19 ຢ່າງເຂັ້ມງວດ ໄດ້ມີການກະກຽມສະຖານທີ່, ຮັກສາໄລຍະຫ່າງ, ພ້ອມນັ້ນ ເປົ້າໝາຍບຸກຄະລາກອນທີ່ຈະເຂົ້າມາຮ່ວມ ຕ້ອງໄດ້ກວດຫາເຊື້ອໂຄວິດ-19 ຢ່າງທົ່ວເຖິງ.

• Facebook
• Twitter
• Line